ކުރީގެ މެންބަރު ހުސައިން މުހައްމަދުގެ ހަނދާނުގައި މަޖިލީހުން ސުކޫތެއް ގެނެސްފި
6 ސެޕްޓެމްބަރު 2020 | އާދީއްތަ 05:08ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރުކަން، 2009 އިން ފެށިގެން 2019 އަށް ކުރައްވާފައިވޭ
ޖަލްސާގައިި ތިއްބެވި ހުރިހާ މެމްބަރުންވަނީ މެމްބަރު ހުސެއިންގެ ހަނދާނުގައި ސުކޫތެއް ގެނައުމުގެ ގޮތުން ކޮޅަށް ތެދުވެވަޑައިގެން ފަ
ރައްޔިތުންގެ މަޖިލީހުގެ ކުރީގެ މެންބަރު ހުސައިން މުހައްމަދުގެ ހަނދާނުގައި މަޖިލީހުން ސުކޫތެއް ގެނެސްފިއެވެ.
ރައްޔިތުންގެ މަޖިލީހުގެ މަތިވެރި ދާއިރާގެ މެންބަރުކަން ކުރެއްވި ހުސެއިން އަވަހާރަވީ ބުރާސްފަތި ދުވަހުގެ ރޭގެ ދަންވަރުގެ ވަގުތެއްގައި ހުޅުމާލޭގައި ހުންނަ ޓްރީޓޮޕް ހޮސްޕިޓަލުގައި ފަރުވާ ހޯއްދަވަމުން ދަނިކޮށެވެ.
އާދީއްތަ ދުވަހުގެ ޖަލްސާގައި ވާހަކަދައްކަވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ހުސެއިން އަކީ އާއްމު ހިދުމަތުގައި ސަރުކާރަށާއި ދައުލަތަށާއި ގައުމަށް ހިދުމަތް ކުރެއްވުމުގައި އެތައް އަހަރެއް ހޭދަކުރެއްވި ބޭފުޅެއް ކަމަށެވެ.
އީވާ ވިދާޅުވީ އޭނާވެސް މެމްބަރު ހުސެއިން އާއި އެކު 10 ވަރަކަށް އަހަރު ރައްޔިތުންގެ މަޖިލީހުގައި މަސައްކަތް ކުރެއްވި ކަމަށާއި ހުސެއިން އަކީ ކިތަންމެ ހަލަބޮލިވެގެންދާ ހާލަތްތަކުގައިވެސް ރަހުމަތްތެރިކަމާއި ކެތްތެރިކަމާއި ހިތްހެޔޮކަން އިސްކުރެއްވިބޭފުޅެއް ކަމަށެވެ. އަދި ހުސެއިން އަކީ ހުރިހާ ބަހުސެއްގައިވެސް ތެދުބަސް ވިދާޅުވި ބޭފުޅެއް ކަމަށާއި އޭނާއަކީ މައުލޫމާތު ފުން ބޭފުޅެއްގެ ގޮތުގައި އީވާ ފާހަގަކުރެއްވިއެވެ.
އީވާ ވިދާޅުވީ އާދީއްތަ ދުވަހުގެ ވަގުތެއްގައި ރައްޔިތުންގެ މަޖިލީހުގައި ތައުޒިޔާ ދަފްތަރެއް ހުޅުވާލާނެ ކަމަށެވެ. ކުރިއަށް އޮތް ހަފްތާގައިވެސް ފޮތުގައި ލިއުމުގެ ފުރުސަތު ހުޅުވާލާފައިވާކަން ފާހަގަކުރައްވާ އީވާ ވިދާޅުވީ އާއްމު ރައްޔިތުންނަށާއި، މެމްބަރު ހުސެއިން އާއި އެކު މަސައްކަތް ކުރެއްވި ހުރިހާ މެމްބަރުންނަށް ވެސް މި ފޮތުގައި ލިޔުއްވުމަށް ދައުވަތު އަރުވާކަމަށެވެ.
މަޖިލީހުގެ އެޖެންޑާގެ ބައިތަކާއި އެކު ކުރިއަށް ދިއުމުގެ ކުރިން ޖަލްސާގައިި ތިއްބެވި ހުރިހާ މެމްބަރުންވަނީ މެމްބަރު ހުސެއިންގެ ހަނދާނުގައި ސުކޫތެއް ގެނައުމުގެ ގޮތުން ކޮޅަށް ތެދުވެވަޑައިގެން ފައެވެ.
އަލްމަރުހޫމް ހުސައިން މުހައްމަދު ވަނީ، ރައްޔިތުންގެ މަޖިލީހުގެ އަރިއަތޮޅު އުތުރުބުރީގެ މެމްބަރުކަން 2005 ވަނަ އަހަރުން ފެށިގެން، 2009 އަހަރަށް ކުރައްވާފަ އެވެ. އަދި ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރުކަން، 2009 އިން ފެށިގެން 2019 އަށް ކުރައްވާފައިވާއިރު އެއީ ނިމިދިއަ 18 ވަނަ ރައްޔިތުންގެ މަޖިލީހާއި އޭގެ ކުރިން އޮތް 17 ވަނަ ރައްޔިތުންގެ މަޖިލީހުގެ މެމްބަރު ކަމެވެ.
މީގެއިތުރުން، މިހާރު އަމަލު ކުރަމުންދާ ދިވެހިރާއްޖޭގެ ޖުމްހޫރިއްޔާގެ އައު ގާނޫނުއަސާސީ އެކުލަވާލުމަށް އިންތިހާބުކުރި ރައްޔިތުންގެ ޚާއްސަ މަޖިލީހުގެ މެމްބަރުކަން ވެސް ކުރެއްވި އެވެ.
ހުސައިން މުހައްމަދުއަކީ، ދިވެހިރާއްޖެއަށް ޑިމޮކްރަސީ ގެނައުމަށްޓަކައި ހިންގި އިސްލާހީ ހަރަކާތުގައި ވެސް މުހިއްމު ބައިވެރި އެކެވެ. ހާއްސަކޮށް، ނިމިދިޔަ ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރު ހިނގަމުންދިޔަ 18 ވަނަ މަޖިލީހުގައި ތަޅުއަޅުވައި، ދިވެހި ސިފައިން ބޭނުންކޮށް، މަޖިލިސް ހިސޯރުކޮށް، ރާއްޖޭގެ ބަރުލަނީ ހަޔާތުގައި ދުވަހަކު ވެސް ދެކެފައިނުވާ އެ އަނދިރި ދުވަސްތަކުގައި އޭރުގެ ސަރުކާރުން ހިންގި ލާއިންސާނީ އަދި އަނިޔާވެރި އަމަލުތަކާ ދެކޮޅަށް ތެދުވެވަޑައިގެން ބަސްފުޅު ވިދާޅުވި ބޭފުޅެކެވެ.
