ރިކޯޑް އަދަދަކަށް އެއްދުވަހާ މީހުންނަށް ކޮވިޑް-19 ޖެހި އިންޑިޔާގައި ވައިރަސް ޖެހުނު މީހުންގެ އަދަދު 4 މިލިއަނަށް
5 ސެޕްޓެމްބަރު 2020 | ހޮނިހިރު 08:26އިންޑިޔާގައި ހޮނިހިރު ދުވަހު 86،432 މީހުންނަށް ވަނީ ވައިރަސް ޖެހިފައި
އިންޑިޔާގެ އާންމުތަނެއް ޑިސްއިންފެކްޓް ކުރަނީ
ހޮނިހިރު ދުވަހު ރިކޯޑް އަދަދަކަށް މީހުންނަށް ކޮވިޑް-19 ޖެހި އިންޑިޔާގައި ވައިރަސް ޖެހުނު މީހުންގެ އަދަދު 4 މިލިއަނަށް އަރައިފި އެވެ.
އިންޑިޔާގައި ހޮނިހިރު ދުވަހު 86،432 މީހުންނަށް ވަނީ ވައިރަސް ޖެހިފައެވެ. މިއީ މުޅި ދުނިޔޭގައިވެސް އެއް ދުވަހާ އެންމެ ގިނަ މީހުންނަށް އެއް ގައުމެއްގައި ކޮވިޑް-19 ޖެހިގެން ރިކޯޑް ކުރެވުނު އަދަދެވެ.
އިންޑިޔާގައި އެންމެ ގިނަ މީހުންނަށް ވައިރަސް ޖެހިގެން ރިކޯޑް ކުރެވެމުން އަންނަނީ ވެރިރަށް ނިއު ދިއްލި އާއި މަހަރަޝްތްރަ ސްޓޭޓް އަދި ކަރްނާޓަކާއިންނެވެ.
އިންޑިޔާގައި ކޮވިޑް-19 ޖެހުނު މީހުންގެ އަދަދު ތިން މިލިއަނުން ހަތަރު މިލިއަނަށް އަރާފައިމިވަނީ ތޭރަ ދުވަހުގެ ތެރޭގައެވެ. އެގައުމުގައި އެއް މިލިއަން މީހުންނަށް ވައިރަސް ޖެހެން ސަތޭކައަށްވުރެ ގިނަ ދުވަސް ވަނީ ނަގާފައެވެ.
ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު އެންމެ ގިނަ ގައުމުގެ ގޮތުގައި އިންޑިޔާއިން ރިކޯޑް ކުރަމުން އަންނަތާ މިވަނީ ގާތްގަޑަކަށް މަސްދުވަސް ވެފައެވެ. ވައިރަސް ޖެހޭ މީހުންގެ އަދަދު އިތުރުވަމުންދިޔަ ނަމަވެސް އިންޑިޔާ ސަރުކާރުން އަންނަނީ އިގްތިޞާދު ހުޅުވާލުމުގެ މަސައްކަތްކުރަމުންނެވެ.
އިންޑިޔާގައި ކޮވިޑް-19 ޖެހިގެން މަރުވެފައިވާ މީހުންގެ އަދަދު ވަނީ 69،561ށް އަރާފައެވެ.
