އިނގިރޭސިވިލާތުން އިސްރާއީލަށް ރެކޯޑް އަދަދަކަށް ހަތިޔާރު ވިއްކައިފި

އިނގިރޭސި ވިލާތުން އިސްރާއީލަށް ހަތިޔާރު ވިއްކުމުގެ ހުއްދަ މިދިޔަ އަހަރު ރެކޯޑް މިންވަރަކަށް ދީފައިވާކަމަށް ކެމްޕެއިން އެގެއިންސްޓް އާރމްސް ޓްރޭޑް(ސީއޭއޭޓީ)ގެ ހިސާބުތަކުން ދައްކައިފިއެވެ.

އިނގިރޭސިވިލާތުން 2017 ވަނަ އަހަރު އިސްރާއީލަށް 294 މިލިއަން އެމެރިކާ ޑޮލަރުގެ ހަތިޔާރު ވިއްކުމުގެ ހުއްދަ، އިސްރާއީލަށް ހަތިޔާރު ވިއްކާ ކޮންޓްރެކްޓަރުންނަށް ދީފައިވާއިރު މިއީ 2016 ވަނަ އަހަރު އެ ގައުމުން ހުއްދަ ދީފައިވާ 114 މިލިއަން ޑޮލަރާ އަޅާ ބަލާއިރު 256 އިންސައްތަ މަތީ އަދަދެކެވެ.

އޭގެ އެއް އަހަރު ކުރިއަށް ބަލާއިރު 2015 ވަނަ އަހަރު އިނގިރޭސިވިލާތުން ހުއްދަ ދީފައިވަނީ 27 މިލިއަން އެމެރިކާ ޑޮލަރުގެ ހަތިޔާރު ވިއްކުމަށެވެ.

މި ވޭތުވެދިޔަ ފަސް އަހަރުގެ ތެރޭގައި އިނގިރޭސިވިލާތުން އިސްރާއީލަށް ވިއްކި ހަތިޔާރާއި އެއާއި ގުޅޭ ސާމާނުގެ އަގު 466 މިލިއަން އެމެރިކާ ޑޮލަރަށް އަރައެވެ.

އިނގިރޭސިވިލާތުން އިސްރާއީލަށް ވިއްކާފައިވާ ހަތިޔާރުގެ ތެރޭގައި ރައިފަލާއި، ބަޑީގެ ވަޒަނާއި، ސްނައިޕަރ ރައިފަލްގެ އިތުރުން މީހުންނަށް އަމާޒުކުރާނެ އާލާތްތައް ހިމެނެއެވެ.

އިނގިރޭސި ވިލާތުން އިސްރާއިލަށް ހަތިޔާރު ވިއްކާ އަދަދުތަކާއި ބެހޭ އައު މައުލޫމާތުތަކެއް ހާމަކޮށްފައި މިވަނީ މާޗް މަހުގެ ފަހުކޮޅުން ފެށިގެން ފަލަސްތީނުގެ ރައްޔިތުން ކޮންމެ ހަފްތާ ބަންދެއްގައި ޣައްޒާގެ އިރުމަތީގައި އިސްރާއީލާއި ފަލަސްތީނު ގުޅޭ ސަރަހައްދީ ރޮނގުގައި ކުރަމުންދާ މުޒާހަރާތަކުގައި އިސްރާއީލުން ފަލަސްތީނުގެ ރައްޔިތުންނަށް ރައްދުގައި ވަރުގަދަ ހަމަލާތަކެއް ދެމުންދާ ދުވަސްވަރެއްގައެވެ.

ސްނައިޕަރުން ދިން ހަމަލާތަކުގައި މަދުވެގެން ފަލަސްތީނުގެ 120 މީހުން ޝަހީދު ވެފައިވާއިރު، އިސްރާއީލުގެ ހަމަލާތަކުގައި 13،000 އަށްވުރެ ގިނަ މީހުންވަނީ ޒަޚަމްކޮށްލާފައެވެ.