ބިދޭސީއަކު ޖަލަށް ގެންދާތާ 24 ގަޑިއިރު ތެރޭ މުއާމަލާތް ކުރެވޭނެ ގޮތް ހަމަޖައްސަން ޖެހޭ: ކަރެކްޝަންސް

ޖަލުގައި ބަންދުކޮށްފައިވާ ގައިދީއަކީ ނުވަތަ ބަންދުކޮށްފައިވާ މީހާއަކީ ބިދޭސީއެއް ނަމަ، ޖަލަށް ގެންދާތާ 24 ގަޑިއިރުގެ ތެރޭގައި އޭނާ އަށް މުއާމަލާތް ކުރެވޭ ގޮތް ހަމަޖައްސައިދޭ ގޮތަށް ގައިދީންނާއި ބަންދު މީހުންނަށް ލިބެންޖެހޭ އަސާސީ ހިދުމަތްކާއި އިނާޔަތްތަކުގެ ގަވާއިދެއް އެކުލަވާލައިފިއެވެ.

އެ ގަވާއިދުގެ 21 ވަނަ މާއްދާގެ ހ ގައިވާ ގޮތުން ރާއްޖޭގައި ގާއިމުކޮށްފައިވާ، ބިދޭސީ މީހަ ނިސްބަތްވާ ގައުމުގެ ހައިކޮމިޝަނާ ނުވަތަ އެމްބަސީއާ މުއާމަލާތު ކުރަން ފަސް މިނެޓުގެ ފޯނު ކޯލެއް ދޭންވާނެއެވެ.

އެ ގަވާއިދު އެކުލާވާލުމުގެ މަގްސަދެއް ކަމަށް ކަރެކްޝަނުން ބުނެފައިވަނީ ޖަލުގައި ބަންދުކުރެވޭ މީހުންނަށް ދޭންޖެހޭ އެންމެހާ އަސާސީ ހިދުމަތްތަކާއި އިނާޔަތްތައް ކަނޑައެޅުމާއި، އެ ހިދުމަތްތައް ދިނުމުގައި އަމަލުކުރާނެ އުސޫލުތައް އަންގައިދިނުމެވެ.

އައު ގަވާއިދުގައި ބަޔާންކޮށްފައިވާ އަސާސީ ހިދުމަތްތަކުގެ ތެރޭގައި ނަމާދުކޮށް ގުރުއާން ކިޔަވައި ރޯދަހިފުމުގެ އިންތިޒާމާއި ކެއިން ބުއިމުގެ އިންތިޒާމާއި އަމިއްލަ ސާފުތާހިރުކަން ދެމެހެއްޓޭނެ އިންތިޒާމާއި ފާހަނާކުރުމުގެ އިންތިޒާމާއި ނިދާނެ ތަނަކާއި ނިދަން ބޭނުންވާ ތަކެތި ފޯރުކޮށްދިނުން ހިމެނެއެވެ.

ބޭސް ފަރުވާ ކުރުމުގެ އިންތިޒާމާއި ކަސްރަތުކޮށް އުޅުމުގެ އިންތިޒާމް ހަމަޖައްސައިދިނުންވެސް ގަވައިދުގައި ހިމެނެއެވެ. އަލަށް އެކުލަވާލި ގަވާއިދުގެ ދަށުން ޔުނީފޯމާއި އެހެނިހެން އަންނައުނު ދޮވުމާއި ބަދަލުކުރުމުގެ އިންތިޒާމާއި، މުޖްތަމައުއަށް އަނބުރާ ގެނައުމަށްޓަކާ ބޭނުންވާ އެހީތެރިކަން ފޯރުކޮށްދިނުމާއި ވަކީލުންނާ ބައްދަލުވުމުގެ އިންތިޒާމް ހަމަޖެއްސުން ކަރެލްޝަންގެ މައްޗަށް ލާޒިމް ކުރެއެވެ.

އާއިލާއާ ގުޅުން ބަދަހިކުރުމުގެ ގޮތުން ފޯން ކޯލް ދިނުމާއި އާއިލީ ބައްދަލުވުން މަދުވެގެން މަހަކު އެއް ފަހަރު ދެ ގަޑިއިރަށް ދިނުމާއި، އެކަހެރި ބައްދަލުވުން މަހަކު އެއް ފަހަރު، ކޮންމެ ފަހަރަކު 24 (ސައުވީސް) ގަޑިއިރަށް ދިނުން ވެސް ހިމެނެއެވެ. ކަރެކްޝަންސްގެ އައު ގަވައިދު ބުނާ ގޮތުން އާއިލީ ބައްދަލުވުން ވީޑިއޯ ކޯލް މެދުވެރިކޮށްވެސް ކުރިއަށް ގެންދެވޭނެ އެވެ.

އެ ގަވާއިދުގެ ދަށުން ސިޓީ ލިޔާނެ ތަކެއްޗާއި ކިޔާނެ ފޮތް ފޯރުކޮށްދިނުމާއި މަސައްކަތްކުރާ ގައިދީންގެ އުޖޫރައަށް ބަދަލުގެނެއުން އަދި ޖަލުގައި ބަންދުކުރެވޭ ފަރާތްތައް ބައިތިއްބާ ތަންތަނާއި މަސައްކަތްކުރާ ތަންތަން ނިދުމަށް ކަނޑައަޅާފައިވާ ގަޑި ފިޔަވައި އެއްޗެއް ބަލައިގެން ކިޔަން އެނގޭވަރަށް އަލިކުރުމާއި ވައި ދައުރުވާގޮތަށް ވެންޓިލޭޝަން ކަރެކްޝަނުން ފޯރުކޮށްދޭން ޖެހެއެވެ.