ޗެނަލް 13އިން ރައީސްގެ ހަށިކޮޅަށް ގެއްލުންދޭ ވާހަކަ ގެނައީ ގަސްތުގައި، ބަހަނާ ދައްކައި ބަޔާން ނެރެ ރައްޔިތުން ގުނބޯ ނުހެއްދޭނެ: ޑރ. އިޔާޒް

ޗެނަލް 13އިން ރައީސްގެ ހަށިކޮޅަށް ގެއްލުންދޭ ވާހަކަ ގެނައީ ގަސްތުގައިކަމަށާއި ބަހަނާ ދައްކައި ބަޔާން ނެރެ ރައްޔިތުން ގުނބޯ ނުހެއްދޭނެކަމަށް ދީނީ އިލްމުވެރިޔާ ޑރ. މުހައްމަދު އިޔާޒް ވިދާޅުވެއްޖެއެވެ.

ރައީސް ސޯލިހުގެ ހަށިކޮޅުގައި އަލިފާން ޖަހަން ޕީޕީއެމްގެ ސަޕޯޓަރެއް ޗެނަލް13 ގެ ޕްރޮގްރާމެއްގައި ގޮވާލާފައިވާއިރު މީހުން މެރުން، މާރަމާރީ، ޓެރަރިޒަމް ލޭއޮހޮރުވުން ފަދަ ޖަރީމާތައް މޮޅު ނުވަތަ ރަނގަޅު ކަންކަން ކަމަށް ދޭހަވާ ގޮތަށް ބްރޯޑްކާސްޓް ކޮށްގެން ނުވާނެ ކަމަށް ބްރޯޑްކާސްޓް ކުރުމުގެ ކޯޑް އޮފް ކޮންޑަކްޓް ގައިވެއެވެ. ޗެނަލް13 އިން ބުނީ އެމީހާ އެހެން ބުނުމާއެކު ވަގުތުން އެ ފޯނު ކޯލު މެދުކަނޑާލި ކަމަށެވެ. ނަމަވެސް އޭނާ އެހެން ބުނާ އަޑު ބްރޯޑްކާސްޓް ކުރެވިފައިވާތީ އެކަމަށް ބެލުންތެރިންގެ ކިބައިން ޗެނަލް13 އިން ވަނީ މައާފަށް އެދިފައެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން ޑރ. އިޔާޒު ވިދާޅުވީ ޗެނަލް13 އަކީ ރައްޔިތުން ތެރޭގައި ބިރުވެރިކަން އުފައްދައި ނަފްރަތު އުފެއްދުމަށް މަސައްކަތް ކުރާ ތަނެއްކަމަށާއި ޕްރޮގްރާމްގައި ދައްކާފައިވަނީ ދީނާ ހިލާފު ވާހަކައެއްކަމަށެވެ. އަދި ދީނާ ހިލާފު އެއްވެސް ވާހަަކައެއް ނުދެއްކޭނެކަން ފާހަގަކޮށް ޑރ އިޔާޒް ވިދާޅުވީ ޕްރޮގްރާމް ހުށަހަޅަން އިން ޕްރެޒެންޓަރު ވަގުތުން އެކަން ހުއްޓުވައި ބެލުންތެރިންގެ ކިބައިން އެކަން ހިނގައިދިޔައީތީ މާފަށް އެދެން ޖެހޭނެކަމަށެވެ. ނަމަވެސް އެމަންޒަރުގެ ބަދަލުގައި އަޑުއިވިގެންދިޔައީ އެ ޕްރެޒެންޓަރ އެ ގޮތަށް ވާހަކަ ދެއްކީތީ ޝުކުރު އަދާކޮށް ޕްރޮގްރާމަށް ގުޅައި ވާހަކަ ދެއްކީތީ އުފާވެފައި އިން މަންޒަރުކަމަށެވެ.

ރައްޔިތުން ކިބައިން ޗެނަލް 13އިން މާފަށް އެދެން ނެރުނު ބަޔާނާއި ގުޅޭ ގޮތުން ޑރ. އިޔާޒު ވިދާޅުވީ އެއީ އާންމުންގެ ޕްރެޝަރާއި ހުރެ ނެރުނު ބަޔާނެއްކަމަށެވެ. ހަގީގަތުގައިވެސް ގަސްތުގައި ކުރި ކަމެއް ނޫންކަމެއް ނަމަ ބަޔާން ނެރޭނީ މީސް މީޑިއާގައި އެކަން ކުށްވެރިކޮށް ވައިރަލް ވުމުން ނޫންކަންވެސް އޭނާ ފާހަގަކުރެއްވިއެވެ.

މިކަމާއި ގުޅިގެން ޑރ. އިޔާޒް ވަނީ ޓުވީޓުވެސް ކުރައްވާފައެވެ. އެގޮތުން، ޗެނަލް13 އަކީ ވަރަށް ގިނަ ދިވެހިންގެ އަބުރު ކަތިލާފައިވާ ފިތުނަ ފަސާދަ އުފެއްދުމުގެ ބޮޑު އައްޑާއަކަށް ވެފައިވާ ތަނެއް ކަމަށާއި އެތަނާއި މެދު ހަރުކަށި ފިޔަވަޅު އެޅުމަށް ޑރ. އިޔާޒް ވަނީ ގޮވާލައްވާފައެވެ.

އަދި އަނިޔާވެރިކަމަކީ ﷲ އާއި ރަސޫލާ ހަރާމްކުރައްވާފައިވާ ކަމެއްކަމަށާއި އެފަދަ ކަންތައްތަކަށް ގޮވާލާ ހިއްވަރުދީ ހެދުމަކީ ﷲއާއި ރަސޫލާއަށް ފާޅުގައި ގޮންޖަހައި ފުރައްސާރަކުރުން ކަމަށް ޑރ އިޔާޒް ވަނީ ވިދާޅުވެފައެވެ. އަދި އެފަދަ އަމަލުތަކަކީވެސް ލާދީނީ ކަންތައްތައް ކަމުގައި އޭނާ ވިދާޅުވިއެވެ. ރާއްޖެއެމްވީއަށް މައުލޫމާތު ދެއްވަމުން އިޔާޒް އިތުރަށް ވިދާޅުވީ، ނިމިދިޔަ ވެރިކަމުގައި އަނިޔާވެރިކަމާއި ހިޔާނާތްތެރިކަން އިންތިހާއަށް އޮތް އިރު އެކަން ޕްރޮމޯޓް ކުރި މީހުންނަކީވެސް ލާދީނީ ބައެއް ކަމަށެވެ. އެގޮތުން، މިހާރުވެސް އެ ޗެނަލުން ކުރަމުން ދަނީ އެކަންކަމަށް ފާހަގަކުރެއްވިއެވެ. އިސްލާމް ދީނާއި ދެކޮޅު ޖަމިއްޔާތަކާއި މެދު ފިޔަވަޅުއެޅުމަށް ޗެނަލް 13އިން ގޮވަމުން އަންނައިރު އަނިޔާވެރިކަން އިސްކުރަން ހިއްވަރުދީ އެފަދަ ކުށްތައް ސާބިތުވެފައިވާ ހިޔާނާތްތެރި އަނިޔާވެރިން ޕްރޮމޯޓްކުރަނީ ކީއްވޭތޯ ވިދާޅުވެ ސުވާލު އުފައްދަވާފައިވެއެވެ.

އެގޮތުން، ޑރ އިޔާޒް ވިދާޅުވީ އެފަދަ ފަރާތްތަކަކީ ފޮތުގެ އެއްބަޔަށް އީމާންވެފައި އަނެއް ބަޔަށް ކާފަރުވާ މީހުންކަމަށެވެ.