މި އަހަރު ނިމޭއިރު އެމެރިކާގައި ވައިރަސް ޖެހިގެން 4 ލައްކައަށް ވުރެ ގިނަ މީހުން މަރުވާނެ ކަމަށް އަންދާޒާކުރެވޭ: ދިރާާސާ

މި އަހަރު ނިމޭއިރު އެމެރިކާގައި 4 ލައްކައަށް ވުރެ ގިނަ މީހުން މަރުވާނެ ކަމަށް އަންދާޒާ ކުރެވޭކަމަށް ދިރާސާއަކުން ދައްކައިފިއެވެ.

އެމެރިކާގައި މިހާތަނަށް މަރުވި މީހުންގެ އަދަދު ވަނީ 192 ހާހަށްވުރެ މައްޗަށް އަރާފައެވެ. ޔުނިވަރސިޓީ އޮފް ވޮޝިންގޓަންގެ ރިސަރޗް ޓީމަކުން ހެދި ދިރާސާއެއްގެ މައްޗަށް ތައްޔާރު ކުރި މޮޑެލް ދައްކާ ގޮތުން މި އަހަރު ނިމޭއިރު ޖުމްލަ 410،000ށް ވުރެ ގިނަ މީހުން ބަލި ޖެހިގެން މަރުވާނެއެވެ. އެއީ މިހާރު އެ ގައުމުން މަރުވެފައިވާ މީހުންގެ އަދަދުގެ ދެ ގުނަ ބޮޑު އަދަދަކަށްވާއިރު ދުވާލެއްގެ މައްޗަށް މަރުވާ މީހުންގެ އަދަދު 3000އާއި ގާތްކުރާނެ ކަމަށް އެ ދިރާސާ އިން ދައްކައެވެ.

އެ ޓީމުން ބުނެފައި ވަނީ މާސްކް އަޅާނަމަ މިހާރު އަންދާޒާކޮށްފައި ހުރި އަދަދުތަކަށް ވުރެ 30 އިންސައްތަ މަދުވާނެ ކަމަށެވެ. ނަމަވެސް މިހާރު ވެސް ފެންނަ މަންޒަރުތަކަށް ބަލާނަމަ މާސްކް އެޅުމާއި މީހުން ވަރަށް ދުރުވާ މަންޒަރު ފެންނަމުން ދާކަމަށް އިންސްޓްޓިއުޓް ފޮރ ހެލްތް މެޓްރިކްސް އެންޑް އިވެލުއޭޝަން (އައިއެޗްއެމްއީ) އިން ވަނީ ބުނެފައެވެ. ފާއިތުވެގެން ދިޔަ ދުވަސްތަކާއި އަޅާ ކިޔާއިރު އެމެރިކާއިން ދުވާލެއްގެ މައްޗަށް ކިވިޑް-19ގެ ކޭސްތައް ފެންނަ ނިސްބަތް ވަނީ މަދުވެފައެވެ. ކުރިން ދުވާލެއްގެ މައްޗަށް 70،000 އައު ކޭސް ފެނުނު ކަމުގައިވިޔަސް މިހާރު ދުވާލެއްގެ މައްޗަށް ފެންނަނީ 40،000 އައު ކޭސްއެވެ.

މީއޫ ކުރިޔާއި އަޅާކިޔާއިރު ވަރަށް ބޮދު ކުރިއެރުމެއްކަން ދިރާސާ މޮޑިއުލުން ދައްކައެވެ. މީގެއިތުރުން، ބޮޑެތި ސިޓިތަކުން ކޭސްތައް ފެންނަ އަދަދު ވަނީ ވަރަށް ބޮޑުތަނުން މަދުވެފައެވެ. ނަމަވެސް، އެމެރިކާއިން އެންމެ ގިނައިން މީހުން މަރުވާ ސަބަބުތަކުގެ ތެރޭގައި ކޮވިޑް-19ށް ހައިރިސްކް ކެޓެގެރީތަކުގެ މީހުން ޕޮޒިޓިވްވުން ހިމެނެއެވެ.

ޖުލައި މަހުގެ 15 އިން ފެށިގެން އެމެރިކާގެ އެކި ސިޓީތަކުގައި މާސްކު އެޅުން ވަނީ މަޖުބޫރު ކޮށްފައެވެ. އަދި މާސްކު އެޅުން މަޖުބޫރު ކުރި ނަމަވެސް އެއްވެސް އަދަބެއް ކަނޑައަޅާފައި ނުވާތީ ނުވަތަ ޖޫރިމަނާ ނުކުރާތީ މާސްކް އަޅާ މީހުންގެ އަދަދު 8 އިންސައްތައަށް އިތުރު ކަމަށާއި، ޖޫރިމަނާއެކު އަދަބު ކަނޑައަޅާފައިވާނަމަ މާސްކް އަޅާ މީހުން 15 އިންސައްތައަށް އިތުރުވެގެންދާނެ ކަމަށެވެ.

އައިއެޗްއެމްއީގެ މޮޑެލް ދައްކާ ގޮތުން ބަލިމަޑުކަން ގޯސްވެގެންދާ ހިސާބުގައި 50 އިންސައްތަ ސްކޫލްތަކުގައި އޮންލައިންކޮށް ކިޔަވައިދޭން ފަށާނެ ކަމަށާއި، އަދި އެގޮތަށް އަމަލުކުރަން ފެށުމުން މިހާރު ހުރި އަންދާޒާތަކަށް ބޮޑު ބަދަލެއް އަންނާނެ ކަމަށެވެ. މީގެކުރިން ޔުނިވަރސިޓީ އޮފް ވޮޝިންގޓަންގެ ރިސަރޗް ޓީމަކުން ހެދި ދިރާސާއެއްގެ މައްޗަށް ތައްޔާރު ކުރި މޮޑެލް ދައްކާ ގޮތުން މި އަހަރުގެ ޑިސެމްބަރުގެ މަހުގެ 1 ވަނަ ދުވަހާ ހަމަށް މި އަދަދު 300 ހާހަށް އެރުމަކީ އެކަށީގެންވާ ކަމެވެ. ނަމަވެސް މިކަން ބަދަލު ކުރެވިދާނެ ކަމަށާއި، އެކަން ކުރެވޭނީ ގަވާއިދުން މާސްކް އަޅާ ރައްކާތެރިކަމުގެ ފިޔަވަޅު އަޅަމުންދާ ކަމުގައި ވާނަމަ ކަމަށް މި ޓީމުން ވަނީ ބުނެފައެވެ.