ރޯވި ތެޔޮ ޓޭންކަރުން ރާއްޖޭގެ ކަނޑުގެ ސަރަހައްދަށް ތެލުގެ އަސަރު ކުރާނެ ކަމަކަށް ނުބެލެވޭ: ކޯސްޓް ގާޑް
4 ސެޕްޓެމްބަރު 2020 | ހުކުރު 13:30އަލިފާން ރޯވީ "ނިއު ޑައިމަންޑް" ނަމަކަށް ކިޔާ ޓޭންކަރެއްގައި
ތެޔޮ ޓޭންކަރުގައި ރޯވި ހާދިސާއާ ގުޅިގެން ބޭއްވި ޕްރެސް ކޮންފަރެންސްގެ ތެރެއިން
ދެ މިލިއަން ފީފާގެ ތެޔޮ ހިފައިގެން ސްރީލަންކާ ކައިރިން ދަތުރު ކުރި ތެޔޮ ޓޭންކަރުގައި ރޯވި އަލިފާންގަނޑުގެ ސަބަބުން ރާއްޖޭގެ ކަނޑަށް ތެޔޮ އެޅުމުގެ ފުރުސަތު ކުޑަ ކަމަށް ކޯސްޓް ގާޑުން ބުނެފިއެވެ.
އަލިފާން ހިފާފައިވަނީ ކުވެއިތުގެ ބަނދަރުން ދެ މިލިއަން ފީފާ ތެޔޮ ބަރު ކޮށްގެން އިންޑިއާގެ "ޕްރަދީޕް" ބަނދަރާ ދިމާއަށް މިސްރާބު ހިފާފައި ހުރި "ނިއު ޑައިމަންޑް" ނަމަކަށް ކިޔާ ޓޭންކަރެއްގައެވެ. އެ ޓޭންކަރުން އަދި މިހާތަނަށް ތެޔޮ ލީކުވެފައިވާ ކަމަށް ރިޕޯޓްކޮށްފައެއް ނުވެއެވެ.
އެކަމާއި ގުޅިގެން ކޯސްޓް ގާޑް އާއި އެންވަޔަރަމެންޓް މިނިސްޓްރީ އަދި މޯލްޑިވްސް މިޓިއަރޮލޮޖިކަލް ސާވީސް ގުޅިގެން ވަނީ ހުކުރު ދުވަހު ޕްރެސް ކޮންފަރެންސެއް ބާއްވާފައެވެ. އެ ޕްރެސް ކޮންފަރެންސްގައި ވާހަކަ ދައްކަވަމުން ކޯސްޓްގާޑްގެ ކޮމާންޑަންޓް ކާނަލް މުހައްމަދު ސަލީމް ވިދާޅުވީ، ޓޭންކަރުގައި އަލިފާނުގެ ހާދިސާ ހިނގުމާއި އެކު ސްރީލަންކާގެ މެރިޓައިމް ރެސްކިޔު ކޯޑިނޭޓަރުން އެ މައުލޫމާތު ރާއްޖޭގެ ކޯސްޓް ގާޑާއި ހިއްސާ ކޮށްފައިވާ ކަމަށެވެ.
އެ ޓޭންކަރުގައި އަލިފާން ހިފީ އިންޖީނުގެ ބޯއިލަރެއްގައި ރޯވެގެންނެވެ. ސަލީމް ވިދާޅުވީ، ބޯޓުން ތެޔޮ ލީކްވެ ރާއްޖޭގެ ކަނޑުގެ ސަރަހައްދަށް ތެޔޮ އެޅިދާނެ ހަލާތެއްގައި އަމަލު ކުރާނެ ގޮތާއި، އަޅާނެ ފިޔަވަޅުތަކާއި ގުޅޭ ގޮތުން ޓްރާންސްޕޯޓް މިނިސްޓްރީއާ، އެންވަޔަރަމެންޓް މިނިސްޓްރީއާ ގުޅިގެން ޓާސްކު ފޯހެއް އެކުލަވާލައި އެކަން ބަލަމުންދާ ކަމަށެވެ. އެކަމަކު އަދި މިހާތަނަށް އެކަމުގެ ނުރައްކަލެއް ރާއްޖެ އަށް އޮތް ކަމަށް ލަފާ ނުކުރެވޭ ކަމަށް ވިދާޅުވިއެވެ.
ކޯސްޓުގާޑުން ބުނީ، މި ކަހަލަ ކަމެއް ހިނގާފާނެތީ ކުރީއްސުރެ ގިިނަ މަަސައްކަތެއް ކުރެވިފައިވާ ކަމަށެވެ.
ރިޕޯޓްތައް ބުނާ ގޮތުން އަލިފާން ހިފިއިރު ޓޭންކަރުގައި 23 ފަޅުވެރިން ދަތުރު ކުރިއެވެ. އޭގެ ތެރޭގައި ހިމެނެނީ ފިލިޕީންސްގެ 18 މީހަކާއި، ގްރީކަށް ނިސްބަތްވާ 5 މީހެކެވެ. އޭގެ ތެރެއިން 22 މީހުން ސަލާމަތް ކޮށްފައިވާއިރު އެކަކު ހޯދުމުގެ މަސައްކަތް ދަނީ ކުރަމުންނެވެ.
