ކޮވެކްސް ފެސިލިޓީގައި މިހާރު ފައިސާވެރި 76 ގައުމު!
މިހާރު ޖަޕާން، ޖަރުމަނު، ނޯވޭ ގެ އިތުރުން 70 އަށްވުރެ ގިނަ ގައުމު މި ފެސިލިޓީގައި ބައިވެރި ވެފައި ވޭ
ކޮވެކްސް އިން ދަނީ ވެކްސިން އުފެއްދުމަށް މަސައްކަތް ކުރަމުން
ކޮވިޑް-19 އަށް އުފައްދާ ވެކްސިން ހަމަހަމަކަމާއެކު ހުރިހާ ގައުމުތަކަށް ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އެކުލަވާލާފައިވާ ކޮވެކްސް ފެސިލިޓީ ގައި މިހާރު ފައިސާވެރި 76 ގައުމު ބައިވެރި ވެއްޖެއެވެ.
އެގޮތުން ކޮވެކްސް ޕްލޭންގައި ބައިވެރިވާން ޝައުގުވެރިކަން ހުރި ގައުމުތަކަށް ޝައުގުވެރިކަން ފާޅުކުރުމުގެ ފުރުސަތު މިދިޔަ އޮގަސްޓް މަހުގެ 31 ވަނަ ދުވަހުގެ ނިޔަލަށް ހުޅުވާލާފައިވެއެވެ.
ވެކްސިން އުފައްދާ ގާވީ ގެ ޗީފް އެގްޒެކިއުޓިވް ސެތް ބާރކްލީ ބުނެފައިވަނީ މިހާރު ޖަޕާން، ޖަރުމަނު، ނޯވޭ ގެ އިތުރުން 70 އަށްވުރެ ގިނަ ގައުމު މި ފެސިލިޓީގައި ބައިވެރި ވެފައި ވާކަމަށެވެ. އަދި މި ނަންބަރު އިތުރު ވުމަކީ އެމީހުންގެ އުއްމީދެއް ކަމަށާ މި އަދަދު އިތުރު ވާނެކަމަށް ބެލެވޭކަމަށްވެސް އޭނާ ވަނީ ބުނެފައެވެ.
އަދި މިއީއުފާވެރި ހަބަރެއް ކަމަށާ މިހާރު ޗައިިނާ އާވެސް މަޝްވަރާތައް ދަނީ ކުރިއަށް ކަމަށް އޭނާ ބުންޏެވެ. މީގެ އިތުރުންވެސް ޗައިނާ އަދި ބައިވެރި ނުވިއަސް މިހާރު އެ ގައުމުންވެސް ފެހި ސިގްނަލެއް ދީފައިވާކަމަށް އޭނާ ހާމަ ކުރިއެވެ.
ދުނިޔޭގެ ބޮޑު އެއް ބާރު ކަމަށްވާ އެމެރިކާއިން މި ފެސިލިޓީގައި ބައިވެރި ނުވާނެކަމަށް ވަނީ ނިންމާފައެވެ. މިކަމާ ގުޅިގެން ސެތް ބުނެފައިވަނީ އޭނާ އެކަމާމެދު ހައިރާން ނުވާކަމަށެވެ.
ކޯވެކްސް ގެ މައިގަނޑު މަގްސަދަކީ 2021 ގެ ނިޔަލަށް 2 ބިލިއަނަށް ވުރެ ގިނަ ޑޯޒް ހޯދުމާއި ހަމަކުރުމެވެ. މިހާރުވެސް ނުވަ ވެކްސިނެއް ވަނީ ކާމިޔާބު ވުމުގެ މަރުހަލާގައެވެ.
