2 މިލިއަން ފީފާގެ ތެޔޮ ހިފައިގެން އިންޑިއާއަށް ދިޔަ ޓޭންކަރެއްގައި ބުރާސްފަތި ދުވަހު ހިނގި އަލިފާނުގެ ހާދިސާގައި ބޯޓުގެ ކްރޫއިންގެ ތެރެއިން އެކަކު ގެއްލިގެން ހޯދަމުންދާ ކަމަށް އިންޑިއަން ކޯސްޓްގާޑުން ބުނެފިއެވެ.

ރިޕޯޓްތައް ބުނާގޮތުން އަލިފާން ހިފިއިރު ޓޭންކަރުގައި 23 ފަޅުވެރިން ދަތުރު ކުރިއެވެ. އޭގެ ތެރޭގައި ހިމެނެނީ ފިލިޕީންސްގެ 18 މީހަކާއި، ގްރީކަށް ނިސްބަތްވާ 5 މީހެކެވެ.

އޭގެ ތެރެއިން 22 ފަޅުވެރިން ސަލާމަތުން ތިބިކަމަށާއި އެކަކު ގެއްލިގެން ހޯދަމުންދާ ކަމަށް އައިސީޖީ އިން ވަނީ ބުނެފައެވެ. ގެއްލިގެން ހޯދަމުންދަނީ ފިލިޕީންސްގެ ރައްޔިތެއް ކަމަށް ވަނީ ބުނެފައެވެ. އައިސީޖީން މިހެން ބުނި ކަމުގައި ވީނަމަވެސް ބޯޓުގެ ކްރޫއެއް މަރުވެގެން އުޅޭކަމަށް ބައެއް މީޑިއާ ތަކުގައި ވަނީ ރިޕޯޓްކޮށްފައެވެ.

އެ ސަރަހައްދުގެ ކަނޑަށް ތެޔޮ އެޅުމުގެ ނުރައްކަލެއް މިވަގުތު ނެތް ކަމަށް ވެސް އިންޑިއަން ކޯސްޓްގާޑުން މައުލޫމާތު ދެއެވެ.

ޓޭންކަރުގެ ސާވިސް އޭރިއާއާ ހަމައަށް ފެތުރިފައިވާ އަލިފާންގަނޑު ނިއްވައިލުމަށް ލަންކާ އިން އެހީތެރިކަމަށް އެދުމުން އިންޑިއާގެ ތިން މަނަވަރާއި ޑޯނިއާ މަތިންދާބޯޓެއް އެ ސަރަހައްދުގައި ދަނީ އަލިފާން ނިއްވުމަށް ހަރަކާތްތެރިވަމުންނެވެ.

މީގެ އިތުރުން ސްރީލަންކާގެ ހަމްބަންޓޯޓާ ބަނދަރުގައިވާ ރަޝިއާގެ މަނަވަރުތަކެއް ވެސް އަންނަނީ އަލިފާން ނިއްވުމުގައި އެހީތެރިވަމުންނެވެ.

ރޮއިޓަރސްގައި ރިޕޯޓް ކޮށްފައިވާ ގޮތުން އަލިފާން ހިފާފައިވަނީ ކުވެއިތުގެ ބަނދަރުން 2 މިލިއަން ފީފާ ތެޔޮ ބަރުކޮށްގެން އިންޑިއާގެ "ޕްރަދީޕް" ބަނދަރާ ދިމާއަށް މިސްރާބު ޖަހާފައިވާ "ނިއު ޑައިމަންޑް" ނަމަކަށް ކިޔާ ޓޭންކަރެއްގައެވެ. އެގޮތުން ތެޔޮ ޓޭންކަރުގައި އަލިފާން ހިފާފައިވަނީ އިންޑިއާ ކަނޑު ތެރެއަށް ޓޭންކަރު ވަދެ، ސްރިލަންކާގެ އިރުމަތިން 20 ނޯޓިކަލް މޭލު ދުރުން ދަތުރު ކޮށްފައި އަންނަނިކޮށް ކަމަށް ރޮއިޓަރސްގައި ރިޕޯޓް ކޮށްފައިވެއެވެ.

ރިޕޯޓްތައް ބުނާ ގޮތުން ނިއު ޑައިމަންޑަކީ އިންޑިއާގެ އިންޑިއަން އޮއިލް ކޯރޕް (އައިއޯސީން) ޗާޓަރ ކޮށްގެން ގެނައި ތެޔޮ ޓޭންކަރެކެވެ.