"ވާނުވާގެ މައްސަލަތަކަށް ޙައްލެއް އަންނަންދެން މަސައްކަތް ކުރާނަން، އަވަހަށް ނަތީޖާ ފެންނާނެ ކަމަށް ބެލެވޭ"
އެކަމުގައި ކުރިއަށްދާނެ މަގުތަކެއް ވަނީ ފެނިފައި
ޖޭއެސްސީގެ މެމްބަރުންނާއި ޕީޖީ ހުސައިން ޝަމީމް ބައްދަލު ކުރައްވަނީ
ޖަލުގައި "ވާނުވާ" ޖަހާފައި ތިބި މީހުންގެ މައްސަލަތަކަށް އަވަސް ޙައްލެއް ހޯދެވެންދެން އެ މަސައްކަތުގައި ދެމި ހުންނަވާނެ ކަމަށާއި، ވަރަށް އަވަހަށް ނަތީޖާ ފެންނާނެ ކަމަށް ބެލެވޭކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ބަންދު މީހުންނާ ގުޅޭ މައްސަލަތަކާ ގުޅޭގޮތުން ޖުޑީޝަލް ސަރވިސް ކޮމިޝަން (ޖޭއެސްސީ)ގެ މެމްބަރުންނާއި ޕީޖީ ހުސައިން ޝަމީމް ބައްދަލު ކުރައްވާފައިވާއިރު، ބުރާސްފަތި ދުވަހު ޕީޖީ ކުރެއްވި ޓްވީޓެއްގައި ވިދާޅުވީ، ވާނުވާގެ މައްސަލަ ޙައްލުކުރެވޭތޯ "އެކި ދޮރުތަކުގައި ޓަކި ޖައްސަވަމުން" ގެންދަވާ ކަމަށެވެ. އަދި އެކަމަށް ޙައްލެއް އަންނަންދެން މަސައްކަތް ކުރައްވާނެ ކަމަށް ޝަމީމް ވިދާޅުވިއެވެ.
ޝަމީމް އިތުރަށް ވިދާޅުވީ، ޖޭއެސްސީއާއެކު ބޭއްވި ބައްދަލުކުރެއްވުމުގައި އެކަމުގައި ކުރިއަށްދާނެ މަގުތަކެއް ފެނިފައިވާ ކަމަށެވެ. އަދި މާ ގިނަ ދުވަސްތަކެއް ނުވެ ނަތީޖާ ފެންނާނެ ކަމަށް ބެލެވޭކަމަށް ޝަމީމް ވިދާޅުވިއެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ޕީޖީ ވިދާޅުވީ، މި މައްސަލައިގައި ކްރިމިނަލް ކޯޓުގެ ބޭފުޅުންނާވެސް ބައްދަލު ކުރައްވާފައިވާނެ ކަމަށެވެ. އަދި އޭރު ވަކި ތާވަލެއްގެ ދަށުން އެފަދަ މައްސަލަތައް އަވަހަށް ކުރިއަށް ގެންދިއުމަށް އެއްބަސްވެވުނުކަން ޕީޖީ ފާހަގަ ކުރެއްވިއެވެ.
ޕީޖީ ވިދާޅުވީ، މި މައްސަލައިގައި އަލި މަގެއް ފެންނަންދެން ކެނޑިނޭޅި މަސައްކަތް ކުރައްވާނެ ކަމަށެވެ.
ކުށުގެ ތުހުމަތުގައި ހައްޔަރު ކޮށްފައިވާ މީހަކު ޝަރީއަތް ނިމެންދެން އޭނާ ބަންދުގައި ބަހައްޓަން ފަނޑިޔާރު ކޮށްފައިވާ އަމުރު، 30 ދުވަަހުން ޕްރޮސިކިއުޓަރ ޖެނެރަލް (ޕީޖީ) މުރާޖަޢާކުރަން ޖެހޭ ގޮތަށް ބަންޑާރަނައިބުގެ އޮފީހުން ވަނީ އިސްލާޙެއް ގެނެސްފައެވެ. އަދި ވަކި މައްސަލައެއްގައި ޝަރީޢަތް ނިމެންދެން ބަަންދުގައި ބަހައްޓަންޖެހޭ ސަބަަބެއް ނެތްކަމަށް ޕީޖީ އަށް ފެންނަ ހާލަތުގައި ޝަރީޢަތް ނިމެންދެން ބަންދުގައި ބެހެއްޓުމާއި އެކު ކޮށްފައިވާ އަމުރު ބާޠިލު ކުރުމަށް ކޯޓަށް ހުށައަޅަން ޖެހޭ ކަމަށް އެ އިސްލާހުގައިވެއެވެ.
އެއާއެކު، ބަންދުގައި ތިބި މީހުންގެ މައްސަލަތައް އަވަހަށް ނިންމައި ދިނުމަށް ޕީޖީ އޮފީހުން މީގެ ކުރިންވެސް ވަނީ ކޯޓުގައި އެދިފައެވެ. އަދި މިހާރު ބަންދުގައި ތިބި މީހުންގެ މައްސަލަތައް ވީހާވެސް އަވަހަށް ނިންމައިދިނުމަށް ޕީޖީ ވަނީ ހުށައަޅުއްވާފައެވެ.
