ގައިދީންނަށް އާއިލާއިން ފޮނުވާ ތަކެތި ކަރެކްޝަނަލް ސާރވިސްގެ ހެޑް އޮފީހުން ފޮނުވޭ ގޮތަށް ހަމަޖައްސާފައިވާއިރު މުޅި ޖުމްލަ ދޫކުރާނީ 20 ޓޯކަން ނަންބަރު ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ކަރެކްޝަންސްގެ މީޑިއާ އޮފިޝަލް އަހްމަދު ނަސީމް ވިދާޅުވީ ހެޑް އޮފީހުން ތަކެތި ބަލައިގަތުމަށް ހަމަޖެހިފައިވަނީ ކޮންމެ ހަފްތާއަކު ވެސް ހޮނިހިރު ދުވަހު ހެނދުނު 10ން 2ށް ކަމަށެވެ. ކުރިން ގައިދީންނަށް އާއިލާއިން ފޮނުވާ ތަކެތި މާލެ ޖަލުން ބަލައިގަތް ނަމަވެސް އެތަނުން ކޮވިޑުގެ ކޭސްތައް ފެނުމާއި ގުޅިގެން ހެޑް އޮފީހުން ތަކެތި ބަލައިގަނެވޭނެ އިންތިޒާމު ހަމަޖައްސާފައިވަނީ މިދިޔަ އޮގަސްޓް މަހުގެ 30 ވަނަ ދުވަހުން ފެށިގެންނެވެ.
ނަސީމް ވިދާޅުވީ އެހެންކަމުން މިހާރު މާލެ ޖަލުން ތަކެތި ބަލައި ނުގަންނާނެ ކަމަށެވެ. އަދި މި ހިދުމަތް ފޯރުކޮށްދިނުން މެދުނުކެނޑުމަށްޓަކައި ކަރެކްޝަންސްގެ ހެޑް އޮފީހުން ތަކެތި ބަލައިގަތުމަށް ކަރެކްޝަންސް އިން ނިންމި ކަމަށް އޭނާ ވިދާޅުވިއެވެ.
ޖަލުގައި ތިބޭ ޤައިދީންނާއި ބަންދުމީހުންނަށް ބޭނުންވާ އަންނައުނު ފޯރުކޮށްދިނުމުގެ އުސޫލެއް ކަރެކްޝަންސުން ވަނީ އެކުލަވާލާފައެވެ. މި އުސޫލު ބުނާ ގޮތުން ޤައިދީންނަށާއި ބަންދު މީހުންނަށް ފޯރުކޮށްދޭ އަންނައުނަކީ ބޭއަދަބީ ބަސްތަކާއި ފޮޓޯ ފަދަ ތަކެތި ލިޔެފައި ނުވަތަ ކުރަހާފައި ހުރެގެން ނުވާނެ ކަމަށް ބުނެފައިވެއެވެ.
އުސޫލުގެ ދަށުން އަންނައުނު ހަވާލު ކުރެވޭ އާއިލާގެ މެމްބަރުންނަކީ:
- އަނބިމީހާ / ފިރިމީހާ
- މަންމަ، ބައްޕަ / މާމާ އަދި ކާފަ
- މަންމަގެ ފިރިމީހާ، ބައްޕަގެ އަނބިމީހާ ނުވަތަ އަނބިން
- މައިދައިތަ އަދި ބަފައިބެ
- ދަރިން އަދި ދޮން ދަރިން، ދަނބި ދަރިން، ޅީ ދަރިން، ކާފަ ދަރިން އަދި މާމަ ދަރިން
- އެއްބަނޑު އެއްބަފާ މީހުން، އެއްބަފާ ނުވަތަ އެއްބަނޑު މީހުން
- ބޮޑުދައިތައިް އަދި ބޮޑުބޭބެއިން
- ޅިޔަނުން / ފަހަރިން
- ޝަރުޢީ ބަލަދުވެރިޔާ އަދި ބެލެނިވެރިޔާ
މީގެ އިތުރުން ކަރެކްޝަނުން ހުއްދަ ދީފައިވާ ފަރާތަކަށް ވެސް ތަކެތި ހަވާލު ކުރެވޭނެ ކަމަށް ވަނީ ބުނެފައެވެ.
ކަރެކްޝަނުން ހެޑް އޮފިހުން ތަކެތި ބަަލައިގަތުމަށް ނިންމާފައިވާއިރު މި ހާލަތުގައި ދޫކުރާ ޓޯކަން ނަންބަރުތައް މަދުވުން އެކަމުގެ ޝަކުވާ ވަރަށް ގިނަ އާންމުން އަންނަނީ ކުރަމުންނެވެ.
