އިންޒާރު ދީފައިވަނީ ދަރިންނާ ގުޅުވައިގެން
މެންބަރު އީވާ މަޖިލީހުގައި ވާހަކަ ދައްކަވަނީ
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަށް ވައިބަރ މެދުވެރިކޮށް އިންޒާރުގެ މެސެޖްތަކެއް ފޮނުވަން ފަށައިފިއެވެ. މެސެޖްތަކުގެ ސްކްރީން ޕްރިންޓާއިއެކު އީވާ ކުރެއްވި ޓްވިޓެއްގައި ވިދާޅުވީ އެއީ ދަރިންނާއި ގުޅުވައިގެން ދީފައިވާ އިންޒާރެއް ކަމަށެވެ. އަދި އެ މެސެޖްތައް އައިސްފައި މިވަނީ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓްގެ ކަންކަމަށް ކުޑަދުވަސްކޮޅަކަށް ވެފައި ވަނިކޮށްކަމަށްވެސް އީވާ ވިދާޅުވިއެވެ.
އީވާގެ ޓްވިޓާއި ގުޅިގެން މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވިދާޅުވީ ދަރިންނާއި އާއިލާއާއި ގުޅުވައިގެން އިންޒާރުތައް ދިނުމަކީ "ހުދުމުޚްތާރު ވެރިން" ނޫނީ ކުރާނެ ކަންތައްތަކެއް ނޫން ކަމުގައެވެ.
މި އިންޒާރުގެ މެސެޖްތަކާ ގުޅޭ ގޮތުން ރައްޔިތުންގެ މަޖިލީހުން އަދި ކަމާބެހޭ އެހެން މުއައްސަސާއަކުން ވެސް ބަހެއް ބުނެފައެއް ނެތެވެ.
