ސޮފްވާން ހާޒިރުނުވެއްޖެނަމަ ދައުވާކުރަން ފޮނުވަން ފުލުހުން ނިންމައިފި
7 ޖޫން 2017 | ބުދަ 16:45ޖޫން މަހުގެ އެއްވަނަ ދުވަހު ހާޒިރުވުމަށް ވެސް ވަނީ ޗިޓް ފޮނުވާފައި
ރައީސް މައުމޫންގެ ޕާސަނަލް އެސިސްޓެންޓް އަހުމަދު ސޮފްވާން
ކުރީގެ ރައީސް މައުމޫން އަބްދުﷲ ގައްޔޫމްގެ ޕާސަނަލް އެސިސްޓެންޓް އަހުމަދު ސޮފްވާން ހަތް ދުވަސް ތެރޭގައި ފުލުހަށް ހާޒިރުނުވެއްޖެނަމަ އޭނާގެ މައްޗަށް ދައުވާކުރަން ފޮނުވާން ނިންމާފައިވާ ކަމަށް ފުލުހުން ބުނެފި އެވެ.
ފުލުހުން ނެރުނު ބަޔާނެއްގައި ބުނެފައި ވަނީ ބުދަ ދުވަހުން ފެށިގެން ހަތް ދުވަސްތެރޭގައި ސޮފްވާން ފުލުހަށް ހާޒިރުވާން އަންގާކަމަށެވެ. އަދި މި މުއްދަތުގެ ތެރޭގައި ހާޒިރުނުވެއްޖެނަމަ ޗިޓަށް ހާޒިރު ނުވި މައްސަލައިގައި ސޮފްވާންގެ މައްޗަށް ދައުވާކުރަން ޕްރޮސެކިޓަރ ޖެނެރަލްގެ އޮފީހަށް ފޮނުވާނެ ކަމަށް ބަޔާނުގައި ބުނެފައެވެ.
ފުލުހުން ތަޙްގީގް ކުރަމުންދާ މައްސަލައަކާއި ގުޅިގެން ޖޫން މަހުގެ އެއްވަނަ ދުވަހަށް ސޮފްވާން ހާޒިރުވުމަށް މެއި މަހުގެ 25 ވަނަ ދުވަހު ވެސް ވަނީ ޗިޓްފޮނުވާފައެވެ.
މައުލޫމާތު ލިބިފައިވާ ގޮތުން ސޮފްވާން ހޯދަމުން ދަނީ ރައްޔިތުންގެ މަޖިލީހުގެ މެމްބަރުންނަން ރިޝްވަތުގެ ގޮތުގައި ފައިސާ ބެހުމާއި ފައިސާ ރައްކާކޮށްގެން ގެންގުޅުނު ކަމުގެ ތުޙުމަތުގައެވެ. ދެ ފަހަރު ފުލުހަށް ހާޒިރުވުމަށް ސޮފްވާނަން ޗިޓް ފޮނުވާއިރި، އޭނާ ހުރީ ރާއްޖެއިން ބޭރުގައެވެ.
ހޯމް މިނިސްޓްރީން މި މައްސަލާއި ގުޅުގެން މީގެ ކުރިން ނެރެފައިވާ ބަޔާނެއްގައި ބުނެފައިވަނީ ސޮފްވާން ތަހުގީގަށް ފިލައިގެން ބޭރުގައި އުޅެނީ ކުރީގެ ރައީސް މައުމޫން އަބްދުލް ގައްޔޫމްގެ އާއިލާގެ އެހީތެރިކަމާއެކު ކަމަށް މައުލޫމާތު ލިބިފައިވާ ކަމަށެވެ.
