ޖުޑީޝަލް ސަރވިސް ކޮމިޝަން (ޖޭއެސްސީ) ގެ ރައީސް އަދި މަޝްހޫރު ޤާނޫނީ ވަކީލު ހިސާން ހުސައިން އެންމެ ފުރަތަމަ ކޯޓަށް ވަޑައިގެން ވަކާލާތު ކުރެއްވި ދުވަހަކީ ޑްރަގް މައްސަލައެއްގައި 21 އަހަރުގެ ޒުވާނަކަށް 21 އަހަރުގެ ޖަލު ޙުކުމެއް އިއްވި ދުވަސް ކަމަށް ހިސާން ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީގެ "އިންސާފު" ޕްރޮގްރާމްގައި ވާހަކަ ދައްކަވަމުން ހިސާން ވަނީ ކެރިއަރގެ މުހިއްމު ވާހަކަތައް ހިއްސާ ކުރައްވާފައެވެ. އެގޮތުން އެންމެ ފުރަތަމަ ކޯޓަކަށް ވަޑައިގެން ވަކާލާތު ކުރެއްވި ދުވަހުގެ ތަޖުރިބާ ހިއްސާ ކުރައްވައި ހިސާން ވިދާޅުވީ، އޭރު މަސައްކަތް ކުރައްވަމުން ގެންދެވީ ބަންޑާރަ ނައިބުގެ އޮފީހުގައި ކަމަށެވެ. އަދި މަސައްކަތުގެ ގޮތުން ޖިނާއީ މައްސަލަތައް ތަމްސީލު ކުރުމާއި، ދައުލަތުން ދައުވާ ކުރާ މަދަނީ މައްސަލަތަކުގައި ވަކާލާތު ކުރަން ވަޑައިގަންނަވަން ޖެހޭކަން ހިސާން ފާހަގަ ކުރެއްވިއެވެ.
ހިސާން ވިދާޅުވީ، އެންމެ ފުރަތަމަ ކޯޓަށް ވަޑައިގެން ވަކާލާތު ކުރެއްވީ މަސްތުވާތަކެއްޗާ ގުޅޭ މައްސަލައެއްގައި ކަމަށެވެ. އެގޮތުން އެ ދުވަހަކީ މައްސަލައިގައި ދައުވާ ލިބޭ 21 އަހަރުގެ ޒުވާނަކަށް 21 އަހަރުގެ ޖަލު ޙުކުމެއް އިއްވިގެން ދިޔަ ދުވަހެއްކަން ފާހަގަ ކުރައްވައި ހިސާން ވިދާޅުވީ، ޖިނާއީ އަދުލުގެ ނިޒާމުގައި ހުރި ބޮޑެތި މައްސަލަތަކެއް އެ ދުވަހު ވެސް ފާހަގަ ކުރެވިގެން ދިޔަ ކަމަށެވެ.
އެގޮތުން އޭރު މަސްތުވާތަކެތީގެ މައްސަލަތަކުގައި އަމަލު ކުރަމުން ދިޔަ ޤާނޫނީ އުސޫލުގެ ސަބަބުން ޖިނާއީ އަދުލުގެ ނިޒާމުގެ ތެރޭގައި ކުދިން "ބަނދެވިގެން" ތިބެން ޖެހުމުގެ ކަންބޮޑުވުން ހިސާން ފާހަގަ ކުރެއްވިއެވެ.
އެދުވަހު އަޅުގަނޑު ކޯޓަށް ދިޔައީ ޙުކުމް ކުރަން އޮތް ދުވަހު، ގޮސް އޭނާގެ މައްޗަށް ޙުކުމް އިއްވުނު ވަގުތު އެ ކުރެވުނު އިހުސާސް އަޅުގަނޑަކަށް ހިއެއްނުވޭ ދުވަހަކުވެސް ހަނދާނުން ފިލާނެހެން، އެއްކަމަކަށް އަޅުގަނޑަށް ވަރަށް ބޮޑަށް އިހުސާސް ކުރެވުނު ވަރަށް "އަންފެއަރ" ޕްރޮސެސްއެއްގެ ތެރެއިންކަން މި ދެވެނީ، ޑްރަގް މައްސަލައެއްގައި އޭނާގެ އެޑިކްޝަންއެއް އޭނާއަކަށް ކިޔޯރ ނުކުރެވިގެން އޭނާ ރިހެބިލިޓޭޝަން ޕްރޮގްރާމުން ފޮނުވާފައި އެ ޕްރޮގްރާމް ފުރިހަމަ ނުކުރެވިގެން ދެވަނަ ފަހަރަށް މައްސަލަ ހުށައެޅި، 3 ވަނަ ފަހަރު ޙުކުމް ކުރި ދުވަހެއް އެއީ، އޭނާގެ މައްޗަށް އައި ޖުމުލަ 21 އަހަރުގެ ޙުކުމެއް، އެވަގުތު އޭނައަށް ވީ ގޮތާއި، އަދި އެއަށްފަހު އޭނާ ޝަރީއަތުގެ މަޖިލީހުން ނުކުމެގެން އައިސް އާއިލާއަށް ގުޅައި، ފޯނުކުރި މަންޒަރުވެސް އަޅުގަނޑަށް ފެނުނު، ވަރަށް ހިތްދަތި އިހުސާސްތަކެއް ކުރެވުނު ދުވަހެއް އެއީ، އެ ދުވަހު އަޅުގަނޑަށް ވަރަށް ބޮޑަށް ރިއަލައިޒްވި ޑްރަގް މައްސަލަތަކުގައި އޭރު މި އަމަލުކުރަމުން ދިޔަ ޤާނޫނީ އުސޫލުތަކުން މީހުންނަށް ލިބޭ ހިތްދަތިކަމާއި، އެއިން އަރައިނުގަނެވި ޖިނާއީ އަދުލުގެ ނިޒާމުގެ ތެރޭގައި އޭނާ އުޅެން ޖެހޭ މިންވަރުޤާނޫނީ ވަކީލު އުސްތާޛާ ހިސާން ހުސައިން
ޕްރޮގްރާމްގައި ވާހަކަ ދައްކަވަމުން ހިސާން ވިދާޅުވީ، ކުރިން ވަކާލާތު ކުރެއްވި ބައެއް ކޭސްތަކާ ގުޅިގެން ބޮޑެތި "ޕްރެޝަރ"ތަކާ ކުރިމަތިލާން ޖެހުނު ކަމަށެވެ. އަދި އޭރު ދައުލަތުގެ މުއައްސަސާތަކުގެ ނިޒާމުގެ ތެރެއިން ބޮޑެތި ގޮންޖެހުންތަކެއް ކުރިމަތިވިކަން ފާހަގަ ކުރައްވައި ހިސާން ވިދާޅުވީ، އޭރު ބޮޑެތި ގޮންޖެހުންތަކާއި، އިންޒާރުތައް ވެސް ލިބިވަޑައިގަތް ކަމަށެވެ. އެގޮތުން ބިރު ދެއްކުމާއި، މަސައްކަތް ހުއްޓުވުމަށް ދިމާވި ގޮންޖެހުންތަކުގެ އިތުރުން، ހައްޔަރު ކުރާނެ ކަމުގެ އިންޒާރު ވެސް ތަކުރާރުކޮށް ލިބެމުން ދިޔަކަން ހިސާން ފާހަގަ ކުރެއްވިއެވެ. ނަމަވެސް އެއީ ސީދާ ކޮން މައްސަލައަކާ ގުޅިގެން ލިބިވަޑައިގަތް އިންޒާރުތަކެއްކަން ހިސާން ވިދާޅެއް ނުވެއެވެ.
ހިސާން އެހެން ވިދާޅުވެފައިވާއިރު، ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ މައްޗަށް ނުޙައްޤުން އިއްވާފައިވާ 13 އަހަރުގެ ޖަލު ހުކުމް މުރާޖައާ ކޮށްދިނުމަށް އެދި، ދައުލަތުގެ ފަރާތުން ސުޕްރީމް ކޯޓަށް ހުށަހެޅި މައްސަލައިގައި ހިސާން ވަނީ ވަކާލާތު ކޮށްދެއްވާފައެވެ. އަދި ރައީސް ނަޝީދުގެ މައްޗަށް އިއްވި ދައުވާ އަކީ ބާތިލް ދައުވާ އެއްކަން އޭރު ކޯޓުން ނިންމުމާއި ގުޅިގެން ރައީސް ނަޝީދު ވަނީ މިނިވަން ވެވަޑައިގެންފައެވެ.
އޭގެ އިތުރުން، ނިމިދިޔަ ރިޔާސީ އިންތިހާބު ބާތިލް ކުރުމަށް ކުރީގެ ރައީސް އަބްދުﷲ ޔާމީން ހުށަހެޅުއްވި މައްސަލައިގައި ވެސް ހިސާން ވަނީ އޭރުގެ އިދިކޮޅު ސިޔާސީ ޕާޓީތަކުގެ ވަކީލުންގެ ޓީމުގެ އިސް ވަކީލުކަން ކުރައްވާފައެވެ. އަދި މި މައްސަލަ ވެސް އޭރު ވަނީ ކާމިޔާބު ކުރައްވާފައެވެ.
