ސީއެސްސީ އަށް ހަތަރު މެމްބަރަކު އައްޔަންކޮށްފި
ރުހުންދިނީ 31 ގައި ބޭއްވި ޖަލްސާގައި
ސީއެސްސީ އަށް އައްޔަން ކުރެއްވި ހަތަރު މެމްބަރުން ރައީސް ސޯލިހު ކުރިފުޅުމަތީގައި ހުވާކުރައްވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ސިވިލް ސަރވިސް ކޮމިޝަން (ސީއެސްސީ) ގެ މެންބަރު ކަމަށް ހަތަރު ބޭފުޅަކު އައްޔަން ކުރައްވައިފިއެވެ.
ބުރާސްފަތި ދުވަހު މެންދުރު ރައީސް އޮފީހުގައި ބޭއްވި ރަސްމިއްޔާތެއްގައި ސީއެސްސީ އަށް އައްޔަން ކުރައްވާފައިވާ ހަތަރު ބޭފުޅުންނަކީ ގދ. ތިނަދޫ މާކޯޅި، ފާތިމަތު ޝަރީފާއި، ރ. މީދޫ ބްލެކް، އިބްރާހީމް ރަޝީދާއި، ހ. ޓޫހާޓްސް، މުހައްމަދު ފަރުޝަތާއި، މ. ފަލްކަންގެ، މުހައްމަދު ނާސިހެވެ.
ސިއެސްސީގެ މެންބަރު ކަމަށް މި ހަތަރު ބޭފުޅުން އައްޔަން ކުރައްވަން ފެނިވަޑައިގަންނަވާ ކަމަށް ރައްޔިތުންގެ މަޖިލީހުން ފާސްކޮށްފައިވަނީ ހޯމަ ދުވަހު ބޭއްވި ޖަލްސާގައެވެ. ކޮމިޝަންގެ މެންބަރު ކަމަށް އައްޔަން ކުރެއްވުމުގެ ކުރިން، މި ހަތަރު ބޭފުޅުން ވެސް ކޮމިޝަންގެ މެންބަރުކަމުގެ ހުވައި، ރައީސްގެ ކުރިފުޅުމަތީގައި ކުރެއްވިއެވެ. އެ މެންބަރުންނަށް ހުވައި ލައިދެއްވީ، ސުޕްރީމް ކޯޓުގެ ފަނޑިޔާރު އާއިޝާ ޝުޖޫން މުހައްމަދެވެ. އަދި، ސީއެސްސީގެ މެންބަރު ކަމަށް އައްޔަން ކުރެއްވި ކަމުގެ ލިޔުން، ރައީސް މި ރަސްމިއްޔާތުގައި ހަތަރު ބޭފުޅުންނާއި ހަވާލު ކުރެއްވިއެވެ.
ސީއެސްސީގެ ހަތރު މަގާމު ހުސްވީ މިނިވަން މުއައްސަސާތަކާއި ބެހޭ ކޮމިޓީން ސީއެސްސީގެ ހަތަރު މެމްބަރަކު ވަކި ކުރުމަށް ނިންމާ މަޖިލީހުގެ ތަޅުމަށް ފޮނުވުމާއި ގުޅިގެން ތިން މެމްބަރަކު އިސްތިއުފާ ދެއްވާ، އެއް މެމްބަރަކު މަގާމުން ވަކި ކުރުމަށް މަޖިލީހުން ފާސްކުރުމާއި ގުޅިގެންނެވެ. މަގާމުން ވަކި ކުރުމަށް ތަޅުމަށް ނަން ފޮނުވުމުން އިސްތިއުފާ ދެއްވީ ކޮމިޝަންގެ ރައީސް ކަމުގައި ހުންނެވި ޑރ. އަލީ ޝަމީމާއި، ނައިބު ރައީސް ކަމުގައި ހުންނެވި ޝަހީދު މުޙައްމަދުގެ އިތުރުން މެމްބަރު ޒަކަރިއްޔާ ހުސައިން އެވެ. އެ ކޮމިޝަންގެ މެމްބަރުކަމުން ވަކިކޮށްފައިވަނީ ކޮމިޝަންގެ މެމްބަރު އިބްރާހީމް ޝަހީޤެވެ.
ސީއެސްސީގެ ރައީސް ޑރ. އަލީ ޝަމީމާއި، ނާއިބު ރައީސް ޝަހީދު މުހައްމަދާއި މެމްބަރު ޒަކަރިއްޔާ ހުސައިނާއި މެމްބަރު އިބްރާހީމް ޝަހީޤާ ގުޅޭގޮތުން މިނިވަން މުއައްސަސާތަކާބެހޭ ކޮމިޓީން ބަލާފައި ވަނީ މައިގަނޑު 5 މައްސަލައެކެވެ. އޭގެ ތެރޭގައި ހިމެނެނީ ސީއެސްސީގެ މުވައްޒަފުން ވަޒީފާއިން ވަކިކުރުމުގައި ގެންގުޅެފައިވާ ނާއިންސާފު ގޮތްތަކުގެ މައްސަލަތަކާއި، އޮފީސްތަކުގެ ބައެއް ޕާމަނަންޓް ސެކެޓްރީން އައްޔަން ކުރުމުގައި ނުފޫޒުގެ ބޭނުންކުރުމާއި، ކޮމިޝަނުގެ ބައެއް މަގާމުތަކަށް މުވައްޒަފުން ނެގުމުގައި އަމަލު ކޮށްފައިވާ ގޮތާއި، ކޮމިޝަންގެ މެމްބަރުންގެ މެދުގައި ހުރި މައްސަަލަތަކެވެ.
