ޕްރަނާބް މުކަރްޖީގެ ތައުޒިޔާގެ ދަފްތަރުގައި މިނިސްޓަރު ޝާހިދު ސޮއި ކުރައްވައިފި
އާއިލާ އަށް މިނިސްޓަރު ތައުޒިޔާ ފޮނުއްވެވި
މިނިސްޓަރު ޝާހިދު، ޕްރަނާބް މުކަރްޖީގެ ތައުޒިޔާގެ ދަފްތަރުގައި ސޮއިކުރައްވަނީ
އިންޑިއާގެ ކުރީގެ ރައީސް ޕްރަނާބް މުކަރްޖީ އަވަހަރާވުމާ ގުޅިގެން މާލޭގައި ހުންނަ އިންޑިއާގެ ހައިކޮމިޝަން ގައި ހުޅުވާފައިވާ ތައުޒިޔާގެ ދަފްތަރުގައި ފޮރިން މިނިސްޓަރު އަބްދުﷲ ޝާހިދު ސޮއި ކުރައްވައިފިއެވެ.
ބުރާސްފަތި ދުވަހު ތައުޒިޔާގެ ދަފްތަރުގައި ޝާހިދު ލިޔުއްވި މެސެޖްގައި، އިންޑިއާގެ 13 ވަނަ ރައީސް ޕްރަނާބް މުކަރްޖީ އަވަހާރަވި ޚަބަރު އެއްސެވީ ފުން ހިތާމަޔާއެކުގައި ކަމަށް ވިދާޅުވިއެވެ. އަދި ރައީސް މުކަރްޖީ އިންޑިއާގެ ހާރިޖީ ވަޒީރުކަމުގައި ހޭދަކުރެއްވި ދުވަސްތަކުގައި ޝާހިދު ވެސް ރާއްޖޭގެ ހާރިޖީ ވަޒީރުކަމުގައި ހުންނަވައި، ދެބޭފުޅުން އެކުގައި ގިނަ މަސައްކަތްތަކެއް ކުރެއްވުމުގެ އުފާ ލިބިވަޑައިގެންނެވި ކަމަށް ވިދާޅުވިއެވެ. އަދި 2007 ވަނަ އަހަރު އޮކްޓޫބަރު މަހު އިންޑިއާއަށް ކުރެއްވި ދަތުރުފުޅުގައި މަރުޙަބާ ދެންނެވީ ރައީސް މުކަރްޖީކަން ވެސް ފޮރިން މިނިސްޓަރު ފާހަގަކުރެއްވިއެވެ.
އިންޑިއާ އަށް ކުރިމަތިވެފައިވާ ގައުމީ ހިތާމައިގެ މި ދަނޑިވަޅުގައި އިންޑިއާގެ ސަރުކާރާއި ރައްޔިތުންނާއި އަދި ރައީސް ޕްރަނާބް މުކަރްޖީގެ އާއިލާއަށް މިނިސްޓަރ ވަނީ ތައުޒިޔާ ފޮނުއްވާފައެވެ.
ރައީސް އިބްރާހިމް މުހައްމަދު ސޯލިހުވެސް ވަނީ ޕްރަނާބް މުކަރްޖީ އަވަހާރަވުމާއި ގުޅިގެން ތައުޒިޔާގެ މެސެޖެއް ފޮނުއްވާފައެވެ. އިންޑިއާގެ 13 ވަނަ ރައީސްކަން ކުރެއްވި ޕްރަނާބް މުކަރްޖީ އަވަހާރަވީ ހުސްވި އޮގަސްޓު މަހުގެ 31 ގައި ކޮވިޑް-19 ގެ އާލާސް ކަންފުޅުގައެވެ. އިންޑިއާގެ ފިނޭންސް މިނިސްޓަރު ކަމުގެ އިތުރުން ފޮރިން މިނިސްޓަރު ކަން ވެސް ކުރައްވާފައިވާ މުކަރްޖީ އަވަހާރަވީ އުމުރުފުޅުން 84 އަަހަރުފުޅުގައެވެ. އެމަނިކުފާނުގެ ޖަނާޒާ ބާއްވާފައިވަނީ މި މަހުގެ އެއްވަނަ ދުވަހު ރަސްމީ އިއްޒަތުގައެވެ.
