ވަޒީފާ ދީގެން އެމްޑީޕީ ކެނޑިޑޭޓުންގެ ނަން އަނބުރާ ގެންދޭތޯ މަސައްކަތްކުރި: ޝިފާޒް

އެމްޑީޕީގެ ޓިކެޓްގައި ކުރިއަށް އޮތް ލޯކަލް ކައުންސިލް އިންތިޚާބަށް ވާދަކުރާ ކެނޑިޑޭޓުންގެ ނަން އަނބުރާ ގެންދޭތޯ ރައީސް ޔާމީންގެ ސަރުކާރުން ވަޒީފާގެ ފުރުސަތު ހުޅުވާލި ކަމަށް އެމްޑީޕީގެ ނައިބު ރައީސް މުހައްމަދު ޝިފާޒް ވިދާޅުވެއްޖެއެވެ.

ޝިފާޒް މިހެން ވިދާޅުވީ އެމްޑީޕީން ތ އަތޮޅު ވިލުފުށީގައި ހޮނިހިރު ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުންނެވެ.

Advertisement

ޝިފާޒް ވިދާޅުވީ ކުރިއަށް މިއޮތް އިންތިޚާބުގައި 500 އެއްހާ ކެނޑިޑޭޓުން އެމްޑީޕީން ވާދަކުރަން ނިންމުމާއެކު އެ ކެނޑިޑޭޓުންގެ ނަން އަނބުރާ ގެންދާނެ ގޮތެއް ހޯދުމުގެ މަސައްކަތް ކުރަމުން ދިޔަ ކަމަށާއި އެއްގޮތަކީ އެމީހުންނަށް ވަޒީފާއެއް ދީގެން ނަން އަނބުރާ ގެންދޭތޯ މަސައްކަތް ކުރުން ކަމަށެވެ. އެގޮތުން ހުރިހާ ރަށަކަށްވެސް ރައީސް ޔާމީންގެ ފެކްޝަނުން ގުޅިކަމަށާއި އެހެންނަމަވެސް އެކަން އެގޮތަށް ކުރެވިފައި ނުވާ ކަމަށެވެ.

އެހެން ނުކުރެވުމުން ޝިފާޒް ވިދާޅުވިގޮތުގައި ދެން ފެއްޓެވީ ތަފާތު ނުހައްގު އިލްޒާމްތައް އަޅުވާ ނާއިންސާފް ޝަރީޢަތް ހިންގައިގެން ކެނޑިޑޭޓަކު ފްރޭމް ކުރުމުގެ މަސައްކަތް ކުރަން ކަމަށެވެ.

"އަޅުގަނޑުމެން ތެރެއަކުން ނުފެނުނު އެއިން ވަޒީފާއެއްގެ ބޭނުމުގައި ނަން އަނބުރާ ނަގާނެ ކެނޑިޑޭޓެއް. ދެން ކުރިމަތި ކުރުވީ މުޅިން އެހެން ކަމެއް. އެމީހުންގެ ބޮލުގައި ނުހައްގު އިލްޒާމްތައް އަޅުވައިގެން ނާއިންސާފް ޝަރީއަތެއް ހިންގައިގެން ހުކުމެއްކޮށްގެން އަދަބެއް ދިނުން ނޫންނަމަ ފްރޭމް ކުރުން،" ޝިފާޒް ވިދާޅުވިއެވެ.

ޝިފާޒް ވިދާޅުވީ ލާމަރުކަޒީ ނިޒާމް ގެނައުމަށް ކުރާ މަސައްކަތް ހުއްޓަވާ ނުލައްވާނެކަމަށާއި ރާއްޖޭގެ ކޮންމެ ރަށަކަށް ދިއުމުންވެސް ފެންނަ އެއް ހަޤީގަތަކީ ރާއްޖޭގެ ރައްޔިތުން މި ސަރުކާރަށް ނޭދޭކަން ކަމަށެވެ.

ޝިފާޒް ވިދާޅުވީ ރައީސް މައުމޫނަށް ތާއީދު ކުރާ ކެނޑިޑޭޓުން ކުރިމަތިލުމުން އެފޯމްތައް ރިޖެކްޓްކޮށް ރައީސް ޔާމީންގެ ދަރުބާރު ފެކްޝަންގެ މީހުންނަށް ޓިކެޓް ދިން ކަމަށާއި ނަމަވެސް އެމީހުންނަކަށް ރަށްރަށުން ތާއީދު ނުކުރާ ކަމަށެވެ.

"އެވާހަކަތައް އަޅުގަނޑުމެން ދައްކާތީ ރައީސް ޔާމީން މިއިންތިޚާބު ނުބާއްވަން މިއުޅެނީ. ކޮންމެފަދަ ހާލަތެއްގައި ކޮންމެ ދުވަހަކުން ބޭއްވިއަސް ލޮނދި ހިކައެއް ދަމާލާހެން މިއިންތިޚާބު ކާމިޔާބު ކުރާނަން" ޝިފާޒް ވިދާޅުވިއެވެ.