އަފްޣާނިސްތާނާއި ޠާލިބާނާ ދެމެދު ސުލްހައިގެ ވާހަކަތައް ކުރިޔަށް ގެންދިޔުމަށް މަގުފަހި ކުރުމުގެ ގޮތުން އަފްޣާނިސްތާނު ޖަލުތަކުގައި ތިބި ޠާލިބާންގެ 200 އެއްހާ ގައިދީން މިނިވަން ކޮށްފައިވާ ކަމަށް އެ ގައުމުގެ އޮފިޝަލަކު ވިދާޅުވެއްޖެއެވެ.

އަފްޣާނިސްތާނާއި ޠާލިބާނުންގެ މެދުގައި ހިނގަމުންދާ ހަމަލާ ބަދަލުކުރުންތައް ހުއްޓާލާ ސުލްހައިގެ ވާހަކަތައް އިތުރަށް ކުރިޔަށް ގެންދިޔުމަށް މިވަގުތު އެޅިފައިވާ ހުރަހަކީ އަފްޣާނިސްތާނުގެ ޖަލުތަކުގައި ތިބި 400 ހާޑްކޯރ ތާލިބާނުން އަފްޣާނިސްތާނު ސަރުކާރުން މިނިވަން ނުކުރުމެވެ.

ޖަލުން މިނިވަން ކުރި 200 ތާލިބާނުންނަކީ ކާބުލްގެ މައި ޖަލުގައި ތިބި ގައިދީންތަކެއް ކަމަށާއި އެމީހުން މިނިވަން ކޮށްފައިވަނީ ހޯމަ ދުވަހާއި އަންގާރަ ދުވަހު ކަމަށް އޮފިޝަލު ވިދާޅުވިއެވެ. އަދި ހަމައެއާއެކު ޠާލިބާނުން ހައްޔަރުކޮށްގެން ގެންގުޅޭ އަފްޣާން ގެ ސްޕެޝަލް ފޯސްގެ ހަ މީހަކުވެސް ޠާލިބާނުން މިނިވަން ކޮށްފައިވާ ކަމަށް އޮފިޝަލް ވިދާޅުވިއެވެ.

އަފްޣާނިސްތާނުގެ ސީނިއަރ އޮފިޝަލަކު ވިދާޅުވެފައިވަނީ ގައިދީން ބަދަލުކުރުމުގެ ކަންކަން ވީ އެންމެ އަވަހަކަށް ނިންމާ ސުލްހައިގެ ވާހަކަތައް ފަށަން ބޭނުންވާ ކަމަށެވެ.

ގައިދީން ބަދަލުކުރުމުގެ މި މަސައްކަތް ވަރަށް އަވަހަށް ނިމޭނެ ކަމަށް މީޑިޔާ ރިޕޯޓްތައް ބުނެއެވެ.

400 ގައިދީންނަކީ މިއަހަރުގެ ފެބްރުއަރީ މަހު އެމެރިކާ އާއި ޠާލިބާނާ ދެމެދު ވެވުނު ސުލްހައިގެ އެއްބަސްވުމުގެ ދަށުން ދޫކޮށްލަންޖެހޭ 5000 ގައިދީންގެ ތެރެއިން މިހާރު ބާކީތިބި ގައިދީންނެވެ. އެމީހުން ދޫކޮށްލުމަކީ އަފްޣާނިސްތާން ސަރުކާރާއި ޠާލިބާނާ ދެމެދު ސުލްހައިގެ ވާހަކަތައް ފެށުމަށް ޝަރުތުކޮށްފައިވާ ކަމެކެވެ.

އަފްޣާނިސްތާނުގެ ސަރުކާރުން ވަނީ މި 400 ޠާލިބާނުން މިނިވަން ކުރުމަށް ފަސްޖެހިފައެވެ. އެއީ ނުރައްކާތެރި ހަމަލާތަކެއް ދިނިމުގެ ފަހަތުގައި މި މީހުން ތިބި ކަމަށް ބުނެއެވެ.

ގައިދީން މިނިވަން ކޮށްފައި މިވަނީ ތާލިބާނުން އަފްޣާނިސްތާނުގެ އަސްކަރިއްޔާއަށް ދޭ ހަމަލާތައް އިތުރުވެފައި ވަނިކޮށެވެ.

ފެބްރުއަރީ މަހު އެމެރިކާ އާއި ޠާލިބާނާ ދެމެދު ހަމަލާ ބަދަލު ކުރުން ހުއްޓާލުމަށް އެއްބަސްވި ފަހުން މިހާތަނަށް އައިއިރު އަފްޣާނިސްތާނުގެ ސިފައިންނާއި އާންމުން ހިމެނޭ ގޮތަށް ހާހެއްހާ މީހުން ޠާލިބާނުން ދިން ހަމަލާތަކުގައި މަރުވެފައިވާ ކަމަށް އދ އާއި އެގައުމުގެ ސަރުކާރުން ނެރެފައިވާ ތަފާސްހިސާބުތަކުން ދައްކައެވެ.