ސްޓޫޑަންޓް ލޯނު އަނބުރާ ދެއްކުން އަންނަ އަހަރަށް ފަސްކޮށްފި

ސްޓޫޑަންޓް ލޯނު އަނބުރާ ދެއްކުން، ސެޕްޓެމްބަރގެ ނިޔަލަށް އިތުރު ކޮށްފައިވާ ކުރުން 2020 ވަނަ އަހަރުގެ ނިޔަލަށް ފަސްކޮށްފިއެވެ.

މިނިސްޓްރީ އޮފް ހަޔަރ އެޑިއުކޭޝަނުން ބުނީ އެގޮތަށް ނިންމީ ކޯވިޑް19 ގެ ބަލިކަމުގެ މިހާލަތުގައި ގިނަ ފަރާތްތަކެއްގެ އާމްދަނީއަށް އަސަރުކޮށްފައިވުމާއިއެކު، އާއްމު ހާލަތަށް ރުޖޫއަވުމަށް ވަގުތުނަގާނެ ކަމަށް ބެލެވޭތީ ކަމަށެވެ. އެގޮތުން ސަރުކާރުގެ މި ނިންމުމާއި ގުޅިގެން ބޭންކް އޮފް މޯލްޑިވްސް އާއި ބޭންކް އޮފް ސިލޯން ދަރިވަރުން ނަގާފައިވާ ނޭޝަނަލް ސްޓޭންޑަންޓް ލޯނު ސްކީމްގެ ލޯނުތަކާއި އެޑިޔުކޭޝަން އެސިސްޓަންސް ލޯނު ސްކީމްގެ ލޯނުތަކުގެ އިތުރުން މީރާއަށް ލޯނުރީޕޭމަންޓް ދައްކާ ގޮތަށް ހަމަޖެހިފައިވާ ލޯނުތައް އަނބުރާ ދައްކަންޖެހިފައިވާ ފަރާތްތަކާއި ލޯނު ސްކީމްގެ ދަށުން ނަގާފައިވާ ލޯނުތައް ދައްކަމުންދާ ފަރާތްތަކުން 2020 ވަނަ އަހަރުގެ ޑިސެމްބަރ މަހުގެ ނިޔަލަށް ލޯނު އަނބުރާ ދެއްކުން ފަސް ކުރެވިފައިވާ ކަމަށެވެ. އަދި މި މުއްދަތުގެ ތެރޭގައި ސްޓޫޑަންޓް ލޯނު ރީޕޭމަންޓްގެ އެއްވެސް ފައިސާއެއް ދައްކާކަށް ނުޖެހޭނެ ކަމަށް މިނިސްޓްރީން ބުންޏެވެ.

ހަޔަރ އެޑިއުކޭޝަނުން ބުނި ގޮތުގައި ލޯނު ދައްކާ ޚަލާސްކުރަން މިހާރު އެގްރިމެންޓްކޮށްފައިވާ މުއްދަތަށް އެގްރިމަންޓް ބަދަލު ކުރުމަކާ ނުލާ ޑިސެމްބަރ 2020 ގެ ނިޔަލަށް މުއްދަތު އިތުރު ކުރެވިގެންދާނެއެވެ. އަދި މަހުން މަހަށް ދައްކަމުންދާ އަދަދަށް ބަދަލެއް ނާންނާނެ ކަމަށް ވެސް މިނިސްޓްރީން ބުންޏެވެ.

ހަޔަރ އެޑިއުކޭޝަން މިނިސްޓްރީގެ ތަފާސް ހިސާބުތައް ދައްކާ ގޮތުން މަތީ ތައުލީމުގެ އެކި ފުރުސަތުތައް ފަހިކޮށްދޭން ޖުލައި މަހުގެ ނިޔަލަށް 340 މިލިއަނަށް ވުރެ ގިނަ ރުފިޔާ ހަރަދު ކޮށްފައިވެއެވެ. އޭގެތެރެއިން ހިލޭ ޑިގްރީ ކިޔަވައިދިނުމުގެ ޕްރޮގްރާމަށް 135.7 މިލިއަން ރުފިޔާ ހަރަދު ކޮށްފައިވެއެވެ.