ޙައްޖަށް ގެންދިޔުމަށްޓަަކައި ރަޖިސްޓްރޭޝަން ފީ ދެއްކި ކުންފުނިތަކަށް އަނބުރާ އެފައިސާ ދޭން ނިންމައިފި

1441 ވަނަ އަހަރު ރާއްޖެއިން ޙައްޖަށް މީހުން ގެންދިޔުމަށްޓަކައި ރަޖިސްޓްރޭޝަން ފީ ދެއްކި ކުންފުނިތަކަށް އެ ފައިސާ އަނބުރާ ދިނުމަށް އިސްލާމިކް މިނިސްޓްރީން ނިންމައިފިއެވެ.

އިސްލާމިކް މިނިސްޓްރީގެ މީޑިއާ އޮފިޝަލް ބުދަ ދުވަހު "ރާއްޖެއެމްވީ"އަށް ވިދާޅުވީ، 1441 ވަނަ އަހަރު ރާއްޖެއިން ޙައްޖަށް މީހުން ގެންދިޔުމަށްޓަކައި ޕްރޮޕޯސަލް ހުށައެޅުމަށް ރަޖިސްޓްރޭޝަން ފީ ދެއްކި ކުންފުނިތަކަށް އެ ފައިސާ އަނބުރާ ދިނުމަށް އެމިނިސްޓްރީން ނިންމާފައިވާ ކަމަށެވެ. އެގޮތުން، 1441 ވަނަ އަހަރު ރާޢްޖެއިން މީހުން ޙައްޖަށް ގެންދިޔުމަށްޓަކައި 18 ކުންފުންޔަކުން ޕްރޮޕޯސަލް ރަޖިސްޓްރޭޝަން ފީ ދައްކާފައިވާކަމަށާއި އެއިން ކޮންމެ ކުންފުންޏަކުން 10،000ރ ފީގެ ގޮތުގައި ދައްކާފައިވާ ކަމަށެވެ.

އިސްލާމިކް މިނިސްޓްރީން ބުނީ، ރަޖިސްޓްރޭޝަން ފީ ދެއްކި ކުންފުނިތަކަށް އަނބުރާ އެ ފައިސާ ލިބިދިނުމަށް ޢަމަލު ކުރާނެ ގޮތްތައް އެ ކުންފުނިތަކަށް އަންގަމުންދާނެ ކަމަށެވެ.

އިސްލާމިކް މިނިސްޓްރީން، އެފައިސާ ދޭން ނިންމާފައިވާއިރު، މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރޯގާގެ ސަބަބުން، ހައްޖުގެ އަޅުކަން އަދާކުރުމަށް ދިއުމުގެ ފުރުސަތު ސައުދީ އަރަބިޔާގައި ތިބި މީހުންނަށް ފިޔަވައި އިތުރު އެއްވެސް ގައުމަށް ލިބިފައެއް ނުވެއެވެ.

ކޮވިޑް-19 ރޯގާގެ ސަބަބުން، 1441 ވަނަ އަހަރުގެ ޙައްޖުގެ އަޅުކަން އަދާކުރުމުގެ ފުރުސަތު ސައުދީ އަރަބިޔާއިން ދީފައިވަނީ، އެގައުމުގައި ދިރިއުޅޭ އެހެން ޤައުމުތަކުގެ މީހުންނާއި އެ ޤައުމުގެ މަދު ބަޔަކަށެވެ. އެގޮތުން 1441 ވަނަ އަހަރުގެ ހައްޖުގެ އަޅުކަން އަދާކުރުމުގެ ފުރުސަތު ލިބިފައިވަނީ 10،000 މީހުންނަށެވެ.

ކޮވިޑް-19 ރޯގާއިން ރައްކާތެރިވުމަށް އަޅާފައިވާ ވަރުގަދަ ފިވަޅުތަކާއެކު 1441 ވަނަ އަހަރުގެ ހައްޖުގެ އަޅުކަން މިހާރު ވަނީ ނިމިފަ އެވެ.

ކޮންމެ އަހަރަކުވެސް ޙައްޖުގެ މަތިވެރި އަޅުކަން ޢަދާކުރުމަށް އެކި ޤައުމުތަކުން ދެ މިލިޔަނަށްވުރެ ގިނަ މީހުން ދާއިރު ރާއްޖެއިންވެސް ދެހާހެއްހާ މީހުން ޙައްޖުގެ އަޅުކަން އަދާކުރުމަށް ދެއެވެ. އަދި ސަޢުދީއަ ރައްބިއްޔާއިން ކޮންމެ އަހަރަކުވެސް ރާއްޖެއަށް ރަސްމީ ކޯޓާގެ ތެރެއިން 1000 ކޯޓާދެއެވެ. އަދި ބައެއްފަހަރު ކޯޓާ އިތުރުވެސް ކޮށްދެއެވެ. މި ގޮތުން މިދިޔަ 1440 ވަނަ އަހަރުވެސް ރާއްޖެއިން 2000 މީހުން ވަނީ ހައްޖަށް ގޮސްފައެވެ.