އޮކްޓޯބަރ މަހު 15ން ފެށިގެން ގެސްޓް ހައުސްތައް ހުޅުވާލަނީ

ކޮވިޑް-19 ގެ ސަބަބުން ހުއްޓުމަކަށް އައިސްފައިވާ ގެސްޓްހައުސް ވިޔަފާރިތައް އަންނަ އޮކްޓޯބަރ މަހުގެ 15 ވަނަ ދުވަހުން ފެށިގެން އަލުން ފެށުމަށް ނިންމާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.

އަންގާރަ ދުވަހު ޓޫރިޒަމް މިނިސްޓްރީން ކުރި ޓްވީޓެއްގައި ބުނީ، އަންނަ އޮކްޓޯބަރު މަހުގެ 15 ވަނަ ދުވަހުން ފެށިގެން ގެސްޓް ހައުސް ވިޔަފާރިތައް އަލުން ހުޅުވާލުމުގެ ހުއްދަ ދިނުމަށް ސަރުކާރުން ނިންމާފައިވާ ކަމަށެވެ. އެގޮތުން ހުއްދަތައް ދޫކުރާނީ ރަށްރަށުގެ ކައުންސިލްތަކާއި، ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ގައިޑްލައިންތަކާއި، ހެލްތް އިމަރޖެންސީ އޮޕަރޭޝަންސް ސެންޓަރުގެ އިރުޝާދާ އެއްގޮތަށް ކަމަށް މިނިސްޓްރީން ބުނެފައިވެއެވެ.

މިނިސްޓްރީން ބުނީ، އެކަމާ ގުޅޭ އިތުރު މައުލޫމާތުތައް ބުދަ ދުވަހު އޮންނަ ނޫސްވެރިންގެ ބައްދަލުވުމެއްގައި ހާމަކުރައްވާނެ ކަމަށެވެ.

ގެސްޓައުސްތައް އަލުން ހުޅުވާލުމަށް ސަރުކާރުން ނިންމާފައިވާއިރު، ފަތުރުވެރިކަމުގެ ސިނާއަތުގެ ތެރެއިން ގެސްޓު ހައުސް ވިޔަފާރިތަކަށް އަލުން ހުއްދަ ދޭންވާ ވަގުތު ޖެހިއްޖެ ކަމަށް ސަރުކާރަށް ޤަބޫލު ކުރެވޭ ކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމު ވެސް ދާދި ފަހުން ވަނީ ވިދާޅުވެފައެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި މިނިސްޓަރ ވިދާޅުވީ، ގެސްޓް ހައުސް ވިޔަފާރިތައް ހިނގައި ނުގަނެވުމަކީ މިވަގުތުގެ ބޮޑު ކަންބޮޑުވުމެއް ކަމަށެވެ. އެގޮތުން ގެސްޓް ހައުސް ސިނާއަތަކީ ފަތުރުވެރިކަމުގެ މުހިއްމު ސިނާއަތެއްކަން މިނިސްޓަރުގެ ވާހަކަފުޅުގައި ފާހަގަ ކުރެއްވިއެވެ.