ބީއެމްއެލްއިން އައު ޑިރެކްޓަރުންގެ ބޯޑަށް މެންބަރުން އައްޔަންކޮށްފި

ބޭންކް އޮފް މޯލްޑިވްސް (ބީއެމްއެލް) އިން އައު ޑިރެކްޓަރުންގެ ބޯޑަށް މެންބަރުން އައްޔަންކޮށްފިއެވެ.

ބީއެމްއެލްގެ ޑިރެކްޓަރުންގެ ބޯޑަށް މެންބަރުން އައްޔަންކޮށްފައިވަނީ ހޯމަ ދުވަހު ކުރިއަށް ގެންދިޔަ 2019 ވަނަ އަހަރުގެ ބީއެމްއެލްގެ ވަޗުއަލް އަހަރީ އާންމު ޖަލްސާގައެވެ.

މި ޖަލްސާގައި ސަރުކާރު ތަމްސީލްކުރާ ޑިރެކްޓަރުންނާއި، އާންމު ހިއްސާދާރުން ތަމްސީލް ކުރާ ޑިރެކްޓަރުން ވަނީ އައްޔަންކޮށްފައެވެ.

ސަރުކާރުގެ ފަރާތުން ބީއެމްއެލްގެ ބޯޑަށް އައްޔަން ކުރި ޑިރެކްޓަރުންނަކީ ސީއީއޯ އަދި މެނޭޖިން ޑިރެކްޓަރު ޓިމޮތީ ސޯޔާ، ޑެޕިޔުޓީ ސީއޯއޯ އާއިޝަތު ނޫރައްދީން، ޖުވެއިރިޔާ ސައީދު، ސަނާ މަންސޫރު، ނަޖީމް އިބްރާހިމް ޒަކަރިޔާ، ހުސައިން ތައުފީގު އަލީ އަދި އަބްދުﷲ ހަސަން އެވެ.

އާންމު ހިއްސާދާރުންގެ ފަރާތުން 3 މެންބަރުން ވަނީ ބީއެމްއެލްގެ ބޯޑަށް އައްޔަންކޮށްފައެވެ. އެއީ މުހައްމަދު އަބްދުއްސައްތާރާއި، އިބްރާހިމް މުހައްމަދާއި، އަހުމަދު މުހައްމަދެވެ. އާންމު ހިއްސާދާރުންގެ ފަރާތުން ބޯޑަށް 5 ބޭފުޅަކު ކުރިމަތިލި ނަމަވެސް 2 ބޭފުޅަކު ވަނީ ނަން އަނބުރާ ގެންގޮސްފައެވެ.

މި ޖަލްސާގައި ހިއްސާއަކަށް 26 ރުފިޔާ ބަހަން ވެސް ވަނީ ނިންމާފައެވެ. އެއީ ވޯޓުގައި ބައިވެރިވި 98 އިންސައްތަ ހިއްސާދާރުންގެ ވޯޯޓާ އެކުއެވެ.

ބީއެމްއެލްގެ ސާފު ފައިދާގެ ގޮތުގައި ލިބިފައި ވަނީ، 961.74 މިލިއަން ރުފިޔާއެވެ.