ބޭންކް އޮފް މޯލްޑިވްސް (ބީއެމްއެލް) އިން ހިއްސާއަކަށް 26 ރުފިޔާ ބަހަން ނިންމައިފިއެވެ.

ހޯމަ ދުވަހު ކުރިއަށް ގެންދިޔަ 2019 ވަނަ އަހަރުގެ ބީއެމްއެލްގެ ވަޗުއަލް އަހަރީ އާންމު ޖަލްސާގައި މިގޮތަށް ނިންމާފައިވާއިރު ހިއްސާ އަކަށް 26 ރުފިޔާ ބަހަން ފާސްވީ ވޯޓުގައި ބައިވެރިވި 98 އިންސައްތަ ހިއްސާދާރުންގެ ވޯޯޓާ އެކުއެވެ.

ބޭންކުގެ ހިންގުމުގެ ފައިދާ މިވަނީ 2018 ވަނަ އަހަރާ އަޅާ ބަލާއިރު 9 އިންސައްތަ އިތުރުވެ 1.7 ބިލިއަން ރުފިޔާ ލިބިފައިވެއެވެ. އަދި ޓެކްސްއަށް ކެނޑުމަށް ފަހު ލިބުނު ސާފު ފައިދާ ވަނީ 5 އިންސައްތަ ދަށްވެފައިވާއިރު މިގޮތަށް ދަށްވެފައިވަނީ ޕްރޮވިޝަން ޗާޖު އިތުރުވުމުގެ ސަބަބުން ކަމަށް ބީއެމްއެލް އިން ބުނެއެވެ. ބޭންކުގެ ޖުމްލަ އެސެޓްސްް އަށް ވަނީ 3.3 ބިލިއަން އިތުރުވެފައެވެ. އަދި މިއީ 14 އިންސައްތައިގެ ކުރިއެރުމެއް ކަމަށް އެ ބޭންކުން ފާހަގަކުރެއެވެ.

ބޭންކުގެ ރައުސުލްމާލު ރަނގަޅު މިންވަރެއްގައި ހިފެހެއްޓިފައިވާކަން ފާހަގަކޮށް ބީއެމްއެލް އިން ބުނީ ރައުސުލްމާލުގެ ފުދުންތެރިކަން ހުރީ 40 އިންސައްތައަށް ވުރެން މަތީގައި ކަމަށެވެ.

ބީއެމްއެލްގެ އަަހަރީ އާންމު ޖަލްސާގައި ކުރިއަށް އޮތް އަހަރު ބީއެމްއެލްގެ އޮޑިޓަރުންގެ ގޮތުގައި ޕްރައިސްވޯޓާ ހައުސް ކޫޕާސް ކަނޑައަޅަން ވަނީ ފާސްކޮށްފައެވެ.

ބޭންކް އޮފް މޯލްޑިވްސްއަށް ސާފު ފައިދާގެ ގޮތުގައި ލިބިފައި ވަނީ، 961.74 މިލިއަން ރުފިޔާއެވެ.