ފިނޭންސް މިނިސްޓަރ އިބްރާހީމް އަމީރުގެ މައްޗަށް ކުރެވޭ ކޮރަޕްޝަންގެ ތުހުމަތުތަކާއި އަދި މިނިސްޓަރާއި ގުޅުވައި ދައްކަމުންދާ ވާހަކަތަކަށް އެމަނިކުފާނު ރައްދު ދެއްވައިފިއެވެ.
ރާއްޖެޓީވީގެ "ފަލަ ސުރުޚީ" ޕްރޮގްރާމްގައި މިވާހަކަތަށް ރައްދުދެއްވަމުން މިނިސްޓަރ ވިދާޅުވީ އެމަނިކުފާނާއި ފިނޭންސް މިނިސްޓްރީގެ އަގު ވައްޓާލުމަށް ކޮރަޕްޝަންގެ ތުހުމަތުތަކެއް ވާދަވެރި ފަރާތްތަކުން ކުރަމުންދާ ކަމަށެވެ. މިނިސްޓަރ ވިދާޅުވީ ކޮރަޕްޝަން ހިންގުމަށް އަދި އެހެން މަގްސަދެއް އޮތްނަމަވެސް އެ ފުރުސަތު ކުރީ ސަރުކާރުތަކުގައި ވެސް ލިބިގެންދިޔަ ކަމަށެވެ. 2012 ވަނަ އަހަރުން ފެށިގެން އެމްޑީޕީގައި މަސައްކަތް ކުރަމުންދަނީ ގަބޫލު ކުރާ ގަބޫލު ކުރުމުގެ ތެރެއިން ކަމަށް މިނިސްޓަރ ވިދާޅުވިއެވެ. އެ ގަބޫލު ކުރުމަކީ އެމްޑީޕީ އަކީ ކޮރަޕްޝަނަށް އެއްވެސް ގޮތަކަށް މަސައްކަތް ކުރާނެ ބައެއް ނޫންކަން ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެފަދަ ތުހުމަތުތަކެއްކޮށް ވާހަކަ ދައްކާ ފަރާތްތަކުން އެގޮތަށް ވާހަކަ ދައްކަނީ ކުރީ ސަރުކާރުގައި ކޮރަޕްޝަންގެ ތެރެއިން އެބޭފުޅުން މަސައްކަތް ކުރުމަށް ރާވާފައި އޮތުމުން ކަމަށް ވެދާނެ ކަމަށެވެ. އެހެންކަމުން އެހެން މީހުން ވެސް އެ މަގުން މަސައްކަތް ކުރާނެ ކަމަށް ހީވަނީ ކަމަށް މިނިސްޓަރ ވިދާޅުވިއެވެ.
އަޅުގަނޑު ފާހަގަކޮށްލަން ބޭނުންވަނީ ވާދަވެރި ފަރާތްތަކުން ދޮގުވާހަކަ ފަތުރަމުންދާނެ. ފާހަގަކޮށްލަން ބޭނުންވަނީ އެމްޑީޕީގެ އަޅުގަނޑު ދަންނަން އެންމެންނަށްވެސް އެނގޭނެ އަަމީރު ވައްކަމެއް ނުކުރާނެ. އަޅުގަނޑުގެ ޝައުގެއްނެތް ކޮރަޕްޝަންގެ ތުހުމަތުގައި ވައްކަމެއް ކޮށްގެން އަޅުގަނޑުގެ އަމިއްލަ މުއްސަނދި ކަމެއް ހޯދާކަށް. އަޅުގަނޑުގެ ހަމައެކަނި އަމާޒަކަށްވަނީ މެނިފެސްޓޯގައި ހުރި އަޅުގަނޑުމެންގެ ވައުދުތައް ވީހާވެސް ހާމަކަން ބޮޑު ގޮތެއްގައި ރައްޔިތުންނަށް ފައިދާވާނެ ގޮތަށް ކަންކަން ކުރުން. ދެ އަހަރު މިވަނީ މިސަރުކާރުގެ މަސައްކަތްކުރާތާ. އަޅުގަނޑަށް ލިބޭ މުސާރައަށްވުރެ އިތުރަށް އެންމެ ސެންޓެއްގައިވެސް ޖެހިފައި ނޯންނާނެ.ފިނޭންސް މިނިސްޓަރ އިބްރާހީމް އަމީރު
މީގެއިތުރުން މިނިސްޓަރ ވިދާޅުވީ އުސޫލުން ބޭރުން އެއްވެސް ކަމެއް ކޮށްފައިނުވާނެ ކަމަށެވެ. މާލިއްޔަތު ގަވާއިދާއި އެއްގޮތަށް މަސައްކަތް ކުރުމަކީ ވަރަށް ބޮޑު އަހައްމިއްޔަތު ކަމެއް ދެއްވައިގެން ކުރައްވާ ކަމެއް ކަމަށް މިނިސްޓަރ ވިދާޅުވިއެވެ. އަދި މި ސަރުކާރުން ފިނޭންސް މިނިސްޓްރީން މަސައްކަތް ކުރަމުން ދަނީ ހުރިހާ މަސައްކަތެއް ވެސް ވީހާވެސް ދެ ފުށް ފެންނަ ގޮތަކަށް ކުރުމަށް ކަމަށް މިނިސްޓަރ ވިދާޅުވިއެވެ.
މަޝްރޫޢުތައް ދިނުމުގައި ވަކިގޮތަކަށް މިނިސްޓަރ އަމަލު ކުރައްވާ ކަމަށް ދެކެވޭ ވާހަކަތަކަށް ރައްދު ދެއްވަމުން މިނިސްޓަރ ވިދާޅުވީ ފިނޭންސް މިނިސްޓްރީގެ ތެރެއިން ނޭޝަނަލް ޓެންޑަރ ބޯޑުން ޕްރޮޖެކްޓްތައް ކުރިޔަށް ގެންދިޔުމަށް ހަވާލު ކުރަނީ ކޮންބަޔަކަށް ކަމެއް އެމަނިކުފާނަށް އެނގިވަޑައިނުގަންނަވާ ކަމަށެވެ. އަދި މަޝްރޫޢުތައް ދެނީ ކޮންބަޔަކަށްކަން ބަލަން ވެސް ބޭނުންފުޅުނުވާ ކަމަށް މިނިސްޓަރ ވިދާޅުވިއެވެ. އަބަދުވެސް ބާރުއަޅުއްވަމުން ގެންދަވަނީ ވީހާވެސް ބޮޑަށް ދެފުށް ފެންނަ ގޮތަށް ޓެކްނިކަލް އިވެލިއުއޭޝަން ހެދި ރަނގަޅަށް ފައިނޭންޝަލް އިވެލިއުއޭޝަން ހެދި ޓެންޑަރ ޑިޕާޓްމަންޓްގެ މަސައްކަތްތައް ވީހާ ވެސް ވަރުގަދަ ކުރުމަށް ކަމަށް މިނިސްޓަރ ވިދާޅުވިއެވެ.
އަޅުގަނޑު ދުވަހަކުވެސް އެއްވެސް އިންސްޓްރަކްޝަނެއް ދީފައިނުވާނެ ދުވަހަކުވެސް ވަކި ބަޔަކަށް ޕްރޮޖެކްޓްތައް އެވޯރޑް ކުރުމަށް. އަޅުގަނޑު ހިތުން ކުރިން އެގޮތަށް މަސައްކަތް ކުރީމާ ކަމަށްވެދާނެ އެއީ އެގޮތަށް ވާހަކަ ދައްކަނީ. އަޅުގަނޑަށް އެއްވެސް މައުލޫމާތު އެނގޭކަމެއް ނޫން އެހުންނަނީ. ޓެންޑަރ އެވޯރޑް ކުރެވެނީ ކޮންބަޔަކަށްތޯ އަޅުގަނޑަށްވެސް އެނގެނީ ޚަބަރުން. އަޅުގަނޑު ބަލާކަށްވެސް ބޭނުމެއް ނޫން އެކަންތައްތައް. މަސައްކަތްތައް އެންމެ ބޮޑަށް ވީހާވެސް ޓްރާންސްްޕޭރެންޓް ކޮށް އިގްތިޞާދު ފުޅާކޮށް މެނިފެސްޓޯގައި ހުރި ކަންތައް އެޗީވް ކުރުން އެއީ ކުރާ މަސައްކަތަކީ.ފިނޭންސް މިނިސްޓަރ އިބްރާހީމް އަމީރު
ސީދާ ފިނޭންސް މިނިސްޓަރާ ގުޅުވާ ދެކެވޭ ވާހަކަތަކަށް ވެސް މި ޕްރޮގްރާމްގައި މިނިސްޓަރ ވަނީ ޖަވާބު ދެއްވާފައެވެ. އެގޮތުން ދާދިފަހުން އެމްއެންޑީއެފްގެ އިމާރަތް ހެދުމުގެ މަސައްކަތަށް ހުޅުވާލުމުން އެންމެ ކުޑަ އަގެއް ހުށައެޅި އެސްޖޭ ކޮންސްޓްރަކްޝަން ޕްރައިވެޓް ލިމިޓެޑަށް އެ މަސައްކަތް އެވާރޑް ނުކޮށް ދެވަނަ އަށް އެންމެ ކުޑަ އަގު ހުށަހެޅި ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑާ ހަވާލު ކުރުމުން ފިނޭންސް މިނިސްޓަރަށް ރެއިންބޯ ގްރޫޕްގެ ފަރާތުން ދެ އެޕާޓްމަންޓް ލިބުނު ވާހަކަ އަށް ރައްދުދެއްވަމުން މިނިސްޓަރ ވިދާޅުވީ އެއީ އެމަނިކުފާނަކީ ކޮރަޕްޓް މީހެއް ކަމަށް ދެއްކުމަށް ބަޔަކު ކުރާކަމެއް ކަމަށް ދެކެވަޑައިގަންނަވާ ކަމަށެވެ.
އަޅުގަނޑު ހިތުން އެއީ އަޅުގަނޑަކީ ކޮރަޕްޓް މީހެއްކަމަށް ދައްކަންވެގެން ބަޔަކު ރާވައިގެން ދައްކާ ވާހަކަތަކެއް. ކޮރަޕްޝަނަށް މަގުފަހިވާނެ އެއްވެސް ކަމެއް މިނިސްޓަރ ކަމުގައި ކޮށްފައެއްނުވާނެ. ޖާއިޒު ގޮތެއްގައިވެސް އަދި ނާޖާއިޒް ގޮތެއްގައިވެސް މުސާރައިގެ ބޭރުން އެންމެ ސެންޓެއްގައިވެސް ޖެހިފައިނުވާނެ.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ އެ މަޝްރޫޢުގެ ކަންކަން ކުރިޔަށް ގޮސްފައިވަނީ ފަހުން އެކުލަވާލެވުނު ނޭޝަނަލް ޓެންޑަރ ބޯޑު މެދުވެރިކޮށް އިމާރާތް ކުރުމުގެ މަސައްކަތްތައް އެވޯޑް ކުރުމުގައި އަމަލު ކުރާނެ އުސޫލާއި އެއްގޮތަށް ކަމަށެވެ. އެ އުސޫލުގައި އޮންނަގޮތުން އެއް ކުންފުންޏަކަށް އެއްފަހަރާ މަސައްކަތް ކުރެވޭނީ 300 މިލިއަން ރުފިޔާއާ ހަމައަށެވެ. އެގޮތަށް ވަކި އުސޫލެއް ހަދާ ގިންތިތަކެއް ހަދާފައިވަނީ ސަރުކާރުގެ މަޝްރޫޢުތައް ވީހާ ވެސް ގިނަ ވިޔަފާރިވެރިންނަށް ދީ ވިޔަފާރިތައް ކުރިއެރުވުމުގެ ބޭނުމުގައި ކަމަށް މިނިސްޓަރ ވިދާޅުވިއެވެ. އަދި މަޝްރޫޢުތައް ލަސްވުމާއި ކޮލިޓީ ދަށްވުން ފަދަ މައްސަލަތައް ދިމާވާތީ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި މައްސަލާގައި އެސްޖޭ ކޮންސްޓްރަކްޝަންގެ ފަރާތުން ކޯޓަށް ވެސް މައްސަލަ ހުށަހެޅި ކަމަށެވެ. ނަމަވެސް އެކުންފުނިން ބޭނުންވި ގޮތަށް އެމަޝްރޫޢުކުރިޔަށް ގެންދިޔުން ހުއްޓާލުމުގެ އަމުރެއް ނެރެދީފައިނުވާކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވަނީ ނާޑް ކުންފުންޏާއި މިނިސްޓަރުގެ ހިއްސާ އޮންނަ ރާއްޖެ ކްރޫޒް ކިޔާ ކުންފުންޏަކާއި ގުޅުވާ ދެކެވޭ ވާހަކަތައް ސާފު ކޮށްދެއްވާފައެވެ. މިނިސްޓަރ ވިދާޅުވީ ނާޑް ކުންފުންޏަކީ ކޮބައިކަމާއި އެ ކުންފުނީގެ ޝެއަރ ހޯލްޑަރުން އެނގިވަޑައިނުގަންނަވާ ކަމަށެވެ. އަދި ރާއްޖެ ކްރޫޒް ކިޔާ ކުންފުންޏެއްގެ ޝެއަރ އޮންނާނެ ކަމަށާއި އެއީ އެމަނިކުފާނާއި އެމަނިކުފާނުގެ ގާތް ރައްޓެއްސަކާއެކު ހަދާފައިވާ ކުންފުންޏެއް ކަމަށެވެ. ނަމަވެސް އެ ކުންފުނިން އެއްވެސް ވިޔަފާރިއެއް ކޮށްފައި ނުވާނެކަމަށް މިނިސްޓަރ ވިދާޅުވިއެވެ.
ފިނޭންސް މިނިސްޓަރ ކަމަށް ވަޑައިގަތުމުގެ ކުރިން ވެސް ޖާއިޒް ގޮތުގައި މަސައްކަތް ކޮށްގެން ދިރިއުޅުމުގައި ކުރިއެރުން ހޯދުމަށް މަސައްކަތް ކޮށްފައިވާނެ ކަމަށް މިނިސްޓަރ ވިދާޅުވިއެވެ. އެގޮތުން ރާއްޖެ ކްރޫޒް ފިޔަވައި ދެތިން ކުންފުންޏެއް ވެސް ހަދާފައިވާނެ ކަމަށް މިނިސްޓަރ ވިދާޅުވިއެވެ. ނަމަވެސް އެ ކުންފުނިތަކުން ވިޔަފާރިކުރަމުން ނުދާކަމަށް މިނިސްޓަރ ވިދާޅުވިއެވެ.
