އެމްޓީޑީސީގެ އަހަރީ އާންމު ޖަލްސާ މިރޭ

މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްޓީޑީސީ) ގެ 2019 ވަނަ އަހަރުގެ އަހަރީ އާންމު ޖާލްސާ މިރޭ 21:00 ގައި ބޭއްވުމަށް ނިންމައިފިއެވެ.

ޖަލްސާ އަށް އެކުންފުނީގެ ހުރިހާ ހިއްސާ ދާރުންނަށް ދައުވަތު އަރުވާފައިވާ އިރު، ޖަލްސާ ބޭއްވުމަށް ހަމަޖެހިފައި ވަނީ ވާޗުއަލް ކޮށެވެ. އެގޮތުން ޖަލްސާ ކުރިއަށް ގެންދާނީ މޯލްޑިވްސް ސެކިއުރިޓީ ޑިޕޮޒިޓަރީ (އެމްއެސްޑީ)ގެ އޮންލައިން މީޓިން މެނޭޖްމެންޓް ސިސްޓަމް، ފަހިވޯޓް މެދުވެރިކޮށް ކަމަށް އެމްޓީޑީސީ އިން މައުލޫމާތުދެއެވެ.

އެމްޓީޑީސީ އިން ވަނީ އަހަރީ އާންމު ޖަލްސާގައި 2018 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސް ކުރުމަށް ހަމަޖެހިފައިވާ ކަމަށް ބުނެފައެވެ. މި ޖަލްސާގައި ކުންފުނީގެ ހިންގާ ގަވާއިދަށް ބައެއް އިސްލާހުތައް ގެންނަށް ފާސްކުރާނެ ކަމަށާއި 2019 ވަނަ އަހަރުގެ ޑިރެކްޓަރުންގެ ރިޕޯޓާއި އޮޑިޓް ކުރެވިފައިވާ މާލީ ހިސާބުތަކުގެ ރިޕޯޓް ވެސް ފާސް ކުރުމަށް ހުށައެޅޭނެ ކަމަށް އެ ކޯޕަރޭޝަނުން ފާހަގަކުރެއެވެ.

މީގެ އިތުރުން 2020 ވަނަ އަހަރަށް ކުންފުނީގެ އޮޑިޓަރުން އައްޔަން ކުރުމާއި އުޖޫރަ ކަނޑައެޅުން މި ޖަލްސާގައި ކުރިއަށްދާނެ ކަަމަށާއި، ކުރިއަށް އޮތް އަހަރަށް ކުންފުނީގެ ޑިރެކްޓަރުންގެ ބޯޑަށް ޑިރެކްޓަރުން އައްޔަންކުރުން ވެސް މި ޖަލްސާގައި އެޖެންޑާ ކުރެވިފައިވާ ކަމަށް އެމްޓީޑީސީ އިން ބުނެއެވެ. ހިއްސާދާރުންގެ ހިޔާލު ފާޅުކުރުމަށް ވެސް ޖަލްސާގައި ހުޅުވާލެވޭނެއެވެ.

މިރޭގެ ޖަލްސާގައި އެމްޓީޑީސީގެ ހިއްސާދާރުންނަށް ބަހާނެ ފައިދާ އާއި ގުޅޭގޮތުން ޑިރެކްޓަރުންގެ ބޯޑުން ހުށައަޅާފައިވާ ހުށައެޅުމަށް ގޮތެއް ނިންމުމަށް ވެސް ވަނީ ހަމަޖެހިފައެވެ. ހިއްސާގެ ފައިދާގެ ގޮތުގައި ހިއްސާއަކަށް 50 ލާރި ބަހަން ހުށައަޅަން ކުންފުނީގެ ޑިރެކްޓަރުންގެ ބޯޑުން ނިންމާފައިވާ އިރު، މިއީ 11 އަހަރަށް ފަހު އެކުންފުނިން ހިއްސާ ބަހަން ހުށައެޅި ފުރަތަމަ ފަހަރެވެ.

އެމްޓީޑީސީ އިން ބުނީ އެކުންފުނީގެ 2019 ވަނަ އަހަރުގެ އަހަރީ އާންމު ޖަލްސާގައި ބައިވެރިވެވޭނީ މިއަހަރުގެ އޮގަސްޓް މަހުގެ 23 ވަނަ ދުވަހުގެ 12:00 އަށް ކުންފުނީގެ ހިއްސާދާރުންގެ ރަޖިސްޓްރީގައި ވެފައިވާ ފަރާތްތަކަށް ކަމަށާއި ޖަލްސާގައި ބައިވެރިވެވޭނީ ޖަލްސާގައި ރަޖިސްޓްރީ ކުރުމަށް އެކުންފުނިން ހުޅުވާލާފައިވާ މުއްދަތުގައި އަމިއްލަ އަށް ބައިވެރިވުމަށް އަދި ޕްރޮކްސީގެ ގޮތުގައި ބައިވެރިވުމަށް ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށް ބުނެފައެވެ.

ޖަލްސާގައި ބައިވެރިވުމަށް އަދި ޕްރޮކްސީ ހުށައެޅުމަށް ހުޅުވާލާފައިވާ މުއްދަތު ހަމަވުމުން ރަޖިސްޓްރީ ކޮށްފައިވާ ހުރިހާ ހިއްސާދާރުންނާއި ޖަލްސާގައި އަމިއްލަ އަށް ބައިވެރުމަށް އުޒުރުވެރިވާ ހިއްސާދާރުން ތަމްސީލު ކުރާ ޕްރޮކްސީ، ޖަލްސާގެ ބައިވެރިންގެ ގޮތުގައި ފަހިވޯޓް ގައި ރަޖިސްޓްރީ ކުރެވިގެން ދާނެ ކަމަށް އެމްޓީޑީސީ އިން ވަނީ ބުނެފައެވެ.