އެޗްޕީއޭގެ ގައިޑްލައިންތަކަށް އަމަލުކޮށް، އެއްނުވުމަށް ނައިބް ރައީސް އިލްތިމާސްކުރައްވައިފި
29 އޯގަސްޓު 2020 | ހޮނިހިރު 06:59ގިނަ ބަޔަކު އެއް ނުވުމަށް ބާރުއެޅުއްވި
ހުކުރު ދުވަހުގެރޭ އަލިފާން ހިފި ސަރަހައްދުގައި ނައިބް ރައީސް ފައިސަލް ނަސީމް ހަރަކާތްތެރިވަނީ
ކުއްލި ހާލަތްތަކުގައިވެސް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއި އެއް ގޮތަށް އަމަލުކޮށް ގިނަ ބަޔަކު އެއް ތަނަކަށް އެއް ނުވުމަށް ރައީސުލްޖުމްހޫރިއްޔާގެ ނައިބް ފައިސަލް ނަސީމް އިލްތިމާސް ކުރައްވައިފިއެވެ.
ހޮނިހިރު ދުވަހު ނައިބް ރައީސް ކުރެއްވި ޓްވީޓެއްގައި އެމަނިކުފާނު ވަނީ ހުކުރު ދުވަހުގެރޭ ބޮޑުތަކުރުފާނު މަގުގައި ހުންނަ ''ކެފޭ ޓިލޯ'' ގައި ރޯވި އަލިފާން ނިންވާލުމުގައި ހަރަކާތްތެރިވި އެމްއެންޑީއެފް، އަދި ފުލުހުނާއި، މޯލްޑިވްސް އެއާޕޯޓްގެ ފަޔާ އެންޑް ރެސްކިއު ޓީމުން ކުރި މަސައްކަތަށް ޝުކުރު އަދާކުރައްވާފައެވެ. އަދި އިމަޖެންސީ ޓީމުން ކުރި މަސައްކަތަށް ނައިބް ރައީސް ވަނީ ހާއްސަ ޝުކުރު އަދާކުރައްވާފައެވެ.
އެމަނިކުފާނު ވަނީ އަލިފާން ހިފި ސަރަހައްދަށް ހުކުރު ދުވަހު ވަޑައިގެން އެ ސަރަހައްދުގައި ކަންތައްތައް ދިޔަގޮތުގެ ތަފްސީލު އޮޅުން ފިލުއްވާފައެވެ.
އިމަރޖެންސީ ހާލަތްތަކުގައިވެސް އެޗްޕީއޭގެ ގައިޑްލައިންތަކާއި އެއްގޮތަށް އަމަލުކުރުމަށް ނައިބް ރައީސް ބާރު އަޅުއްވާފައިވާއިރު، ހުކުރު ދުވަހުގެރޭ ހިނގި އަލިފާނުގެ ހާދިސާ ހިނގި ސަރަހައްދު ކުރިމަތީ އޮންނަ އާޓިފިޝަލް ބީޗަށް ކުޅި ބަލަން އާއްމުންގެ ގިނަ ސަރަހައްދަށް ޖަމާވިއެވެ. އޭގެތެރޭގައި ގިނަ ބަޔަކު މާސްކު އަޅައިގެން އެއްވެސް ގައިދުރުކަމެއް ނެތެވެ.
ކެފޭ ޓިލޯގައި އަލިފާނުގެ ހާދިސާ އެއް ހިނގައިގެން އުޅޭ ކަމުގެ ރިޕޯޓް އެމްއެންޑީއެފުން ލިބިފައިވަނީ ހުކުރު ދުވަހުގެރޭ 09:43 ހާއިރުއެވެ. އެ ކެފޭގައި ހިފި އަލިފާންގަނޑު ނިންވާނުލެވިގެން އުޅެނިކޮށް ދެން އެ އަލިފާންގަނޑު ފެތުރުނީ އެ އިމާރަތާ ޖެހިގެން ހުންނަ އިންޑިއާ ބޭންކު އެސްބީއާއި، އާއި އުރީދޫގެ އޮފީހާއި އެފަދަ ބޮޑެތި އެހެން ކުންފުނިތަކުގެ އޮފީސް ހިންގާ ގަދަގެ މުހައްމަދުފުޅު ބިލްޑިންގައެވެ. އަލިފާންގަނޑު ނިންވާލެވުނި ހުކުރު ދުވަހުގެރޭ 12:34 ހާއިރު އެވެ. މި ހާދިސާގައި އެއްވެސް މީހަކަށް ގެއްލުންނުވިޔަސް އެ އިމާރާތުގައި ހުރި ބައެއް އޮފީސްތަކަށް ވަނީ ކޮންމެވެސް ވަރެއްގެ ގެއްލުންތަކެއް ވެފައެވެ. ކެފޭގައި އަލިފާން ހިފަން މެދުވެރިވި ސަބަބު ފުލުހުން ދަނީ ތަހުގީގު ކުރަމުންނެވެ.
