އަލިފާނުގެ ހާދިސާގައި އެއްވެސް ފަރާތަކަށް ވަގުތީ ބޯހިޔާވަހިކަން ދޭންޖެހިފައިނުވޭ: އެންޑީއެމްއޭ
29 އޯގަސްޓު 2020 | ހޮނިހިރު 04:12ކަލާފާނު ސްކޫލުގައި ބޯހިޔާވަހިކަން ފޯރުކޮށްދިނުމަށް ތައްޔާރީތައް އެންޑީއެމްއޭ އާއި ކަމާ ގުޅޭ ފަރާތްތަކުން ކުރި
އެސްބީއައި އިމާރަތުގައި ރޯވި އަލިފާންގަނޑު
ހުކުރު ދުވަހުގެރޭ މާލޭގައި ހިނގި ނުރައްކާތެރި އަލިފާނުގެ ހާދިސާގައި އެއްވެސް ފަރާތަކަށް ވަގުތީ ބޯހިޔާވަހިކަން ދޭންޖެހިފައިނުވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އަލިފާނުގެ ހާދިސާއާ ގުޅިގެން ރާއްޖެޓީވީން ގެނެސްދިން ލައިވް ކަވަރރޭޖަށް ދެއްވި އިންޓަވިއުގައި އެންޑީއެމްއޭގެ ޗީފް އެގްޒެކިއުޓިވް ހިސާން ހަސަން ވިދާޅުވީ، ހާދިސާގައި އަސަރު ކުރި އާއިލާތަކަށް ބޯހިޔާ ވަހިކަން ފޯރުކޮށްދޭނީ އަލިފާންގަނޑު ނިވުމުން އެންޑީއެމްއޭގެ ސްޓާފުން އަދި ސިފައިން އިމާރާތްތަކަށް ގޮސް ކުރާ އެސެސްމެންޓެއްގެ ފަހުން ކަމަށެވެ. އޭގެފަހުން އެންޑީއެމްއޭއިން ކޮށްފައިވާ ޓްވީޓެއްގައި ބުނެފައިވަނީ މިހާދިސާގައި އެއްވެސް ފަރާތަކަށް ވަގުތީ ބޯހިޔާވަހިކަން ދޭންޖެހިފައިނުވާ ކަމަށެވެ.
މިހާދިސާ ހިނގިތާ މާގިނައިރު ނުވަނީސް ކަލާފާނު ސްކޫލުގައި ބޯހިޔާވަހިކަން ފޯރުކޮށްދިނުމަށް ތައްޔާރީތައް އެންޑީއެމްއޭ އާއި ކަމާ ގުޅޭ ފަރާތްތަކުން ވަނީ ކޮށްފައެވެ. ހިސާން ވިދާޅުވީ މި ހާދިސާ އާއި ގުޅިގެން ނެޝެނަލް އެމަރޖެންސީ އޮޕަރޭޝަން ސެންޓަރު އަލުން އެކްޓިވޭޓްކޮށް އެކުގައި މަސައްކަތް ކުރާ އިދާރާތަކުގެ މަސައްކަތް ފަށާފައިވާ ކަމަށެވެ.
އެމްއެންޑީއެފުން ބުނީ ސްޓޭޓްބޭންކް އޮފް އިންޑިއާ އާ ޖެހިގެން ހުރި އިމާރާތުގެ ބައެއްގައި އަލިފާން ރޯވީ ހުކުރު ދުވަހުގެ ރޭ 9:47 ހާއިރު ކަމަށެވެ. ހާދިސާ ހިނގުމާއެކު ކަމާބެހޭ ފަރާތްތަކުން އަވަސް ފިޔަވަޅުތައް އަޅާ، އެސަރަހައްދުގައި ހުރި އިމާރާތްތަކުގައި ދިރިއުޅޭ ފަރާތްތައް އެ އިމާރާތްތަކުން ނެރުމުގެ މަސައްކަތް ކުރިއަށް ގެންގޮސްފައިވެއެވެ.
މިހާދިސާގައި އެއްވެސް މީހަކަށް އަނިޔާވެފައި ނުވާކަމަށް އެމްއެންޑީއެފުން ވަނީ ބުނެފައެވެ.
އަލިފާން ރޯވި ސަރަހައްދުގެ ހާލަތު ބައްލަވާލެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އިތުރުން ނައިބު ރައީސް ފައިސަލް ނަސީމް އަދި ވަޒީރުން ވަނީ އެސަރަހައްދަށް ވަޑައިގެންފައެވެ.
