މަސައްކަތް ކުރަނީ ލޮކްޑައުންއަކަށް ނުގޮސްވޭތޯ، ނަމަވެސް ހުރިހާ ރައްޔިތުންގެ ހައްގުގައި ކުރަންޖެހޭ ކަމެއް ކުރާނަން: ރައީސް
28 އޯގަސްޓު 2020 | ހުކުރު 20:12ފިޔަވަޅުތައް އަޅަމުން ގެންދަނީ ލޮކްޑައުންއަކަށް ނުގޮސް ސަލާމަތްވޭތޯ
ރައީސުލްޖުމްހޫރިއްޔާ އަލިފާންރޯވި ސަރަހައްދުގެ ހާލަތު ބައްލަވާލައްވަނީ
މާލެ ސަރަހައްދުގައި ހަލުވިކަމާއެކު ކޮވިޑް-19 ފެތުރެމުންދާއިރު ދެވަނަ ފަހަރަށް ލޮކްޑައުން އަކަށް ދާންޖެހިއްޖެނަމަ ރައްޔިތުންނަށް ވަރަށް ބޮޑު ތަކުލީފެއް އުފުލަން ޖެހޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ހުކުރު ދުވަހުގެ ރޭ "ކެފޭ ޓިއޯލޯ" ގައި ހިނގި އަލިފާނުގެ ހާދިސާގެ ހާލަތު ބައްލަވާ ލެއްވުމަށް އެ ސަރަހައްދަށް ރައީސް ޞާލިހު ވަޑައިގެން ނޫސްވެރިންނާ ބައްދަލުކުރައްވާ ވަނީ ވާހަކަ ދައްކަވާފައެވެ. އެ ބައްދަލުވުމުގައި އަލުން ލޮކްޑައުންއަކަށް ދިޔުމާއި ގުޅޭގޮތުން ރާއްޖެޓީވީން ދެންނެވި ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ ފިޔަވަޅުތައް އަޅަމުން ގެންދަނީ ލޮކްޑައުންއަކަށް ނުގޮސް ސަލާމަތްވޭތޯ ކަމަށެވެ.
ރާއްޖޭގައި މިހާރު ކޮވިޑް-19 އަށް ޕޮޒިޓިވްވެފައިވާ މީހުންގެ އަދަދު ވަނީ 7469ށް އަރާފައެވެ. ބަލި ޖެހުނު މީހުންގެ ތެރެއިން 192 މީހަކަށް ދަނީ ހޮސްޕިޓަލުގައި އެޑްމިޓް ކޮށްގެން ފަރުވާދެމުންނެވެ.
މާލެސިޓީން ފުރަތަމަ ކޮވިޑް-19 ގެ ކޭސްއެއް އޭޕްރީލް މަހުގެ 15 ވަނަ ދުވަހު ފެނުމާއެކު މާލެ ސަރަހައްދު ވަނީ ލޮކްޑައުން ކޮށްފައެވެ. ލޮކްޑައުންއަށް އެކި ފިޔަވަހިތަކަކަށް ބަހާލައިގެން ލުއިތައް ދޭން ފެށީ މެއި މަހުގެ 29ން ފެށިގެންނެވެ. ތިންވަނަ ފޭސްގައި ލުއިތައް ދޭން ފެށުމުން ކޭސްތައް ފެންނަ މިންވަރު ވަނީ އިތުރުވާން ފަށާފައެވެ.
ކޮވިޑް-19 ޖެހޭ މީހުންގެ އަދަދު ޖުލައި މަހުގެ ފަހުކޮޅުން ފެށިގެން އިތުރުވާން ފަށާފައިވާއިރު ވައިރަސް ފެތުރުން ކޮންޓްރޯލްކުރުމަށް ކަމާބެހޭ ފަރާތްތަކުން އަންނަނީ ފިޔަވަޅުތައް އަޅަމުންނެވެ. އެގޮތުން ބޭރުގައި އުޅޭއިރު މާސްކު އެޅުން މަޖުބޫރު ކޮށްފައިވާއިރު ރޭގަނޑު 8ން ފަތިހު 5ށް ބޭރުގައި އުޅުން ވަނީ މަނާކޮށްފައެވެ.
