މެސީ ދޫކޮށްލަން ބާސާއިން ބޭނުމެއް ނުވޭ!

ލިއޮނެލް މެސީ ދޫކޮށްލަން ބާސެލޯނާއިން ބޭނުންނުވާ ކަމަށް ދާދި ފަހުން އެ ކުލަބުގެ ސްޕޯޓިންގ ޑިރެކްޓަރުގެ މަގާމަށް ހަމަޖެއްސި ރާމޮން ޕްލޭނެސް ބުނެފިއެވެ.

މިދިޔަ އަންގާރަ ދުވަހުގެ ވަގުތެއްގައި މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. ރިޕޯޓުތައް ބުނާ ގޮތުން މެސީ ބާސާގެ މެނޭޖްމަންޓަށް ފޮނުވި ލިޔެކިޔުންތަކުގައި އެދެފައިވަނީ މި ޓްރާންސްފާ ބާޒާރުގައި އެ ކުލަބު ދޫކޮށް ދެވޭ ގޮތަށް އޭނާގެ އެއްބަސްވުން ބަދަލު ކޮށްދިނުމަށެވެ.

ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް ގޮތުންނަމަ މި ޓްރާންސްފާ ބާޒާރުގައި މެސީ ގެންދަން ބޭނުންވާ ކުލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހޭނެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، މި ޓްރާންސްފާ ބާޒާރުގައި ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

ކުލަބު ދޫކޮށްލަން މެސީ އެދުމާ ގުޅިގެން ބާސާގެ ބޯޑު މެންބަރުން ކުއްލި ބައްދަލުވުމެއް ބޭއްވިއިރު، މި ބައްދަލުވުމުގައި ބޯޑު މެންބަރުން ނިންމާފައިވަނީ މެސީގެ އެއްބަސްވުން އައު ކުރުމަށް މަސައްކަތް ކުރުމަށް ކަމަށް ރިޕޯޓުތައް ބުނެއެވެ.

ބުދަ ދުވަހު މީޑިއާއަށް މައުލޫމާތު ދެމުން ބާސާގެ ސްޕޯޓިންގ ޑިރެކްޓަރު ޕްލޭނެސް ބުނީ މެސީ އާއި ބާސެލޯނާއާ ދެމެދު ގިނަ މަޝްވަރާތަކެއް ކުރިއަށްދާ ކަމަށާއި، އެ ވާހަކަތައް މީޑިއާގައި ތަފްސީލުކޮށް ދައްކަން ބޭނުންނުވަނީ އެ ދެ ފަރާތަށް އިހުތިރާމް ކުރުމުގެ ގޮތުން ކަމަށެވެ. އަދި މެސީ ދޫކޮށްލަން ބާސާގެ މެނޭޖުމަންޓުން ބޭނުންނުވާ ކަމަށްވެސް ވަނީ ބުނެފައެވެ.

ރިޕޯޓުތައް ބުނާ ގޮތުން އެއްބަސްވުން ބަދަލުކުރުމަށް ބާސާގެ މެނޭޖުމަންޓުން އެއްބަސްނުވެއްޖެ ނަމަ، މެސީގެ ވިސްނުން ހުރީ ޤާނޫނީ ވަކީލުން މެދުވެރިކޮށް ކުރިއަށް ދިޔުމަށެވެ. އެކަމަކު ބާސާއިން އަންނަނީ މެސީގެ އެއްބަސްވުން އިތުރު ދެ އަހަރަށް އާކުރުމަށް މަސައްކަތް ކުރަމުންނެވެ.

މެސީ ބާސާ ދޫކޮށްލާނެ ކަމަށް ބެލެވޭއިރު، ރިޕޯޓުތައް ބުނާ ގޮތުން މެސީ ބަދަލުވުން އެންމެ ގާތީ ޕެޕް ގާޑިއޯ އިރުޝާދު ދެމުން އަންނަ މެންޗެސްޓާ ސިޓީއަށެވެ. އަދި ޕީއެސްޖީ އާއި، މެންޗެސްޓާ ޔުނައިޓެޑް އަދި އިންޓަ މިލާނުންވެސް މެސީއަށް ފާރަލަމުން އަންނަ ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން މެސީ ބާސާ ދޫކޮށްލަން ބޭނުންވާ އެންމެ ބޮޑު އެއް ސަބަބަކީ އެ ކުލަބުގެ ރައީސް ޖޯސެފް މާރިއާ ބާޓޮމެއޫގެ ނިންމުންތަކާ މެދު ހިތްހަމަނުޖެހޭތީއެވެ. އަދި ބާސާގެ ރައީސްގެ މަގާމުގައި ބާޓޮމެއޫ ހުރިހާ ދުވަހަކު މެސީއަށް ބާސާގައި ކުރިމަގެއް ނެތް ކަމަށް އޭނާ ގަބޫލުކުރާ ކަމަށްވެސް ބުނެއެވެ. އެކަމަކު މީގެ ކުރިން ބާސާގެ ރައީސް ޖޯސެފް މާރިއާ ބާޓޮމެއޫ ވަނީ މެސީ ބާސާ ދޫކޮށް ނުދާނެ ކަމަށް ވިދާޅުވެފައެވެ.

މެސީ ބާސާ ދޫކޮށްލާނެ ކަމަށް ބެލެވޭއިރު، ބާސާގެ ކޯޗުގެ މަގާމާ ދާދި ފަހުން ހަވާލުވި ރޮނާލްޑް ކޫމަން ވަނީ އޭނާގެ އުންމީދަކީ ގިނަ އަހަރުތަކެއް ވަންދެން މެސީއާއެކު މަސައްކަތްކުރުން ކަމަށް ބުނެފައެވެ. އެކަމަކު ކޫމަންއާއެކު މެސީ ބޭއްވި ބައްދަލުވުމުގައިވެސް ކުލަބު ދޫކޮށްލަން ނިންމާފައިވާކަން މެސީ ވަނީ ކޫމަންއަށް އަންގާފައެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 634 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.