ބ. އޭދަފުށިން ފުރަތަމަ ފަހަރަށް ދިވެއްސަކު ޕޮޒިޓިވްވެއްޖެ
25 އޯގަސްޓު 2020 | އަންގާރަ 09:41ވައިރަސް އަށް ޕޮޒިޓިވްވީ މާލެ އަތޮޅު ރިސޯޓެއްގައި އުޅެފައި ރަށަށް ދިޔަ މީހެއް
ބ. އޭދަފުށި
ބ. އޭދަފުށީގައި ހޯމް ކަރަންޓީންގައި ހުރި ޒުވާނަކު ކޯވިޑް-19 އަށް ޕޮޒިޓިވްވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ބ. އޭދަފުށީ މަރުކަޒުގެ މަނޭޖަރ މުހައްމަދު ރަޝީދު ވިދާޅުވީ ކޮވިޑަށް ޕޮޒިޓިވްވެފައިވާ ޒުވާނާ އަކީ މާލެ އަތޮޅު ރިސޯޓެއްގައި މަސައްކަތުގައި އުޅުމަށްފަހު ރަށަށް އައި ޒުވާނެއް ކަމަށެވެ. އަދި ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންއާ އެއްގޮތަށް 14 ދުވަހުގެ ކަރަންޓީނުގެ މުއްދަތު ހަމަވުމުން، ނެގި ސާމްޕަލްގެ ނަތީޖާ ޕޮޒިޓިވްވެފައިވާ ކަމަށެވެ.
މުހައްމަދު ރަޝީދު އިތުރަށް ވިދާޅުވީ 14 ދުވަހުގެ ކަރަންޓީނުގެ މުއްދަތު ހުރިއިރު އޭނާގެ ފަރާތުން ކޮވިޑްގެ އެއްވެސް އަލާމާތެއް ނުފެންނަ ކަމަށެވެ. އަދި އޭނާ ވައިރަސް އަށް ޕޮޒިޓިވްވި ނަމަވެސް ހާލު ރަނގަޅު ކަމަށް މުހައްމަދު ރަޝީދު ވިދާޅުވިއެވެ.
ބ. އޭދަފުށިން ދިވެއްސަކު ޕޮޒިޓިވްވެފައިވާއިރު މީގެ ކުރިން އެ ރަށުން ވަނީ ބިދޭސީ ދެމީހަކު ވެސް ވައިރަސްއަށް ޕޮޒިޓިވްވެފައެވެ.
ހެލްތް އިމަރޖެންސީން އޮޕަރޭޝަން ސެންޓަރުން ވަނީ ޕޮޒިޓިވް ކޭސްތައް ފެންނަ ރަށްރަށުގައި މާސްކް އެޅުން މަޖުބޫރު ކޮށްފައެވެ. އަދި ކޮވިޑްގެ ކޭސް ނުފެންނަ ރަށްތަކުގައި ވެސް މާސްކް އެޅުމަށް ވަނީ އިލްތިމާސް ކޮށްފައެވެ.
