ހެލްތް މިނިސްޓްރީގެ ކޮވިޑް-19 އޮޑިޓް ރިޕޯޓް: މާލިއްޔަތު ކޮމެޓީގެ ބައްދަލުވުމުން ޔައުގޫބު ތަނާޒުލް ވެއްޖެ
ޔައުގޫބުގެ އާއިލާ ބޭފުޅެއް ކޮމެޓީއަށް ހާޒިރު ކޮށްފައިވާތީ މަސްލަހަތު ފުށުއަރާތީ ކޮމެޓީން ދޫކުރައްވާ ވަނީ ވަޑައިގަންނަވާފަ
މެމްބަރު ޔައުގޫބު: އާއިލާގެ ބޭފުޅަކަށް ތުހުމަތު ކުރެވޭތީ، އޭނާ ވަނީ ކޮމެޓީގެ ބައްދަލުވުން ދޫކުރައްވާ ތަނާޒުލް ވެވަޑައިގަންނަވާފައި
ހެލްތް މިނިސްޓްރީގެ ކޮވިޑް-19ގެ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓްގައި ފާހަގަކޮށްފައިވާ ކަންކަން ދިރާސާ ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީން އަންގާރަ ދުވަހު ބޭއްވި ބައްދަލުވުމުން ދާންދޫ ދާއިރާގެ މެމްބަރު ޔައުގޫބް އަބްދުﷲ ތަނާޒުލް ވެވަޑައިގެންފިއެވެ.
މާލިއްޔަތު ކޮމެޓީން އަންގާރަ ދުވަހުގެ ބައްދަލުވުން ފެށުމާއެކު ޔައުގޫބް ވިދާޅުވީ، ހެލްތް މިނިސްޓްރީގެ އޮޑިޓް ރިޕޯޓާ ގުޅިގެން އެމިނިސްޓްރީން މައުލޫމާތު އޮޅުފިލުވުމަށް ހާޒިރުވި ބޭފުޅުންގެ ތެރޭގައި އޭނާއާ އާއިލީ ގޮތުން ގުޅިފައިވާ ފަރާތެއް ހިމެނޭތީ މި މައްސަލައާ ގުޅޭ ބައްދަލުވުންތަކުން ތަނާޒުލް ވެވަޑައިގަންނަވާ ކަމަށެވެ.
ކޮމެޓީގެ ބައްދަލުވުމުން ވަޑައިގެންނެވުމުގެ ކުރިން، ޔައުގޫބު ވިދާޅުވީ، މި މައްސަލަ ކޮމެޓީން ބަލުމުގައި އިންސާފާ ހަމަހަމަކަމާއެކު ކުރިއަށް ގެންގޮސް، އެއްވެސް ފަރާތަކާމެދު ފިޔަވަޅު އަޅަންޖެހޭ ކަމަށްވާނަަމަ، ވަކި ބޭފުޅަކަށް ބެލުމެއްނެތި، ފިޔަވަލު އަޅާނެކަމުގެ ޔަގީން އެބައޮތް ކަމަށެވެ.
ހެލްތް މިނިސްޓްރީގެ ކޮވިޑް-19ގެ ޚަރަދުތަކާ ގުޅޭ ކޮމްޕަލަޔަންސް އޮޑިޓް ރިޕޯޓުގައި ބުނެފައިވާ ގޮތުގައި، ވެންޓިލޭޓަރުތައް ގަތުމުގައި ބޮޑެތި އޮޅުވާލުންތައް ވަނީ ހިންގާފައެވެ.
ދުބާއީ އެގްޒެކިއުޓަރސް ޖެނެރަލް ޓްރޭޑިންގ ކުންފުނިން 75 ވެންޓިލޭޓަރު ގަތުމަށް 34 މިލިއަން ރުފިޔާއަށް، އެކުންފުންނާއެކު ސޮއިކުރީ މިއަހަރުގެ އޭޕްރީލް މަހުގެ ދެވަނަ ދުވަހު އެވެ. އަދި އޭޕްރީލް މަހުގެ ތެރޭގައި ދެ ފަހަރެއްގެ މަތިން، އެޑްވާންސްގެ ގޮތުގައި އަގުގެ 90 ޕަސެންޓް ކަމަށްވާ 30.9 މިލިއަން ރުފިޔާ އެކުންފުންޏަށް ހެލްތް މިނިސްޓްރީން ވަނީ ދައްކާފަ އެވެ. އެ ވެންޓިލޭޓަރުތައް ގަތުމުގެ އެއްބަސް ވުމުގައިވާ ގޮތުން 14 ދުވަހުގެ ތެރޭގައި އެ ވެންޓިލޭޓަރުތައް ރާއްޖެ ގެންނަން ޖެހެއެވެ. ނަމަވެސް މިހާތަނަށް އެ ވެންޓިލޭޓަރުތައް ރާއްޖެ ނެގެވިފައެއް ނުވެއެވެ.
