މަނީ ލޯންޑަރިންގެ ތުހުމަތުގައި ފަސް އަހަރުގެ ޖަލު ހުކުމެެއް ތަންފީޒުކުރައްވަމުންގެންދާ ކުރީގެ ރައީސް އަބްދުﷲ މިނިވަންކުރަން ގޮވާލާ އިދިކޮޅު ޕީޕީއެމް/ޕީއެންސީ އިން ކަނޑުމަތީގައި މުޒަހަރާ ކުރަން ފަށައިފިއެވެ.

ޕްރޮގްރެސިވް ކޯލިޝަންގެ އިސްބޭފުޅުންވެސް ބައިވެރިވެވަޑައިގެންނަވާ ކަނޑުމަތީގެ އިހްތިޖާޖުގައި ޕާޓީގެ މެމްބަރުން ދޯންޏެއްގެ އިތުރުން ލޯންޗެއްގައި ދަތުރުކުރަނީ ޔާމީން ހުކުމް ތަންފީޒު ކުރައްވާ މާފުއްޓަށެވެ.

ރާއްޖެ.އެމްވީއާ ވާހަކަ ދައްކަވަމުން ޕީއެންސީގެ ނައިބް ރައީސް އިބްރާހިމް ޝުޖާއު ވިދާޅުވީ، ކަނޑުމަތީގެ އިހްތިޖާޖުގައި ޕާޓީގެ 100ށް ވުރެ ގިނަ މެމްބަރުން ބައިވެރިވާ ކަމަށާއި، ބައިވެރިން މާފުއްޓަށް ގޮސް އެ ރަށު ފަޅުތެރޭގައި ރައީސް ޔާމީން މިނިވަން ކުރަން ގޮވާލާ މުޒާހަރާ ކުރާނެ ކަމަށެވެ. އޭނާ ވިދާޅުވީ، އެ އިހްތިޖާޖްތައް ކުރިއަށްގެންދަނީ އެޗްޕީއޭގެ ގައިޑްލައިންތަކާއި އެއްގޮތަށް ކަމަށެވެ. އިދިކޮޅުން ބުނީ، މާފުށީގައި އިހްތިޖާޖުކުރުމަށް ފަހު މުޒާހަރާގެ ބައިވެރިން މާލެ ފުރާނީ ހަވީރު ފަހެއް ޖަހާއިރު ކަމަށެވެ.

ޔާމީން ގޮވާލާ އިދިކޮޅުން މުޒާހަރާ ކުރަން ފަށާފައިވާއިރު އެމަނިކުފާނު މިނިވަން ކުރަން ގޮވާލާ ހުކުރު ދުވަހު އަތޮޅު ތެރޭގައި މުޒާހަރާ ކުރަން އިދިކޮޅުން ވަނީ ނިންމާފައެވެ. އިދިކޮޅުން ވަނީ މީގެ ކުރިންވެސް ރައީސް ޔާމީން މިނިވަން ކުރަން ގޮވާލަ މާލޭގެ މަގުމަތީގައިވެސް މުޒާހަރާ ކޮށްފައެވެ.