މާލީ ވުޒާރާއިން ހާމަކަން ބޮޑުކުރަނީ: ޕީ.އެސް.އައި.ޕީ މަޝްރޫތަކަށް ފައިސާ ދޫކުރުމަށް ހާއްސަ ޕޯޓަލްއެއް!

ޕީ.އެސް.އައި.ޕީ ޕޯޓަލްއެއް ތައާރަފްކޮށް، ދައުލަތުގެ ބަޖެޓުން ހަރަދު ކުރާ މަޝްރޫތަކަށް ފައިސާ ދޫކުރުން ޕޯޓަލްގެ ޒަރީޔާއިން ކުރިޔަށް ގެންދިއުމަށް މާލީ ވުޒާރާއިން ނިންމައިފިއެވެ.

މިކަމާއި ގުޅިގެން ހޯމަ ދުވަހު މާލީ ވުޒާރާއިން ނެރުނު މާލިއްޔަތާއި ބެހޭ ސަރކިއުލާއެއްގައި ވަނީ، ދައުލަތުގެ ބަޖެޓުން ޚަރަދުކޮށްގެން ހިންގާ ޕީ.އެސް.އައި.ޕީ މަޝްރޫޢުތަކާއި، އެ ނޫންވެސް ގޮތްގޮތުން ދައުލަތާއި އެކު އެކި ފަރާތްތަކުން ކޮންޓްރެކްޓް ހެދިގެން ކުރިއަށްގެންދާ މަސައްކަތްތަކުގެ ކޮންޓްރެކްޓްތަކުގެ މައުލޫމާތުތައް ޕޯޓަލް މެދުވެރިކޮށް އަޅުއްވަމުން ގެންދެވުމަށް ދައުލަތުގެ އެންމެހާ އިދާރާތަކަށް އަންގާފައެވެ.

އެކަމަށް ވަކި މުހުލަތެއް ދީފައިވާއިރު، 31 އޯގަސްޓް 2010 ގެ ނިޔަލަށް މާލީ ވުޒާރާގެ ޕޯޓަލް bandeyri.egov.mv އަށް މައުލޫމާތު އެޅޭނެއެވެ. ސަރކިއުލާގައި ވާގޮތުން، މުއްދަތުގެ ފަހުން ފައިސާ ދޫކުރެވެމުންދާނީ، ޕޯޓަލް މެދުވެރިކޮށް މައުލޫމާތު ހުށަހަޅުއްވާ ފަރާތްތަކަށް އެކަންޏެވެ.

މާލީ ވުޒާރާއިން ބުނީ، ޕޯޓަލް ޑިވެލޮޕްކުރި މައިގަނޑު މަގްސަދަކީ ދައުލަތުގެ އިދާރާތަކުން ހިންގަމުންދާ ޕީ.އެސް.އައި.ޕީ މަޝްރޫއުތަކުގެ ފައިނޭންޝަލް މޮނިޓަރިންގެ މަސައްކަތްތައް ކޮށް ހާމަކަން ބޮޑު ކުރުމަށް ކަމަށެވެ.