މިހާރު އަޅަމުންދާ ފިޔަވަޅުތަކުގެ ސަބަބުން އިގްތިސާދު އިތުރަށް ހަލާކުވަމުންދާ ކަމަށް ބުނެ ކުއްލި މައްސަލަ
މިހާރު އަޅަމުންދާ ފިޔަވަޅުތަކުގެ ސަބަބުން ބަންގުރޫޓުވެދާނެ ކަމުގެ ބިރު އެބައޮތް ކަމަށް ވިދާޅުވި
ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ
ކޮވިޑް-19 އާ ގުޅިގެން ސަރުކާރުން މިހާރު އަޅަމުންދާ ފިޔަވަޅުތަކުގެ ސަބަބުން އިގްތިސާދު އިތުރަށް ހަލާކުވަމުންދާ ކަމަށް ވިދާޅުވެ ނޮޅިވަރަމް ދާއިރާގެ މެމްބަރު މުހްމަދު ނަޝީދު އަބްދުﷲ ކުއްލި މައްސަލައެއް ހުށައަޅުއްވައިފިއެވެ.
މެމްބަރު ހުށައެޅުއްވި ކުއްލި މައްސަލައިގައި ކޮވިޑް-19 ގެ ހާލަތާ ގުޅިގެން އެބަލި ކޮންޓްރޯލް ކުރުމަށްޓަކާ ސަރުކާރުގެ އިދާރާތަކުން މިހާތަނަށް ވެސް ގިނަގުނަ ކަންތައްތަކެއް ކޮށްފައިވާކަން ފާހަގަކުރައްވާ ވިދާޅުވީ ސަރުކާރުގެ އިދާރާތަކުގެ އިރުޝާދުތަކާ އެއްގޮތަށް ދިވެހި ރައްޔިތުންނާއި ވިޔަފާރިތަކުން އަމަލު ކުރަމުން ގެންގޮސްފައިވަނީ މި ބަލީގެ ސީރިއަސްކަން ދެނެގަނެ، ރައްކާތެރިކަމުގެ ފިޔަވަޅުތަކަށް ތަބާވުމަކީ ފަރުދީ ޒިންމާއެއް ކަމަށް ދެކިގެން ކަމަށެވެ.
އަދި މާލެ ލޮކްޑައުންގައި އޮތްއިރު ވެސް މާ ބޮޑެތި ޝަކުވާތަކެއް ކުރުމެއް ނެތި ސަރުކާރުގެ އިރުޝާދުތަކާ އެއްގޮތަށް އަމަލުކުރުންމަތީ ރައްޔިތުން ގޭގައި ތިބުމުގެ ނަތީޖާއެއްގެ ގޮތުން ގިނަ އަދަދެއްގެ ކުދި ވިޔަފާރިތައް ބަނގުރޫޓުވެފައިވާ ކަމަށް ވެސް ވިދާޅުވިއެވެ.
މެމްބަރު ނަޝީދު ވިދާޅުވީ މިކަމުގައި ވިޔަފާރިތަކަށް އެހީތެރިކަމެއް ފޯރުކޮށްދޭނެ ކަމަށް ސަރުކާރުން ބުނިނަމަވެސް، އެއްވެސް ކަހަލަ އެހީތެރިކަމެއް ނުލިބޭ އެތަކެއް ބައިވަރު ކުންފުނިތައް މިހާރު ވެސް އެބަހުރި ކަމަށެވެ. އަދި މިކަން މިހެން އޮއްވާ ސަރުކާރުގެ ފަރާތުން މިހާރު އަޅަމުންދާ ފިޔަވަޅުތަކުގެ ސަބަބުން ވަރަށް ދަތިހާލެއްގައި ހިންގަމުންދާ އެތަކެއް ކުދި ވިޔަފާރިތަކެއް އިތުރަށް ބަގުރޫޓްވެ އެކަމުގެ ސަބަބުން އެތައް ހާސް ރައްޔިތުންނަށް ފޫނުބެއްދޭ ވަރުގެ ގެއްލުންތަކެއް ކުރިމަތިވެދާނެ ކަމަށް ބެލެވޭ ކަމަށް ވެސް އޭނާ ވިދާޅުވިއެވެ.
ކުއްލި މައްސަލަ ހުށައަޅުއްވަމުން މެމްބަރު އިތުރަށް ވިދާޅުވީ ޑޮލަރު ގަންނަން ލިބޭ ރޭޓް އިންތިހާއަށް ބޮޑުވެ، ޑޮލަރު ލިބުމަށް ވެސް ބޮޑެތި ހުރަސްތަކެއް ކުރިމަތިވެފައިވާ މި ދަނޑިވަޅުގައި، ގައުމުގެ އިގްތިސާދު ރަގަޅު ކުރުމަށްޓަކައި އެކަށީގެންވާ ފިޔަވަޅުތަކެއް އެޅުމުގެ ބަދަލުގައި، ސަރުކާރުން އަޅަމުން ގެންދަނީ އިގްތިސާދު އިތުރަށް ހަލާކުވާނެފަދަ ކަންކަން ކަމަށެވެ.
