ހެލްތް މިނިސްޓްރީގެ ބިޑް ކޮމެޓީގެ ޗެއަރ، މާލިއްޔަތު ކޮމެޓީއަށް ވަޑައި ނުގެންނެވި، ކޮމެޓީން އަމުރެއް ނެރެނީ!
ބިޑު ކޮމެޓީގެ ޗެއަރ ނިޝާމާ އާއި ފައިނޭންޝަލް ކޮންޓްރޯލަރ އަސްލަމް ވެސް ވަނީ ކޮމެޓީއަޢް ވަޑައިގެންނެވުމަށް އުޒުރުވެރިވެފައި
ހެލްތް މިނިސްޓަރުގެ ނައިބު ނިޝާމާ މުހައްމަދު: ނިޝާމާއަކީ ހެލްތް މިނިސްޓްރީގެ ބިޑް ކޮމެޓީގެ ރައީސް
ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާ ކަމަށް ކުރެވޭ ތުހުމަތުގައި، ހެލްތް މިނިސްޓްރީގެ ބިޑް ކޮމެޓީގެ ޗެއަރ އަދި ހެލްތް މިނިސްޓްރުގެ ނައިބު ނިޝާމާ މުހައްމަދު ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ވަޑައިގެންނެވުމަށް އުޒުރުވެރި ވެއްޖެ އެވެ.
ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގައި، ދައުލަތުން މާލިއްޔާއިން 30.9 މިލއަން ރުފިޔާ ދެއްކުމަށްފަހު، އެ ވެންޓިލޭޓަރުތައް ލިބިފައިނުވާ މައްސަލާގައި ކަން ހިނގާދިޔަގޮތް ދިރާސާކުރުމަށް، ހެލްތް މިނިސްޓްރީގެ ކަމާ ގުޅުހުރި ފަރާތްތަކާއެކު ރައްޔިތުންގެ މަޖިލީހުގެ މާލިއްޔަތު ކޮމެޓީން ހޯމަ ދުވަހު ބާއްވަން އުޅުނު ބައްދަލުވުމަށް ވަޑައިގެންނެވުމަށް އުޒުރުވެރިވެފައިވަނީ، ނިޝާމާގެ އިތުރުން، ޑައިރެކްޓަރ ފައިނޭންޝަލް އެގްޒެކެޓިވް އަހުމަދު އަސްލަމް އެވެ.
ނަމަވެސް މާލިއްޔަތު ކޮމެޓީގެ މުގައްރިރު މުހައްމަދު ނާޝިޒު ވިދާޅުވީ، ކޮވިޑް-19 އާ ގުޅޭ ހެލްތް މިނިސްޓްރީގެ އޮޑިޓް ރިޕޯޓާ ގުޅިގެން ކަމާ ގުޅުން ހުރި ހެލްތް މިނިސްޓްރީގެ 11 ބޭފުޅަކު މާލިއްޔަތު ކޮމެޓީއަށް ވަޑައިގަންނަވާނެ ކަމަށް އާދިއްތަ ދުވަހު މާލިއްޔަތު ކޮމެޓީއަށް އަންގާފައިވާ ކަމަށެވެ.
ނާޝިޒު އެގޮތަށް ވިދާޅުވުމާއެކު، ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ ވިދާޅުވީ، މި ބައްދަލުވުމަށް ބޭނުންވާ އެންމެ މުހިއްމު ދެ ބޭފުޅުންނަކީ، ބިޑް ކޮމެޓީގެ ޗެއާރ އާއި ފައިނޭންޝަލް އެގްޒެކެޓިވް ކަމަށެވެ.
މި މައްސަލައާ ގުޅިގެން ތިމަރަފުށި ދާއިރާގެ މެމްބަރު އަބްދުﷲ ރިޔާޒު ވިދާޅުވީ، މައްސަލައާ ގުޅޭ ހުރިހާ ލިޔުމެއް އަދި ލިބިފައިނުވާ ކަމަށެވެ. އެގޮތުން، ވެންޓިލޭޓަރުތައް ގަތުމަށް އެއްބަސްވި އެގްރީމެންޓާއި ޑަބްލިޔުއެޗްއޯއާއެކު ހިންގާފައިވާ ލިޔެކިޔުންތައް ލިބެންޖެހޭ ކަމަށެވެ. ނަމަވެސް ކޮމެޓީއަށް އެ ލިޔެކިޔުންތައް ވެސް ލިބިފައިނުވާ ކަމަށް ރިޔާޒު ވިދާޅުވި އެވެ.
ކޮމެޓީގެ މުގައްރިރު ވިދާޅުވީ، އަންގާރަ ދުވަހު ބާއްވާ ކޮމެޓީގެ ބައްދަލުވުމަށް ވަޑައިގަންނަވާއިރު، އެލިޔެކިޔުންތައް ކޮމެޓީއަށް ފޯރުކޮށްދިނުމަށް ހެލްތް މިނިސްޓްރީގައި އެދިފައިވާ ކަމަށެވެ.
ޏާޝިޒު ވިދާޅުވީ، އަންގާރަ ދުވަހު ބާއްވާ ކޮމެޓީއަށް ކަމާގުޅޭ ލިޔެކިޔުންތަކާއި، ކލަމާބެހޭ ބޭފުޅުން ކޮމެޓީއަށް ހާޒިރު ކުރުމުގެ މަސައްކަތް މަޖިލީހުގެ ގަވާއިދުގައިވާ ގޮތުގެ މަތިން ކުރިއަށް ގެންދާނެ ކަމަށެވެ.
ކޮމިޓީ ބައްދަލުވުމަށް ހާޒިރުވުމަށް ހެލްތު މިނިސްޓްރީއަށް މަޖިލީހުގެ އިދާރާއިން ދަންނަވާފައިވާ ދެންނެވުމަށް ހެލްތު މިނިސްޓްރީން މަޖިލީހުގެ އިދާރާއަށް ފޮނުއްވާފައިވާ ސިޓީގައި ކޮމިޓީ ބައްދަލުވުމަށް ހެލްތު މިނިސްޓަރ އަބްދުﷲ އަމީންގެ އިތުރުން މިނިސްޓްރީގެ 10 ބޭފުޅަކު ހާޒިރުވާނެކަމަށް ވަނީ ބުނެފައެވެ.
އޭގެތެރޭގައި ހިމެނެނީ ޑެޕިޔުޓީ މިނިސްޓަރ ކަމުގައި ތިއްބެވި އަބޫބަކުރު އަބްދުލްކަރީމް އާއި ނިޝާމާ މުހައްމަދު އެވެ. އަދި ޕާރމަނަންޓް ސެކެޓްރީ އައިޝަތު ސާމިޔާ، ޑެޕިޔުޓީ ޑިރެކްޓަރ ޖެނެރަލް އަހުމަދު ޤާސިމް އާއި ތަސްލީމާ އެވެ. އަދި ލީގަލް އޮފިސަރުންގެ މަގާމުގައި ތިއްބެވި އަލީ ޝިހާމް އާއި އަހުމަދު އަސްލަމް އާއި ފައިނޭންޝަލް އެގްޒެކެޓިވް ޑިރެކްޓަރ އަހުމަދު އަސްލަމްވެސް ކޮމިޓީއަށް ހާޒިރުވާނެކަމަށް ސިޓީގައި ބުނެފައިވެއެވެ. އަދި އެސިސްޓެންޓް ޑިރެކްޓަރ ފާތުމަތު ލިމްޔާ އާއި އެސިސްޓެންޓް ބަޔޯމެޑިކަލް އިންޖިނިއަރ ހާޝިމް އަބޫބަކުރުވެސް ކޮމިޓީއަށް ހާޒިރުވާ ބޭފުޅުންގެ ތެރޭގައި ހިމެނެއެވެ.
އޮޑިޓް ރިޕޯޓާއި ގުޅިގެން ހެލްތު މިނިސްޓްރީގެ ބިޑް ކޮމިޓީ އާއި އެ މިނިސްޓްރީގެ ފައިނޭންޝަލް އެގްޒެކެޓިވްސް އަދި ވެންޓިލޭޓަރުތައް ގެނައުމާ ގުޅޭ އެއްބަސްވުންތަކުގައި ސޮއިކުރެއްވި ވެރިން ވަނީ ސަސްޕެންޑްކޮށްފަ އެވެ. އަދި ހެލްތު މިނިސްޓަރ ވަނީ މިމައްސަލަ ބަލާ ނިމެންދެން އަމިއްލައަށް މަސައްކަތުން އެކަހެރިވެވަޑައިގަންފައެވެ.
ހެލްތު މިނިސްޓްރީގެ އޮޑިޓު ރިޕޯޓުން ކޮވިޑާ ގުޅިގެން ރާއްޖެ އަށް ބޭނުންވާ 75 ވެންޓިލޭޓަރެއް ގެންނަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކުރުމުގައި ބޮޑެތި އޮޅުވައިލުންތަކާއި ޖަރީމާތަކެއް ހިންގާފައިވާ ކަމަށް ތުހުމަތު ކުރެވޭ މައްސަލަ ވަނީ ފެންމަތިވެފައެވެ. އެ ކުންފުންޏާ އެކަން ހަވާލުކުރީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ މެދުވެރިކޮށް ކަމަށް ހެލްތު މިނިސްޓްރީން އެންމެ ކުރިއްސުރެ ބުނަމުން އައި ވާހަކަތައް ވެސް އޮޑިޓަ ޖެނެރަލް ހަސަން ޒިޔަތު ނެރުއްވި ރިޕޯޓުގައި ވަނީ ދޮގުކޮށްފަ އެވެ.
ދުބާއީގެ އެގްޒެކިއުޓާސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުނި ވެސް މެ އެވެ. އެ މީހުން ވެންޓިލޭޓަރެއް ގެނެސްދެނީ 32،500 ޑޮލަރަށެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށް ވާއިރު އަގުގެ 90 ޕަސެންޓަށްވާ 30.9 މިލިއަން ރުފިޔާ ސަރުކާރުން ވަނީ ދައްކާފައެވެ.
