މިހާތަނަށް ބޭރުގައި އުޅުނު 2500ށް ވުރެން ގިނަ ޒުވާނުންނަށް ފިޔަވަޅު އަޅައިފި
މީގެ ތެރެއިން ބައެއް މީހުން ތަކުރާރުކޮށް ބޭރުގައި އުޅޭކަން ފާހަގަވޭ
މާލޭގެ މަގުމަތި
އޮގަސްޓު މަހުގެ މިހާތަނަށް ކާފިއު ގަޑީގައި ބޭރުގައި އުޅުނު 2500ށްވުރެ ގިނަ ޒުވާނުންނަށް ފިޔަވަޅު އަޅާފައިވާ ކަމަށް މޯލްޑިވްސް ޕޮލިސް ސާރވިސް އިން ބުނެފިއެވެ.
އާދިއްތަ ދުވަހުގެ ރޭ ހެލްތު އިރމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސުޕްރިޑެންޓެންޓް އޮފް ޕޮލިސް، އަބްދުﷲ ޝަރީފް ވިދާޅުވީ، ކާފިއު އިއުލާނުކޮށް، ވަކި ވަގުތެއްގައި ބޭރަށް ދިއުން މަނާކުރުމާއެކު ބޭރަށް ނުކުމެ އުޅޭ އެއް އުމުރު ފުރައެއްގެ މީހުން ފާހަގަކުރެވިފައިވާ ކަމަށެވެ. އެގޮތުން އޮގަސްޓް ހަތަރު ވަނަ ދުވަހުން ފެށިގެން އޮގަސްޓް 23 ވަނަ ދުވަހުގެ ނިޔަލަށް ކާފިއު ގަޑީގައި ބޭރުގައި އުޅެގެން 18 އަހަރާއި 41 އަހަރާއި ދެމެދުގެ 2869 މީހުންނަށް ފިޔަވަޅު އަޅާފައިވާ ކަމަށް ޝަރީފް ވިދާޅުވިއެވެ.
މީގެ އިތުރުން އުމުރުން 41 އަހަރާއި 65 އަހާރާއި ދެމެދުގެ 291 މީހަކަށް ފުލުހުން ފިޔަވަޅު އަޅާފައިވާ ކަމަށާއި އުމުރުން 18 އަހަރުން ދަށުގެ 87 ކުއްޖަކަށް ފިޔަވަޅު އަޅާފައިވާ ކަމަށް ޝަރީފް ވިދާޅުވިއެވެ. އުމުރުން 65 އަހަރުން މަތީގެ މީހުންގެ ތެރެއިން ކާފިއު ވަގުތު ބޭރުގައި އުޅެގެން ފިޔަވަޅު އަޅާފައިވަނީ ދެ މީހަކަށެވެ.
ފުލުހުން ވަނީ އޮގަސްޓް 23 ވަނަ ދުވަހުގެ ނިޔަލަށް ކާފިއު ގަޑީ ބޭރުގައި އުޅުނު 3249 މީހުންނަށް ފިޔަވަޅު އަޅާފައިއެވެ.
ޝަރީފް ވަނީ މިގޮތަށް އެޓެންޑު ކުރެވޭ މީހުންގެ ތެރެއިން ބައެއް މީހުންނަށް ތަކުރާރުކޮށް އެޓެންޑްވާން ޖެހޭ ކަމަށް ފާހަގަކޮށް، 354 މީހުންނަށް ދެ ފަހަރު އެޓެންޑްކޮށްފައިވާ ކަން ފާހަގަކޮށްފައެވެ. އަދި 79 މީހަކަށް ތިން ފަހަރު އެޓެންޑުކޮށްފައިވާއިރު، 24 މީހަކަށް ހަތަރު ފަހަރު، އަށް މީހަކަށް ފަސް ފަހަރު، ދެ މީހަކަށް ހަ ފަހަރު އަދި އެކަކަށް ހަތް ފަހަރުމަތިން އެޓެންޑުކޮށްފައިވާ ކަމަށް ޝަރީފް ފާހަގަކުރެއްވިއެވެ.
