މި ދަނޑިވަޅުގައި އިހުތިޖާޖު ނުކުރުމަށް ފުލުހުން އެދިއްޖެ
24 އޯގަސްޓު 2020 | ހޯމަ 02:04މިއީ އިހުތިޖާޖު ކުރުމަށް އެންމެ ރަނގަޅު ވަގުތު ނޫން ކަމަށް ވިދާޅުވި
ސްޕްރިޑެންޓް އޮފް ޕޮލިސް އަބްދުﷲ ޝަރީފު
ކޮވިޑް-19 ގެ ކޭސްތައް އިތުރުވަމުންދާ މި ދަނޑުވަޅުގައި އިހުތިޖާޖު ނުކުރުމަށް ފުލުހުން އެދިއްޖެއެވެ.
އާދިއްތަ ދުވަހުގެ ރޭ ހެލްތް އިމްޖެންސީ އޮޕަރޭޝަން ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ސްޕްރިޑެންޓް އޮފް ޕޮލިސް އަބްދުﷲ ޝަރީފު ވިދާޅުވީ ބައެއް ފަރާތްތަކުން އިހުތިޖާޖު ކުރުމުގެ ވާހަކަ ތަކެއް ފެތުރެމުންދާ ކަމަށާއި އަދި އެކަން ސޯޝަލް މީޑިއާގައިވެސް އިޝްތިހާރު ކުރަމުންދާ ކަމަށެވެ.
އަދި މިއީ އިހުތިޖާޖު ކުރުމަށް އެންމެ ރަނގަޅު ވަގުތު ނޫން ކަމަށާއި ޤާނޫނުތަކުންވެސް މިވަގުތު އިހުތިޖާޖު ކުރުމަށް ހުއްދަ ނޫން ކަމަށެވެ.
ކޮވިޑް-19 ގެ ނުރައްކާ ބޮޑުވެފައިވާ މިދަނޑިވަޅުގައި މަގުމައްޗަށް ގިނަ އަދަދެއްގެ ބަޔަކު ނުކުތުމަކީ އަނެއްކާވެސް މިކަމަށް އެޅިގެންދާ ނުރައްކަލެއްކަން އޭނާ ފާހަގަ ކުރެއްވިއެވެ.
މި އުނދަގޫ ހާލަތުގައި މަސައްކަތް ކުރަމުންދާއިރު ފުލުހުން ކުރާ މަސައްކަތުގައި ފުލުހުންނަށްވެސް އޭގެ އަސަރުތަކެއް ކުރަމުންދާކަން އޭނާ ފާހަގަ ކުރެއްވިއެވެ.
އެގޮތުން މުޒާހަރާތައް ނުވަތަ އިހުތިޖާޖުތައް ކޮންޓްރޯލް ކުރުމަށް ފުލުހުން ނެރުމުން އެ ފުލުހުންވެސް ކަރަންޓީން ކުރުމާއި އައިސޮލޭޓް ކުރަންޖެހޭކަމަށް ޝަރީފް ވިދާޅުވިއެވެ.
އެހެން ކަމުން ހުރިހާ ފަރާތްތަކުންވެސް ކޮވިޑުން ރައްކާތެރިވުމަށް އިޖުތިމާއީ ގައިދުރުކަން ބެހެއްޓުމަށްޓަކައި އެއްވެ ނޫޅުމަށް ޝަރީފް ވަނީ އިލްތިމާސް ކުރައްވާފައެވެ.
ޝަރީފް މިހެން ވިދާޅުވެފައިވާއިރު އަންނަ ހުކުރު ދުވަހު މާލެ ސަރަހައްދު ފިޔަވައި ރާއްޖޭގެ ހުރިހާ ސަރަހައްދެއްގައި ސަރުކާރާ ދެކޮޅަށް މުޒާހަރާ ކުރަން އިދިކޮޅު ޕީޕީއެމް/ ޕީއެންސީ ކޯލިޝަނުން ވަނީ ނިންމާފައެވެ.
