"ހަތަރު ރަށެއްގައި އެޅި ފަތާ ޓްރެކްތަކާއެކު ފުޅާ ދާއިރާއެއްގައި ފެތުމުގެ ހަރަކާތްތައް ފެށިގެންދާނެ"

ކުޅިވަރު އެތުލީޓުނަށް މުޅި ރާއްޖޭގައި ކުޅިވަރުގެ ދާއިރާއިން ފަހި ފުރުސަތުތަކެއް ހޯދައިދިނުމަށް ކުރަމުންދާ މަސައްކަތުގެ ތެރެއިން، ހަތަރު ރަށެއްގައި ފަތާ ޓްރެކް އަޅައި، ފެތުންތެރިންނަށް ފެތުމުގެ އިންތިޒާމު ހަމަޖައްސައިފިއެވެ.

ކުޅިވަރާ ބެހޭ ވުޒާރާއިން ވަނީ ސްވިމިންގ އެސޯސިއޭޝަން އޮފް މޯލްޑިވްސްއާ ގުޅިގެން ހަތަރު ރަށެއްގައި ފަތާ ޓްރެކް އަޅާފައެވެ. އެއީ އައްޑޫ ސިޓީ ފޭދޫ، އައްޑޫ ސިޓީ މީދޫ، ހދ. ކުޅުދުއްފުށި އަދި ހއ. ދިއްދޫގައެވެ.

އާދީއްތަ ދުވަހު ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ދުޅަހެޔޮ ސިއްހަތެއްގައި ތިބުމަށް މި ޓްރެކްތަކުގެ ބޭނުން ހުރިހާ އެންމެންވެސް އެންމެ ފުރިހަމައަށް ހިފާނެ ކަމަށް އުންމީދު ކުރައްވާ ކަމަށާއި، މި ރަށްރަށުގައި ފެތުމުގެ ދާއިރާއިން ހުނަރުވެރި ފެތުންތެރިންތަކެއް އުފެދޭނެ ކަމަށް އުންމީދު ކުރައްވާ ކަމަށެވެ.

އަދި އަންނަ އަހަރުވެސް ރާއްޖޭގެ އެކި ކަންކޮޅުތަކުގައި ޓްރެކްތައް އެޅުމުގެ މަސައްކަތް ކުރިއަށް ގެންދަވާނެ ކަމަށާއި، އެގޮތުން މިހާރުވެސް ޓްރެކް އެޅުމަށް ބައެއް ރަށްތައް ފާހަގަކޮށްފައިވާ ކަމަށް ވަޒީރު ވިދާޅުވިއެވެ.

މިކަމާ ގުޅިގެން "ރާއްޖެ.އެމްވީ" އަށް ދެއްވި އިންޓަވިއުއެއްގައި ސްވިމިންގ އެސޯސިއޭޝަނުގެ ނައިބު ރައީސް އިސްމާއިލް އަލީ ވިދާޅުވީ އަލަށް އެޅި ފަތާ ޓްރެކްތަކާއެކު މުޅި ރާއްޖޭގައި މަތީ ފެންވަރުގެ ފެތުންތެރިން ތަމްރީނު ކުރުމަށް ކުރަމުންދާ މަސައްކަތަށް ބޮޑު ކުރިއެރުމެއް ލިބިގެންދާނެ ކަމަށާއި، މިއީ މުޅި ފެތުމުގެ އާއިލާއަށް ލިބިގެންދިޔަ ބޮޑު ކުރިއެރުމެއް ކަމަށެވެ.

ރާއްޖޭގެ އެކި ކަންކޮޅުތަކުގައި ފަތާ ޓްރެކް އެޅުމުގެ މަސައްކަތް ކުޅިވަރާ ބެހޭ ވުޒާރާއިން ކުރިއަށް ގެންދަނީ ސްވިމިންގ އެސޯސިއޭޝަނާ ގުޅިގެންނެވެ. އެގޮތުން ހަތަރު ރަށެއްގައި ފަތާ ޓްރެކް އެޅިއިރު، މީގެ ތެރެއިން ކުޅުދުއްފުއްޓާއި ދިއްދޫގައި ސްވިމިންގެ ވައިޑީޕީ ޕްރޮގްރާމު ފަށާފައިވާއިރު، ތަމްރީނު ލިބިފައިވާ ސްވިމިންގ އިންސްޓްރަކްޓަރުން ދަނީ މަސައްކަތް ކުރަމުންނެވެ.

ކޮވިޑް-19 ގެ ހާލަތަށް ލުޔެއް ލިބުމާއެކު، އައްޑޫ ސިޓީގައި ސްވިމިންގ އިންސްޓަކްޓަރުން ތަމްރީނު ކުރުމުގެ މަސައްކަތް ފެށިގެންދާނެ ކަމަށާއި، އެ އާއެކު އައްޑޫ ސިޓީގައިވެސް ވައިޑީޕީގެ ޕްރޮގްރާމުތައް ފެށިގެންދާނެ ކަމަށް ސްވިމިންގ އެސޯސިއޭޝަނުން ބުނެއެވެ.