މަސްވެރިންނަށް މިދިޔަ 16 ދުވަހުގެ ފައިސާ އޮތީ ނުދެވި، މާދަމާ ދޫކުރަން ފަށާނަން: މިފްކޯ
22 އޯގަސްޓު 2020 | ހޮނިހިރު 09:1441 މިލިއަނާއި ގާތްކުރާ އަދަދަކަށް ފައިސާ ނުދެވި އެބަހުރި
މަސްދޯންޏެއް ކަނޑުމަތީ މަސްވެރިކަން ކުރަނީ
މިދިޔަ 16 ދުވަހުގެ ފައިސާ މަސްވެރިންނަށް ނުދެވި އެބަހުރި ކަމަށާއި އެ ފައިސާ މާދަމާއިން ފެށިގެން ދޫކުރާނެކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
ކޫއްޑޫގައި މަސްވެރިންގެ ބަޔަކު އިހުތިޖާޖުކުރުމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން ފައުޒީ ވިދާޅުވީ، ކޮވިޑްގެ ހާލަތާއި ގުޅިގެން ބޭރު ދުނިޔޭގެ މާކެޓްގައި މަހުގެ އަގު ވެއްޓިފައިވާކަމަށާއި، އެކަމަށް ބެލުމެއްނެތި މިފްކޯއިން ދިޔައީ ކުރިންވެސް ގަންނަ އަގުގައި މަސްވެރިން އަތުން މަސްގަންނަމުން ކަމަށެވެ. އަދި މަސްވެރިންނަށް ފައިސާ ދިނުމުގައި ލަސްތަކެއް ހުރިކަން ގަބޫލުކުރައްވާކަމަށް އޭނާ ވިދާޅުވިއެވެ.
އެގޮތުން، މިހާރު ފައިސާ ނުދެވި ހުރީ މި ހިނގާ އޯގަސްޓް މަހުގެ 3 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށް ކަމަށާއި އެ 16 ދުވަހުގެ ފައިސާ މާދަމާއިން ފެށިގެން ދޫކުރާނެކަމަށް ފައުޒީ ވިދާޅުވިއެވެ. ކޫއްޑޫގައި މަސްވެރިންގެ ކަންބޮޑުވުންތަކަށް އަލިއަޅުވައި ފައުޒީ ވިދާޅުވީ، މިފްކޯއިން އެ ދޯނީގެ މީހުންނާއި މަޝްވަރާ ކުރަމުން ގެންދިއަކަަމަށެވެ. ނަމަވެސް، ހުރިހާ ދުވަހަކަށް ވާ ފައިސާ އެއްކޮށް ދިނުމުން މެނުވީ މުޒާހަރާ ކުރުން ހުއްޓާނުލާނެކަމަށް ބުނި ކަމަށް ފައުޒީ ވިދާޅުވިއެވެ.
16 ދުވަހަށް، 41 މިލިއަނާއި ގާތްކުރާ އަދަދަކަށް މަސްވެރިންނަށް ފައިސާދޭން ޖެހޭއިރު، މިފްކޯއަށް ދުވަހުން ދުވަހަށް ފައިސާ ދިނުމުގެ އިންތިޒާމް ކުންފުނީގައި ނެތްކަން ފައުޒީ ފާހަގަކުރެއްވިއެވެ. އެގޮތުން، ގިނަ ދުވަސްތަކެއް ވަންދެން ނަގައިފައި ހުރި ލޯންތައްވެސް ދެއްކުމުގެ މަސައްކަތް ކުރަމުން އަންނަ ކަމަށާއި ލޯންތައް ދައްކައި ނިމޭނެކަމަށް އަންދާޒާކުރެވެނީ 2022ގައި ކަމަށެވެ. އަދި މަސްވެރިންގެ ދަތިތައް ހައްލުކުރުމަށް އޯވަރޑްރާފްޓް ފެސިލިޓީ ބޭންކްތަކުން ކުންފުންޏަށް ހަމަނުޖެހެނީވެސް އެެ ސަބަބާއި ހުރެކަން އޭނާ ފާހަގަކުރެއްވިއެއެވެ.
މިކަމާއި ގުޅިގެން ފިޝަރީޒް މިނިސްޓަރ ޒަހާ ވަހީދު ރާއްޖެއެމްވީއަށް މައުލޫމާތު ދެއްވަމުން ވިދާޅުވީ، އެޗްޕީއޭގެ މިންގަޑާއި ހިލާފަށް މުޒާހަރާކުރުމަކީ ހިތާމަހުރި ކަމެއްކަމަށާއި އެެއްބައެއްގެ ސަބަބުން ބަލިމަޑުކަން އޮއްވައި ކަމެއް ދިމާވެ ކާރުޙާނާ ހުއްޓާލަން ޖެހިއްޖެނަމަ ހުރިހާ މަސްވެރިންނަށް ދަތިތަކާއި ކުރިމަތިލާންޖެހޭނެކަމަށެވެ. އަދި މިކަމުގައި ކުރިންވެސް އޮންނަ އުސޫލާއި އެއްގޮތަށް، ދޯންޏަކުން އެއް ބޭފުޅަކު ފޭބުމަށް މިނިސްޓަރ އިލްތިމާސްކުރެއްވިއެެވެ.
އިތުރަށް ވާހަކަ ދައްކަވަމުން މިނިސްޓަރ ވިދާޅުވީ، ކޮވިޑް-19ގެ ސަބަބުން ރާއްޖޭގެ އިގްތިސާދު ނާޒުކު ހާލަތައް ވެއްޓިފައިވާ މި ދަނޑިވަޅުގައި ފައިސާ ދިނުމުގައި ލަސްކަން ހުރިކަން ގަބޫލު ކުރައްވާކަމަށާއި އެކަންކަން ހައްލު ކުރުމަށްޓަކައި މަސައްކަތް ކުރަމުންދާކަމަށެވެ. އަދި، އުސޫލުތަކަށް ބޯ ލަނބައި ކެތްތެރިވުމަށް މިނިސްޓަރވަނީ އެދިވަޑައިގެންފައެވެ.
