ކޮރަޕްޝަން، ހިންގަވާފައި ގައުމުން ބޭރުގައި ދިރިއުޅުއްވި ނަމަވެސް މައްސަލަތައް ބަލާނެ: މެމްބަރު ނާޝިޒު
22 އޯގަސްޓު 2020 | ހޮނިހިރު 07:25މިސަރުކާރު ގެނައީ އިންސާފު ހޯދައިދިނުމަށް
ރާއްޖެޓީވީގެ ފަލަސުރުހީ ޕްރޮގްރާމްގެ ތެރެއިން
ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުގެ މުއައްސަސާތަކާއި އޮފީސްތަކުގެ އިސް ބޭފުޅުން ކޮރަޕްޝަންގެ އަމަލުތައް ހިންގަވާފަ، ގައުމުން ބޭރުގައި ދިރިއުޅުއްވި ނަމަވެސް އެމައްސަލަތައް ބަލާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ކިނބިދޫ ދާއިރާގެ އެމްޑީޕީގެ މެމްބަރު ނާޝިޒް ވިދާޅުވީ، ރައީސް އިބްރާހިމް މުހައްމަދު ސޯލިހުގެ ސަރުކާރު ގެނައީ އިންސާފު ހޯދައިދިނުމަށް ކަމަށެވެ. އެގޮތުން އިންސާފު ހޯދައި، ކުށްވެރިން އިންސާފުގެ ކުރިމައްޗަށް ގެނައުމަށް މިސަރުކާރުން ފަސް ނުޖެހޭނެ ކަމަށް މެމްބަރު ނާޝިޒް ވިދާޅުވިއެވެ.
މެމްބަރު ނާޝިޒް ވިދާޅުވީ އެމްއެމްޕީއާރްސީ ބޮޑު ހިޔާނާތުގެ އިތުރުން ކުރީ ސަރުކާރުގެ މުއައްސަސާތައް ހިންގުމާ ހަވާލުވެ ތިއްބެވި ބޭފުޅުންނަށް ކޮރަޕްޝަންގެ ތުހުމަތުތައް ކުރެވޭއިރު، ބައެއް ބޭފުޅުން މިހާރު ދިރިއުޅުއްވަމުން ގެންދަވަނީ ރާއްޖޭއިން ބޭރުގައި ކަމަށެވެ. އެ ބޭފުޅުން ރާއްޖެއިން ބޭރުގައި ދިރިއުޅުއްވި ނަމަވެސް މިސަރުކާރުން އެމައްސަލަތައް ބަލާ ތަހުގީގު ކުރާނެ ކަމަށް މެމްބަރު ނާޝިޒް ވިދާޅުވިއެވެ. އަދި ވިދާޅުވީ އެބޭފުޅުން ރާއްޖެއަށް ގެންނަން ޖެހިއްޖެ ހާލަތެއްގައި އެކަން ވެސް ކުރުމަށް ކުރަން ޖެހޭ މަސައްކަތްތައް މިސަރުކާރުން ކުރާނެ ކަމަށެވެ.
މީގެ އިތުރުން މެމްބަރު ނާޝިޒް ވިދާޅުވީ މިސަރުކާރުގައި ކޮރަޕްޝަންގެ އަމަލެއް ހިންގާ ކަމަށްވާނަމަ ނުވަތަ ހިޔާނާތުގެ މައްސަލައެއް އުޅޭ ކަމަށްވާނަމަ އެމައްސަލައެއް ސަރުކާރުގެ ސަމާލު ކަމަށް ގެނައުމުގެ ފުރުސަތު އެބަ އޮތް ކަމަށެވެ. މެމްބަރު ނާޝިޒް ވިދާޅުވީ މިހާރު އޮޑިޓަރ ޖެނަރަލް މަސައްކަތްތައް ކުރަމުން ގެންދަވަނީ ވަރަށް މިނިވަންކަމާއެކު ކަމަށާއި، ސަރުކާރުން ނުފޫޒު ފޯރުވުމަށް މަސައްކަތް ނުކުރާނެ ކަމަށެވެ. އަދި އެކަހަލަ ކަމަަކަށް ފުރުސަތު ވެސް ނުދޭނެ ކަމަށް މެމްބަރު ނާޝިޒް ވިދާޅުވިއެވެ.
އެމްއެމްޕީއާރްސީގެ ހިޔާނާތަށް އަލިއަޅުވާލައްވާ މެމްބަރު ނާޝިޒް ވިދާޅުވީ ތަހުގީގުތައް ކުރިއަށްދާ ކަމަށާއި، ހިޔާނާތުގައި ބައިވެރިވެފައިވާ މީހުންގެ ނަންތައް ކުރިއަށް އޮތްތަނުގައި ހާމަ ކުރާނެ ކަމަށެވެ. ނަމަވެސް ނަންތައް ހާމަކުރާނީ ވަރަށް ބޮޑަށް ހުރިހާ ކަމެއް ތަހުގީގު ކުރުމަށްފަހު ކަމަށް މެމްބަރު ނާޝިޒު ވިދާޅުވިއެވެ.
މެމްބަރު ނާޝިޒް ވިދާޅުވީ ބޮޑު މައްސަލައެއް ތަހުގީގު ކުރަމުންދާއިރު، ވަގުތު ނަގާނެ ކަމަށެވެ. އަދި މިމަަސައްކަތް ކުރުމަށް އިތުރަށް ވަގުތު ބޭނުންވާކަން ވެސް މެމްބަރު ފާހަގަކުރެއްވިއެވެ.
