އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ސްޓްރޯކް ސެންޓަރު އިފްތިތާހްކޮށް ޚިދުމަތްތައް ދޭން ފަށައިފިއެވެ.

ސްޓްރޯކް ސެންޓަރުން ޚިދުމަތް ދޭން ފަށާފައިވަނީ މިމަހުގެ 17 ވީ ހޯމަ ދުވަހުން ފެށިގެންނެވެ. މިއީ ހޮސްޕިޓަލަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށް އައިޖީއެމްއެޗުން ބުނެއެވެ.

އައިޖީއެމްއެޗުން ބުނީ 06 އެނދު ހިމެނޭހެން ހުޅުވުނު މިސެންޓަރުގެ 02 އެނދަކީ ވެންޓިލޭޓަރުގައި ފަރުވާ ދޭންޖެހޭ ބަލިމީހުންނަށް ހާއްސަކޮށް ފަރުމާ ކުރެވިފައިވާ ދެ އެނދު ކަމަށެވެ.

24 ގަޑިއިރު ޚިދުމަތް ދިނުމަށް ހަމަޖެހިފައިވާ މިސެންޓަރަކީ ސްޓްރޯކް ޖެހިގެން ގެނެވޭ ބަލިމީހުންނަށް ލިބިދޭންޖެހޭ ޚިދުމަތްތައް ވީހާވެސް އަވަހަށް ފޯރުކޮށް ދިނުމަށް ހާއްސަކޮށްފައިވާ ސެންޓަރެއް ކަމަށް އައިޖީއެމްއެޗުން ބުނެއެވެ.

އައިޖީއެމްއެޗުން ބުނީ އެގޮތަށް އެނދުމަތި ކުރެވޭ ބަލިމީހުންނަށް އަވަސް ފަރުވާދެވުމަކީ ސްޓްރޯކުގެ ސަބަބުން ފުރާނައަށް ނުރައްކާވާ މިންވަރު ކުޑަވެ، ސްޓްރޯކް އަކަށްފަހު ނުކުޅެދުންތެރިކަމެއް އުފެދުމުގެ ފުރުސަތު ނިސްބަތުން ދަށްވެގެންދާނެ ކަމެކެވެ. އަދި މި ސެންޓަރުގެ ސަބަބުން މިފަދަ ބަލިމީހުންގެ ހާލަތު ކުރިއަށްވުރެ ގާތުން ބެލެހެއްޓުމަށް މަގުފަހިވެގެންދާނެ ކަމަށް އައިޖީއެމްއެޗުން ބުނެއެވެ.

މީގެ އިތުރުން އައިޖީއެމްއެޗުން ބުނީ ސްޓްރޯކް އަކަށްފަހު އާއްމު ދިރިއުޅުމުގެ ހަރަކާތްތަކަށް ފިޒިއޮތެރަޕީ، ސްޕީޗް ތެރަޕީ އަދި އޮކިއުޕޭޝަނަލް ތެރަޕީ ފަދަ އިތުރު ޚިދުމަތްތައް ވެސް ފޯރުކޮށްދެމުންދާނެ ކަމަށެވެ

ރައީސުލް ޖުމްހޫރިއްޔާގެ މެނިފެސްޓޯގައި ވާފަދައިން މި ހޮސްޕިޓަލުގައި ގާއިމް ކުރެވުނު ސްޓްރޯކް ސެންޓަރަކީ މުސްތަގުބަލުގައި އެޑްވާންސްޑް ސްޓްރޯކް ސެންޓަރެއް ގާއިމް ކުރުމަށް އެޅޭ ފުރަތަމަ ބިންގަލެވެ.