އެމެރިކާގެ ރިޔާސީ އިންތިޙާބުގައި ވާދަ ކުރައްވާ އެ ޤައުމުގެ ކުރީގެ ނައިބު ރައީސް ޖޯ ބައިޑެން ޑިމޮކްރަޓިކް ޕާޓީގެ ރިޔާސީ ޓިކެޓް ރަސްމީކޮށް ޤަބޫލުފުޅު ކުރައްވައިފިއެވެ.
ރިޔާސީ ޓިކެޓް ރަސްމީކޮށް ޤަބޫލުފުޅު ކުރެއްވުމާ ގުޅިގެން އާންމު ކުރެއްވި ވީޑިއޯ މެސެޖެއްގައި ބައިޑެން ވިދާޅުވީ، އެމަނިކުފާނު ވެވަޑައިގަންނަވާނީ "ހުރިހާ އެމެރިކަންސް" ގެ ރައީސްއަކަށް ކަމަށެވެ. އަދި އެމަނިކުފާނަކީ ފަޚުރުވެރި ޑިމޮކްރެޓެއް ކަމަށް ވެސް ވިދާޅުވިއެވެ.
މި ވީޑިއޯގައި ވަނީ ބައިޑެންގެ ޙަޔާތުގެ ބައެއް އުސްއަލިތައް ދައްކާލާފައެވެ. އަދި އާއިލާގެ ބައެެއް ވާހަކަތަކާއި، ސިޔާސީ ޙަޔާތުގެ މައްޗަށް އަލިއަޅުވާލައްވާފައިވެއެވެ.
ބައިޑެން ވަނީ އެމެރިކާގެ ކުރީގެ ރައީސް ޖޯޖް ޑަބްލިއު ބުޝްގެ ވެރިކަމުގައި އެމެރިކާގެ ސެކެޓްރީ އޮފް ސްޓޭޓްގެ މަސްއޫލިއްޔަތު އަދާކުރެއްވުމުގެ އިތުރުން، ބިލް ކްލިންޓަންގެ ވެރިކަމުގައި ޖޮއިންޓް ޗީފް އޮފް ސްޓޭޓްގެ ޗެއަރމަންކަން ވެސް ކުރައްވާފައެވެ. ޖޯ ބައިޑެން އަށް ތާޢީދު ކުރައްވަން ނިންމެވިކަން އެމެރިކާގެ ކުރީގެ ރައީސް ބަރަކް އޮބާމާގެ އިތުރުން، ބައިޑެން އާ އެންމެ ގާތުން ޕްރައިމަރީގައި ވާދަކުރައްވާ، ފަހުން ޕްރައިމަރީން ވަކިވެ ވަޑައިގެންފައިވާ ބަރނީ ސެންޑަރސް ވެސް ވަނީ އިއުލާނު ކުރައްވާފައެވެ.
އެމެރިކާގެ ރިޔާސީ އިންތިޚާބު އޮންނާނީ މި އަހަރުގެ ނޮވެންބަރު މަހުގެ ތިންވަނަ ދުވަހުއެވެ.
