ކޮޗިންއާ ރާއްޖެއާ ދެމެދު ފެރީ ހިދުމަތް ސެޕްޓެމްބަރު މަސް ތެރޭ ފަށަނީ
21 އޯގަސްޓު 2020 | ހުކުރު 00:17މީގެ ކުރިންވެސް ވަނީ މަޝްވަރާތަކެއް ކުރެވިފައި
ދަތުރުތައް ކުރުމަށް ބޭނުން ކުރާ ކާގޯ ފެރީ އަކީ އިންޑިއާގެ ޝިޕިންގ ކޯޕަރޭޝަނުން އޮޕަރޭޓް ކުރާ ފެރީއެއް
އިންޑިއާގެ ކޮޗިންއާއި ރާއްޖެއާއި ދެމެދު ކާގޯ ފެރީގެ ދަތުރުތައް ކުރިއަށް އޮތް ސެޕްޓެމްބަރު މަހުގެ ތެރޭގައި ފެށިގެންދާނެ ކަމަށް ރާއްޖޭގައި ހުންނަ އިންޑިއާ ހައި ކޮމިޝަނުން ބުނެފިއެވެ.
ރާއްޖޭގައި ހުންނަ އިންޑިއާ ހައި ކޮމިޝަނުން ކުރި ޓްވީޓެއްގައި ބުނީ، އަންނަ ސެޕްޓެމްބަރު މަހުގެ 3 ވަނަ ހަފްތާ ތެރޭގައި މި ޚިދުމަތް ފެށިގެންދާނެ ކަމަށެވެ. އެގޮތުން އެކަމަށް ބޭނުން ކުރާ ކާގޯ ފެރީ އަކީ އިންޑިއާގެ ޝިޕިންގ ކޯޕަރޭޝަނުން އޮޕަރޭޓް ކުރާ ފެރީއެއް ކަމަށް ހައިކޮމިޝަނުން ބުނެފައިވެއެވެ.
ކާގޯ ފެރީގެ ހިދުމަތާއެކު ދިވެހިރާއްޖެއާއި އިންޑިއާއާ ދެމެދު އޮތް ޒަމާންވީ ވިޔަފާރީގެ ގުޅުން އިތުރަށް ހަރުދަނާ ވެގެންދާނެ ކަމަށް ސަރުކާރުން ވަނީ ބުނެފައެވެ. އަދި ފެރީގެ އެއް މަންޒިލެއް ގޮތުގައި ހދ. ކުޅުދުއްފުށި ވެސް ހިމެނޭއިރު، މިއީ އުތުރުގެ ރަށްތަކަށް ވިޔަފާރީގެ ގޮތުން ކުރިއެރުން ލިބި، ރާއްޖޭގެ އުފެއްދުންތައް އިންޑިއާގެ މާކެޓަށް އަދި އިންޑިއާ މެދުވެރިކޮށް ބައިނަލްއަގްވާމީ މާކެޓަށް ނެރުމަށް ފަސޭހަ ވެގެންދާނެ ކަމެއް ކަމަށް ސަރުކާރުން ބުނެއެވެ.
ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރުވެސް އިންޑިއާ އާއި ކުޅުދުއްފުއްޓާއި ދެމެދު ފެރީގެ ހިދުމަތް ފެށުމުގެ މަޝްވަރާތަކެއް ކުރިއަށް ގެންގޮސްފައިވެއެވެ.
ކޮޗިން އަކީ ދިވެހިން ބޭސް ފަރުވާ އަށާއި ޗުއްޓީ ހޭދަކޮށްލުމަށް ވެސް ވަރަށް ގިނައިން ދަތުރުކޮށް އުޅޭ ސިޓީއެކެވެ.
