އެޗްޕީއޭގެ އެންގުމާ ޚިލާފަށް ވިލުފުއްޓަށް އެރި މީހަކު ހައްޔަރު ކޮށްފި
އެޗްޕީއޭއިން ވަނީ ދަތުރުފަތުރު ކުރާއިރު އަމަލު ކުރަންޖެހޭ އުސޫލެއް އެކުލަވާލާފަ
ފުލުހުން ބުނީ، މި މައްސަލައިގައި ހައްޔަރު ކޮށްފައިވަނީ އުމުރުން 35 އަހަރުގެ ދިވެހި ފިރިހެނެއްކަމަށް
ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ އެންގުންތަކާ ޚިލާފަށް ތ. އަތޮޅު ވިލުފުއްޓަށް އެރި މީހަކު ހައްޔަރު ކޮށްފިއެވެ.
ފުލުހުން ބުނީ، މި މައްސަލައިގައި ހައްޔަރު ކޮށްފައިވަނީ އުމުރުން 35 އަހަރުގެ ދިވެހި ފިރިހެނެއް ކަމަށެވެ.
އޭނާ ހައްޔަރު ކޮށްފައިވަނީ ކޮވިޑް-19 ގެ މި ޙާލަތުގައި އެޗްޕީއޭގެ އެންގުންތަކާ ޚިލާފަށް އަދި ނަގަންޖެހޭ ހުއްދަތަށް ނުނަގައި މާލެއިން ވިލުފުއްޓަށް ދިޔުމުން ކަމަށް ފުލުހުން ބުނެއެވެ. އަދި މި މައްސަލަ އިތުރަށް ތަޙުޤީޤު ކުރަމުން ދާކަމަށް ވެސް ފުލުހުން މައުލޫމާތުދެއެވެ.
ކޮވިޑް-19ގެ ކޭސްތަކެއް އަތޮޅުތެރޭގެ ރަށްތަކުން ފެނުމާއި އެކު އެޗްޕީއޭއިން ވަނީ ދަތުރުފަތުރު ކުރާއިރު އަމަލު ކުރަންޖެހޭ އުސޫލެއް އެކުލަވާލާފައެވެ. އެގޮތުން، ކައުންސިލްގެ ހުއްދައާއެކު މީހުން ދިރިއުޅޭ ރަށަށް ދަތުރުކުރާއިރު 14 ދުވަސް ކަރަންޓީން ވާން ވެސް ޖެހެއެވެ.
ރާއްޖެއިން މިވަގުތުވެސް 6370 މީހުން ކޮވިޑް-19 އަށް ޕޮޒިޓިވްވެފައިވާއިރު، މާލެއިން ރަށްރަށަށް ދާން ބޭނުންވެގެން 9000 އެއްހާ މީހުން އެދިފައިވާ ކަމަށާއި، މިއީ ރަށްރަށަށް ދަތުރުކުރަން އެންމެ ރަނގަޅު ދަނޑިވަޅު ނޫން ކަމަށް ހެލްތް މިނިސްޓްރީން ދާދި ފަހުން ވަނީ ބުނެފައެވެ.
