ފާއިތުވި 5 މަސް ތެރޭގައި އިތުރު ނުވާ ވަރަށް ޖަރުމަނުން ޕޮޒިޓިވް ކޭސްތައް އިތުރުވެއްޖެ
21 އޯގަސްޓު 2020 | ހުކުރު 00:21ޖަރުމަނުގައި ވައިރަސްއަށް ޓެސްޓް ކުރާ މިންވަރުވެސް ފާއިތުވި ދުވަސްތަކުގައި ވަނީ އިތުރުކޮށްފަ
ފާއިތުވި 24 ގަޑިއިރުވެސް ޖަރުމަނުން 1700ށް ވުރެ ގިނަ ކޭސް ރިޕޯޓް ކުރެވިފައިވޭ
ފާއިތުވި 5 މަސް ތެރޭގައި އިތުރު ނުވާ ވަރަށް ޖަރުމަނުވިލާތުން ޕޮޒިޓިވް ކޭސްތައް އިތުރުވެއްޖެއެވެ.
ޖަރުމަނުގެ ސަރުކާރާ ޙަވާލާދީ ބޭރުގެ މީޑިއާތަކުން ރިޕޯޓް ކޮށްފައިވާ ގޮތުން، އޭޕްރީލް މަހަށް ފަހު ޖަރުމަނުގައި އެންމެ ގިނަ އަދަދެއްގެ ކޭސްތައް ރިޕޯޓް ކުރެވުނީ މި ހިނގާ އޯގަސްޓް މަހުގެ ތެރޭގައެވެ. އަދި ޖަރުމަނާއި، ސްޕެއިންގެ އިތުރުން އެ ސަރަޙައްދުގެ ބައެއް އެހެން ޤައުމުތަކުން ވެސް ފެންނަމުންދާ ކޭސްތައް އިތުރުވެފައިވާ ކަމަށް ރިޕޯޓްތައް ބުނެއެވެ.
ރިޕޯޓްތައް ބުނާ ގޮތުން ޖަރުމަނުގައި ވައިރަސް އަށް ޓެސްޓް ކުރާ މިންވަރު ފާއިތުވި ދުވަސްތަކުގައި ވަނީ އިތުރު ކޮށްފައެވެ. އެގޮތުން ނިމިދިޔަ ހަފްތާގައި ވެސް 875،000ށް ވުރެ ގިނަ މީހުން ޓެސްޓް ކޮށްފައިވާ ކަމަށް ރޮބަރޓް ކޮޗް އިންސްޓިޓިއުޓާ ޙަވާލާދީ ރިޕޯޓްތައް ބުނެއެވެ. އެހެން ނަމަވެސް ޖަރުމަނުގައި ފެނުނު ކޭސްތައް ރެކޯޑް އަދަދަކަށް އިތުރުވި ހަމައެކަނި ސަބަބަކީ އެއީ ނޫން ކަމަށް ދިރާސާ ކުރާ ފަރާތްތަކުން ބުނެއެވެ.
އެގޮތުން ފާއިތުވި ދުވަސްތަކުގައި ޗުއްޓީ ހޭދަ ކުރުމަށް އެކި ޤައުމުތަކަށް ދިޔަ މީހުން އަނބުރާ އައުމާއި، އިޖުތިމާއީ ގައިދުރު ކަމަށް ސަމާލުކަން ނުދިނުން އެކަމުގެ ސަބަބެއްގެ ގޮތުން ފާހަގަ ކުރެއެވެ.
ފާއިތުވި 24 ގަޑިއިރު ވެސް ޖަރުމަނުން 1700ށް ވުރެ ގިނަ ކޭސް ރިޕޯޓް ކުރެވިފައިވާއިރު، އެ ޤައުމުން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދަކީ 228،261 އެވެ. އަދި ކޮވިޑް-19 ޖެހިގެން އެ ޤައުމުން 9253 މީހުން ވަނީ މަރުވެފައެވެ.
