ރާއްޖޭގެ މަސްވެރިން ލަންކާ މާރުކޭޓަށް މަސްވިއްކުން، ނަޝީދުގެ އުއްމީދެއް
ދެ ގައުމުގެ ދެމެދުގައި އޮންނަ ވިޔަފާރީގެ ގުޅުމަށް އަލިއަޅުއްވައިލެއްވި
މަޖިލީހުގެ ރައީސް، ރައީސް ނަޝީދު
ރާއްޖޭގެ މަސްވެރިން ބާނަ މަސް ސީދާ ލަންކާގެ ބާޒާރަށް ވިއްކޭނެ ގޮތް ހަމަޖެހިގެން ދިޔުމަކީ ސަރުކާރުގެ އުއްމީދެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު އެހެން ވިދާޅުވީ، ސްރީލަންކާ - މޯލްޑިވްސް ބިޒްނަސް ކައުންސިލްގެ 12 ވަނަ އަހަރީ ބައްދަލުވުމުގައި ވާހަކަފުޅު ދައްކަވަމުންނެވެ. އެ ބައްދަލުވުމައި ރައީސް ނަޝީދު ވިދާޅުވީ، ރާއްޖޭ މަސްވެެރިން ބާނާ މަސް ސީދާ ލަންކާގެ ބާޒާރަށް ވިއްކޭނެ ގޮތް ހަމަޖެހުމަކީ އެމްޑީޕީ އަދި މި ސަރުކާރުގެ ވިސްނުމެއް ކަމަށެެވެ. އަދި ހަމަ އެފަދައިން ލަންކާގެ މަސްވެރިން ބާނަ މަސް ރާއްޖެއަށް ވިއްކޭ ގޮތަށް އިންތިޒާމް ހަމަޖެހިގެން ދިޔުން މުހިއްމު ކަމަށް ވިދާޅުވި އެވެ.
ރާއްޖޭގެ މަސްވެރިންނަށް ލަންކާގައި މަސް ވިއްކޭނެ އިންތިޒާމް ހަމަޖެހިގެން ދިޔުމަކީ އުއްމީދެއް ކަމަށް ނަޝީދު ވިދާޅުވެފައިވާއިރު، ރާއްޖެއާއި ލަންކާއާ ދެ ގައުމުގެ މެދުގައި އޮންނަ ގުޅުން އިތުރަށް ބަދަހި ކުރުމަށް، ދެ ގައުމުގެ ކަނޑުގެ ސަރަހައްދު ބޭނުން ކުރެވޭނެ ގޮތެއް ހޯދަން ޖެހޭ ކަމަށް އެމަނިކުފާފު ވަނީ މީގެ ކުރިން ވިދާޅުވެފައެވެ.
ރައީސް ނަޝީދު ވިދާޅުވީ، ރާއްޖޭގައި ވިއްކާ ކޮންސްޓްރަކްޝަން ތަކެތީގެ ތެރެއިން ލަންކާ އިން އެތެރެކުރާ ތަކެއްޗަކީ އެހެން ގައުމުތަކާއި އަޅާބަލާއިރު ވަރުގަދަ ތަކެތި ކަމަށެވެ. ރައީސް ނަޝީދު ވިދާޅުވީ، ދެ ގައުމު ދޭތެރޭގައި އޮންނަ ވިޔަފާރީގެ ގުޅުން އިތުުރުވަމުން ދާނެކަމާއި މެދު ޝައްކެއް ނެތް ކަމަށެވެ.
