ރެއާލް މެޑްރިޑްގެ ފޯވާޑް ގެރެތު ބޭލް ހޯދުމަށް އޭނާގެ ކުރީގެ ކުލަބު ޓޮޓެންހަމް ހޮޓްސްޕާއިން އަނެއްކާވެސް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މީގެ ކުރިންވެސް ބޭލް ހޯދުމަށް ޓޮޓެންހަމުން މަސައްކަތް ކޮށްފައިވާއިރު، މިފަހަރު ބޭލް ހޯދުމަށް މަސައްކަތް ކުރަމުން އަންނަނީ އެ ޓީމުގެ ކޯޗު ހޯސޭ މޮރީނިއޯގެ އެދުމުގެ މަތިން ކަމަށް ރިޕޯޓުތައް ބުނެއެވެ. އެގޮތުން މި ޓްރާންސްފާ ބާޒާރުގައި ޓޮޓެންހަމުން ބޭލް ހޯދުމަށް މަސައްކަތް ކުރަނީ އޭނާ އަކީ އެ ޓީމާއެކު ނަތީޖާ ނެރެވޭނެ އަދި އެ ޓީމުގެ ކުޅުން އެންމެ ރަނގަޅަށް އެނގޭނެ ކުޅުންތެރިޔެއް ކަމަށް މޮރީނިއޯ ގަބޫލުކުރާތީ ކަމަށްވެސް ރިޕޯޓުތައް ބުނެއެވެ.

ބޭލް ހޯދުމަށް ޓޮޓެންހަމުން މަސައްކަތް ކުރަމުން އަންނައިރު، މީގެ ކުރިން ޔޫރަޕްގެ ބޮޑެތި ކުލަބުތަކުންވެސް އޭނާއަށް ވަނީ ޝައުގުވެރިކަން ފާޅުކޮށްފައެވެ. އޭގެ ތެރޭގައި ޔުވެންޓަސް އާއި ޕީއެސްޖީވެސް ހިމެނެއެވެ.

ބޭލް ހޯދުމަށް ޓޯޓެންހަމުން މަސައްކަތް ކުރަމުން އައި ނަމަވެސް، މީގެ ކުރިން ބޭލް އޭޖެންޓް ވަނީ އޭނާ އަނބުރާ ޓޮޓެންހަމަށް ބަދަލުނުވާނެ ކަމަށް ބުނެފައެވެ. އަދި އަންނަ ސީޒަނުގައިވެސް ބޭލް ފެންނާނީ ރެއާލްގެ ސްކޮޑުން ކަމަށާއި، ބޭލް ރެއާލްގައި ހުރީ ހިތްހަމަޖެހިގެން ކަމަށްވެސް ވަނީ ބުނެފައެވެ.

އެކަމަކު މި ފަހަކަށް އައިސް ރެއާލްގެ ފުރަތަމަ އެގާރައިން ބޭލްއަށް ޖާގައެއް ނުލިބެއެވެ. ރެއާލަށް 2013 ވަނަ އަހަރުގެ ސީޒަނުގައި ބަދަލުވި ބޭލް، އެ ކްލަބާއެކު ހަދާފައިވާ އެއްބަސްވުން ވަނީ 2022 ގެ ނިޔަލަށް އާކޮށްފައެވެ.

މި ފަހުން ރެއާލުން ކުޅުނު މެޗުތަކުގައި ބޭލްއަށް ކުޅުމުގެ ފުރުސަތު ލިބިފައި ނުވާއިރު، އޭނާ ބެންޗުގައި އިނދެ ނިދުމުގެ އިތުރުން މި ނޫންވެސް އެކިއެކި ކަންކަން ކުރަމުން އަންނާތީ ރެއާލްގެ ސަޕޯޓަރުން އަންނަނީ ފާޑު ކިޔަމުންނެވެ. އަދި ބޭލް މައްސަލައިގައި ރެއާލްގެ ސަޕޯޓަރުންވެސް ވަނީ އޭނާ ރެއާލް ދޫކޮށްލުމަށް ގޮވާލާފައެވެ.

މި ސީޒަނުގައި ބޭލް ރެއާލްގެ ޖާޒީގައި ފެނިގެން ގޮސްފައިވަނީ އެންމެ 14 މެޗުގައެވެ. މީގެ ކުރިން ރެއާލްގައި ބޭލް މޮޅު ކުޅުމެއް ދެއްކިއިރު، އޭނާ ވަނީ ރެއާލްއާއެކު ޖުމްލަ 12 ތަށި ހޯދާފައެވެ. އަދި ވަނީ ރެއާލްއަށް ކުޅެދިން 251 މެޗުގައި 105 ލަނޑު ކާމިޔާބުކޮށްފައެވެ.