ކޮވިޑް-19 ޕެންޑަމިކްއާ ގުޅިގެން ރާއްޖޭގެ ބޮޑަރު މިދިޔަ ޖުލައި މަހުގެ 15 ވަނަ ދުވަހު އަލުން ހުޅުވާލުމާއެކު އެ މަހުގެ ތެރޭގައި ރާއްޖެއަށް ޒިޔާރާތް ކުރި ފަތުރުވެރިން އަދަދަށްވުރެ ދެ ގުނަ ފަތުރުވެރިން މި އޮގަސްޓް މަހުގެ ފުރަތަމަ 15 ގައި ރާއްޖެއަށް ޒިޔާރަތް ކޮށްފިއެވެ.

ރާއްޖެޓީވީގެ "ފަށާއިރު" ޕްރޮގްރާމަށް މައުލޫމާތު ދެއްވަމުން ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ ޖެނެރަލް މެނޭޖަރ، ޓަރމިނަލް އޮޕަރޭޝަންސް، އިބްރާހީމް ހުސައިން ވިދާޅުވީ، ބޮޑަރު އަލުން ހުޅުވާލުމާއެކު ޖުލައި މަހުގެ 15 އިން ފެށިގެން އެ މަހުގެ ނިޔަލަށް ރާއްޖެއަށް ޒިޔާރާތް ކޮށްފައިވަނީ 1،700 ފަތުރުވެރިން ކަމަށެވެ. އަދި މި އޮގަސްޓް މަހުގެ ފުރަތަމަ 15 ދުވަހު ރާއްޖެއަށް 3،400 ފަތުރުވެރިން ރާއްޖެއަށް ޒިޔާރަތް ކޮށްފައިވާއިރު މިއީ ދެ ގުނަ އިތުރު އަދަދެއް ކަމަށެވެ.

އެހެންކަމުން، ރާއްޖޭގެ ބޯޑަރު ޖުލައި 15 ގައި އަލުން ހުޅުވާލުމާއެކު އޮގަސްޓް 15 އާ ހަމައަށް ވޭތުވެދިޔަ އެއް މަސް ދުވަހުގެ ތެރޭގައި ރާއްޖެއަށް 5،100 ފަތުރުވެރިން ރާއްޖެއަށް ޒިޔާރަތް ކޮށްފައި ވެއެވެ.

އިބްރާހީމް ހުސައިން އިތުރަށް ވިދާޅުވީ، މި އޮގަސްޓް މަހުގެ ފުރަތަމަ 15 ގައި ރާއްޖެއަށް ޒިޔާރަތް ކުރި ފަތުރުވެރިންގެ ތެރޭގައި ގިނައީ ޔުނައިޓެޑް އެރަބް އެމިރޭޓްސް (ޔޫއޭއީ) އިން ޒިޔާރަތް ކުރި ފަތުރުވެރިން ކަމަށެވެ. އެގޮތުން އެ ގައުމުން ރާއްޖެއަށް 504 ފަތުރުވެރިން ޒިޔާރަތް ކުރި ކަމަށެވެ. އަދި އިނގިރޭސިވިލާތުން 421 ފަތުރުވެރިން، އެމެރިކާއިން 336 ފަތުރުވެރިން، ސްޕެއިންއިން 250 ފަތުރުވެރިން، އަދި ރަޝީއާއިން 193 ފަތުރުވެރިން މި މަހުގެ ފުރަތަމަ 15 ދުވަހު ރާއްޖެއަށް ޒިޔާރަތް ކޮށްފައިވާ ކަމަށެވެ.

އިބްރާހީމް ހުސައިން ވިދާޅުވީ، ކުރިއަތް އޮތްތާނގައި، ރަޝިޔާއާއި ޗައިނާ އަދި އިންޑިއާ ފަދަ ބޮޑެތި ގައުމުތަކުގެ ބޯޑަރުތައް ހުޅުވާލުމާއެކު ރާއްޖެއަށް ޒިޔާރަތް ކުރާ ފަތުރުވެރިން ވަރަށް ބޮޑުތަނުން އިތުރު ވެގެންދާނެ ކަމަށް ގަބޫލު ކުރައްވާ ކަމަށެވެ.

އިބްރާހީމް ހުސައިން ވިދާޅުވީ ބޯޑަރު އަލުން ހުޅުވާލި ފަހުން، އެވްރެޖްކޮށް ދުވާލަކު ހަތަރު ފްލައިޓް އަންނަ ކަމަށާއި މިއަދަތުތައް ކުރިއަށް އޮތްތަނުގައި އިތުރު ވެގެންދާނެ ކަމަށެވެ. އަދި އެވްރެޖްކޮށް ދުވާލަކު ދެ ނުވަތަ ތިން ޕްރައިވެޓް ޖެޓް އަންނަމުންދާއިރު، މިއަދަދު ވެސް ކުރިއަށް އޮތްތަނުގައި އިތުރު ވެގެންދާނެ ކަމަށް ލަފާކުރެވޭ ކަމަށެވެ.

ކޮވިޑް-19އާ ގުޅިގެން ވެލާނާ އިންޓަރނޭޝަނަލް އެއަރޕޯޓު ބަންދު ކޮށްފައި އޮތުމަށްފަހު އަލުން ހުޅުވިތާ އެއް މަސް ދުވަސްވީއިރު، އެއަރޕޯޓަށް ޖެއްސި އަދި ފުރި ފްލައިޓުތަކުގެ އަދަދަކީ 764 ކަމަށް ވެލާނާ އިންޓަރނޭޝަނަލް އެއަރޕޯޓް ހިންގާ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ހާމަކޮށްފައި ވެއެވެ.

އެމްއޭސީއެލުން ނެރެފައިވާ ތަފާސްހިސާބުތައް ދައްކާގޮތުން މިދިޔަ މަހުގެ 15 އިން މިމަހުގެ 15 އަށް ޖުމްލަ 764 އެއަރ ޓްރެފިކް މޫވްމަންޓު ވަނީ ރެކޯޑުކުރެވިފައެވެ. އެއަރ ޓްރެފިކް މޫވްމަންޓަކީ، އެއަރޕޯޓަށް ޖައްސާ ފްލައިޓުތަކުގެ އަދަދާއި އެއަރޕޯޓުން ފުރާފައިވާ ފްލައިޓުތަކުގެ އަދަދެވެ.

ކޮވިޑް-19 ޕެންޑަމިކް އާގުޅިގެން ދުނިޔޭގެ އިގްތިޞާދު ދަށަށް ގޮސް، ދަތުރުފަތުރު ކުރުމުގެ ނިޒާމަށް ބޮޑެތި ޖޮންޖެހުންތަކެއް ކުރިމަތިވެ، ގައުމުތަކުގެ ބޯޑަރުތައް ބަންދު ކުރުމަށްފަހު، އަލުން ބައެއް ގައުމުތަކުން ވަނީ ބޯޑަރުތައް ހުޅުވާފައެވެ. އެގޮތުން ކޮވިޑް-19 އާގުޅިގެން ރާއްޖޭގެ ބޯޑަރު ބަންދު ކުރީ މިއަހަރުގެ މާރޗު މަހުގެ 27 ވަނަ ދުވަހު އެވެ. އަލުން ބޯޑަރު ހުޅުވީ މިދިއަ ޖުލައި މަހުގެ 15 ވަނަ ދުވަހު އެވެ.