ފުރަތަމަ ފަހަރަށް ޕީއެސްޖީ ފައިނަލަށް

އާރްބީ ލެއިޕްޒީގް ބަލިކޮށް ޔުއެފާ ޗެމްޕިއަންސް ލީގު ފައިނަލަށް ފުރަތަމަ ފަހަރަށް ޕީއެސްޖީ ދަތުރުކޮށްފިއެވެ.

ކުއާޓާއިން ފެށިގެން ޗެމްޕިއަންސް ލީގުގެ މެޗުތައް ޕޯޗުގަލްގެ ވެރިރަށް ލިޒްބަންގައި ކުރިއަށްދާއިރު، ފައިނަލްގެ ފުރަތަމަ ޖާގާ ޕީއެސްޖީ ހޯދީ އަންގާރަ ދުވަހުގެރޭ ކުޅުނު ސެމީފައިނަލް ފުރަތަމަ މެޗުގައި ލެއިޕްޒީގް އަތުން 3-0 ން މޮޅުވެގެނންނެވެ. ޕީއެސްޖީގެ ތާރީޚުގައި މުޅިން އަލަށް އެޓީމު ޗެމްޕިއަންސް ލީގިގެ ފައިނަލަށް ދަތުރުކުރިއިރު، ޕީއެސްޖީ ވެގެންގޮސްފައިވަނީ ޔޫރަޕްގެ މުބާރާތެއްގެ ފައިނަލްގައި ކުޅޭނެ ފްރާންސްގެ ފަސްވަަނަ ޓީމަށެވެ.

އަންގާރަ ދުވަހުގެރޭ ކުޅުނު މެޗުގައި ޕީއެސްޖީން މޮޅު ކުޅުމެއް ދެއްކިއިރު، މެޗުގެ ވަރަށް ކުރީ ކޮޅު އެޓީމުން ވަނީ ލަނޑު ޖަހާ ލީޑު ނަގާފައެވެ. އެންހެލް ޑިމާރިއާ ހުރަސްކޮށްދިމް ބޯޅައަކުން މެޗުގެ 13 ވަނަ މިނެޓުގައި މި ލަނޑު ކާމިޔާބުކޮށްދިނީ މާކީނިއޯސްއެވެ.

އަދި މެޗުގެ ފުރަތަމަ ހާފު ނިމުމުގެ ކުރިން ޕީއެސްޖީން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މެޗުގެ 42 ވަނަ މިނެޓުގައި ލެއިޕްޒީގުގެ ގޯލްކީޕަރު ހެދި ގޯހެއްގެ ފައިދާ ނަގާ، ނޭމާ ދިން ޕާހަކުން މި ލަނޑު ކާާމިޔާބުކޮށްދިނީ ޑިމާރިއާއެވެ.

ދެވަނަ ހާފު ފަށައިގެން ވެސް ޕީއެސްޖީން ރަނގަޅު ކުޅުމެއް ދެއްކިއިރު، ދެވަނަ ހާފު ފަށައިގެން 11 ވަނަ މިނެޓުގައި ޕީއެސްޖީން ވަނީ އިތުރު ލަނޑެއް ކާމިޔާބު ކޮށްފައެވެ. ޑިމާރިއާގެ އެހީތެރިކަމާއެކު މި ލަނޑު އެޓީމަށް ކާމިޔާބު ކޮށްދިނީ ހުއާން ބާނަޓެވެ.

މި މެޗުގައި ޖެހި ލަނޑުތަކާއެކު ޕީއެސްޖީން ވަނީ ޗެމްޕިއަންސް ލީގުގައި ޖެހިޖެހިގެން 34 މެޗުގައި ލަނޑު ޖަހާ، މި މުބާރާތް 13 ފަހަރު ކާމިޔާބުކޮށްފައިވާ ރެއާލް މެޑްރިޑުން ހަދާފައިވާ ރެކޯޑަކާ އެއްވަރުކޮށްފައެވެ.

ލެއިޕްޒީގް ބަލިކޮށް ފައިނަލްގެ ފުރަތަމަ ޖާގަ ޕީއެސްޖީ ހޯދިއިރު، ފައިނަލްގައި އެޓީމު ވާދަކުރަން ޖެހޭނީ ބުދަ ދުވަހުގެރޭ ބަޔާން މިއުނިކާާއި ލިޔޯން ބައްދަލުކޮށް މޮޅުވާ ޓީމަކާއެވެ.