ހުރިހާ ރަށަކުން 30 މިނެޓް ތެރޭ ޑޮމެސްޓިކް އެއާޕޯޓަށް ދެވޭނެ ފެރީ ނިޒާމެއް ޤާއިމު ކުރަނީ

ރާއްޖޭގެ އުތުރުން ދެކުނަށް ހުރިހާ ރަށަކުން 30 މިނެޓް ތެރޭ ޑޮމެސްޓިކް އެއާޕޯޓަށް ދެވޭނެ ފެރީ ނިޒާމެއް ޤާއިމު ކުރުމުގެ މަސައްކަތް ކުރަމުންދާކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.

ހޯމަ ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ހައުސިންގ މިނިސްޓްރީގެ ނައިބް ފާތިމަތު ނިއުމާ ވިދާޅުވީ، ބޯހިޔާވަހިކަން ފޯރުކޮށްދިނުމުގެ ވާހަކަ ދައްކާއިރު، ހުރިހާ ރަށަކުންވެސް އެންމެ އަސާސީ ޚިދުމަތްތައް ލިބޭނެ އިންތިޒާމު ހަމަޖެއްސުމަކީ މިނިސްޓްރީގެ އަމާޒެއް ކަމަށެވެ. ނިއުމާ ވިދާޅުވީ، ރާއްޖޭގެ އުތުރުން ދެކުނަށް ހުރިހާ ރަށަކުން 30 މިނެޓް ތެރޭ އެ އަތޮޅެއްގެ ޑޮމެސްޓިކް އެއާޕޯޓަށް ދެވޭނެ ސްޕީޑް ފެރީ ނިޒާމެއް ޤާއިމު ކުރުމުގެ މަސައްކަތް ކުރަމުންދާ ކަމަށެވެ. އަދި އެކަމަށްޓަކައި ޚާއްސަ ޕްރޮގްރާމެއް ޑިވޮލޮޕްކޮށް، ޕްރޮގްރާމް ލޯންޗު ކުރުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ.

ނިއުމާ އިތުރަށް ވިދާޅުވީ، ކުރިން އަމާޒު ކުރީ މިއަހަރުގެ ތެރޭގައި ޕްރޮގްރާމް ލޯންޗު ކުރުމަށް ކަމަށެވެ. އެހެން ނަމަވެސް، ކޮވިޑް-19 ގެ މި ޙާލަތާއި ގުޅިގެން ޕްރޮގްރާމް ލޯންޗު ކުރުން ލަސްވެފައިވާކަމަށް އޭނާ ވިދާޅުވިއެވެ. އަދި އަންނަ އަހަރު ފެށިގެންދަނީ މި ޕްރޮގްރާމްގެ އިމްޕްލިމެންޓޭޝަން މަރުޙަލާ ކަމަށްވެސް އޭނާ ވިދާޅުވިއެވެ.